Arrasul Bulus itstanaf ddaƹweṯ nnes ɣar lmalik Qayṣar
25
1 Fastus iḏweȓ netta ḏ lwali ḏi lʼiqlim. Wami ṯeƹḏu ṯeȓtiyyam igaƹƹeḏ netta zi ṯendint nni n Qayṣariya ɣar ṯendint n Lquds.
2-3 Arruyas n ȓefquha ḏ imeqqranen n Ayṯ-Israʼil qeddmen-as ttuhmaṯ nsen ḍed i Bulus. Ḥeccmen-ṯ ttaren zzayes aḏasen igg ȓxaḍar nsen bac aṯiḏ yawi ɣar Lquds ƹlaḥeqqac niṯni wejjḏen-as i Bulus bac aṯ nɣen ḏeg ubriḏ nni.
4 Inna-asen lwali qa Bulus aqaṯ ḏ ameḥbus ḏi ṯednint n Qayṣariya, ȓexxu nec aḏ ḏewȓeɣ ḏinni.
5 Labud akiḏi raḥen ȓebƹaḍ n imeqqranen nwem. Meȓa ixḍa uryaz nni ḏi can ȓḥajeṯ, qeddmem-ayi-d ttuhmaṯ nwem ḍed nnes ḏinni.
6 Iqqim Fastus ḏi Lquds ma ṯmeniyyam ma ƹecriyyam, menbƹad ihwa ɣar Qayṣariya. Ṯiwecca nnes, igga ljelsa ḏi lmaḥkama yumar aḏas d awin Bulus.
7 Wami d iḥḍar, munen-d xas iʼisraʼiliyen nni iy d yusin zi Lquds. Tahamen-ṯ s waṭṭas n ṯmesȓayin uƹarent maca war ɣarsen bu ddalil.
8 Ibḏa Bulus itḏafaƹ x yixef nnes inna: "Nec war xḍiɣ ca ḏi manayenni, lla ḏi Ccariƹa n Ayṯ-Israʼil uȓa ḏi ṯemziḏa ṯameqqrant uȓa ḏi lmalik Qayṣar."
9 Walakin lwali Fastus irezzu aḏ igg ȓxaḍar i Ayṯ-Israʼil inna-as i Bulus: "Ma ṯexseḏ aḏ tgaƹƹḏeḏ ɣar ṯendint n Lquds axak ḥekmeɣ nec x ttuhmaṯ-a ḏinni?"
10 Inna-as Bulus: "Aqayi beddeɣ ḏi lmaḥkama n lmalik Qayṣar, nec itxeṣṣa ḏa iy ɣa twaḥakmeɣ. Qa Ayṯ-Israʼil war ḏaysen xḍiɣ ca, mammec ṯessneḏ cek.
11 Meȓa xḍiɣ iƹni ggiɣ can ȓḥajeṯ nec sḏaheǧeɣ xas ȓmewṯ war zemmareɣ azzayes rewȓeɣ. Walakin meȓa ttuhmaṯ-a iy xafi qeddmen war ǧint ca ḏ ṣṣaḥ, uȓa ḏ ijjen war ɣares bu ȓḥaqq aḏayi isellem i niṯni. Nec testanafeɣ ddaƹweṯ inu ɣar lmalik Qayṣar."
12 Lwali Fastus issiweȓ akeḏ imcawaren nnes uca inna-as i Bulus: "Iwa wami ṯestanfeḏ cek ddaƹweṯ nnec ɣar Qayṣar, ɣar Qayṣar iy ɣar ɣa ṯraḥeḏ."
Fastus issawaȓ ak uzeǧiḏ Aɣribas x lqaḍiya n Bulus
13 Ƹḏun ȓebƹaḍ n wussan, yusa-d uzeǧiḏ Aɣribas ḏ učmas Birnika ɣar ṯendint n Qayṣariya bac aḏ seǧmen x lwali Fastus.
14 Wami qqimen ḏinni aṭṭas n wussan, issiweȓ Fastus ak uzeǧiḏ x lqaḍiya n Bulus. Inna-as: "Ḏa ij n uryaz ijji-ṯ Filiks ḏ ameḥbus.
15 Wami ruḥeɣ ɣar Lquds qeddmen-ayi-d ttuhmaṯ arruyas n ȓefquha ḏ imeqqranen n Ayṯ-Israʼil, ttaren zzayi axas ḥakmeɣ x lmujrim.
16 Nniɣ-asen: Ƹlaḥsab lƹada n arrumanus war tsellimen ḥadd qbeȓ ma aḏ imqabaȓ aked yinni iy xas iggin ttuhma, aɣares ṯiȓi lfurṣa aḏ iḏafeƹ x yixef nnes.
17 Iḏen, munen-d ḏanita ṯiwecca nnes ggiɣ ljelsa nnes ḏi lmaḥkama war ƹeṭṭaȓeɣ ca umareɣ bac aṯiḏ awin.
18 Kkaren ssiwȓen yinni xas iqeddmen ttuhmaṯ, ufiɣ ttuhmaṯ nsen ḍed i Bulus war ǧint bu ḏ can ljarimaṯ am tuɣa trajiɣ nec.
19 Innama menɣen akis x can ṯmesȓayin ḏi ddin nsen u x yij n uryaz qqaren-as Ƹisa, netta immuṯ walakin Bulus iqqar lla, iddar!
20 Wami weddareɣ nec war ufiɣ mammec ɣa beḥṯeɣ ḏi ṯmesȓayin-a, nniɣ-as i Bulus: Ma aḏ traḥeḏ ɣar Lquds axak ḥekmeɣ ḏinni x ttuhmaṯ-a?
21 Yugi Bulus, istanef ddaƹweṯ nnes ɣar Qayṣar. Umareɣ nec aḏ iqqim ḏ ameḥbus aȓ ṯ ɣa ssekkeɣ ɣar lmalik Qayṣar."
22 Inna-as uzeǧiḏ Aɣribas i Fastus: "Nec s yixef inu xseɣ aḏas ṣennṭeɣ i uryaz-a." Inna-as Fastus: "Ṯiwecca aḏas ṯṣennṭeḏ."
Arrasul Bulus zzaṯ i uzeǧiḏ Aɣribas
23 Ṯiwecca nnes, wami d yusa uzeǧiḏ Aɣribas ḏ Birnika s yij n ccan imɣar, uḏfen ɣar uxxam ḏ ameqqran n uyraw akiḏes arruyas n ȓƹaskar n arrumanus ḏ imeqqranen n ṯendint. Ȓxeddnnit yumar Fastus uwin-d Bulus.
24 Inna Fastus: "A si azeǧiḏ Aɣribas ḏ iryazen iḥḍaren akiḏneɣ marra! Aqa twaȓam aryaz-a zzaṯwem xas iy xef ḏayi qeddmen ttuhmaṯ marra lʼumma n Ayṯ-Israʼil ḏi Lquds uȓa ḏanita ḏi Qayṣariya. Snekkaren xas ṯɣuyyiṯ qqaren labud netta war itɣimi ca ƹaḏ aḏ iddar!
25 Nec war xas ufiɣ bu can ȓḥajeṯ isḏaheǧ xas ȓmewṯ. Wami istanef ddaƹweṯ nnes ɣar lmalik Qayṣar, xseɣ aɣares ṯ ssekkeɣ.
26 Walakin nec war xas ufiɣ bu can n ttuhma nican aḏas t ariɣ i si lmalik Qayṣar. S manaya seḥḍareɣ-ṯ-iḏ zzaṯwem, xaṣṣatan cek a si azeǧiḏ Aɣribas, bac meȓa ṯeggim-as lʼistijwab aḏ ssneɣ min xas ɣa ariɣ.
27 Nec twaȓiɣ maci maƹqul aḏ ssekkeɣ ij umeḥbus bȓa ma aḏ ariɣ ttuhmaṯ iy xas qeddmen."