Bulus itḏafaƹ x yixef nnes zzaṯ i uzeǧiḏ Aɣribas
26
1 Inna-as uzeǧiḏ Aɣribas i Bulus: "Qa nesmeḥ-ac aḏ tessiwȓeḏ x yixef nnec."
Iceyyar Bulus s ufus nnes ibḏa itḏafaƹ x yixef nnes inna-as:
2 "A si azeǧiḏ Aɣribas, ssaƹḏ inu wami ḏayi ṯejjiḏ aḏ ḏafƹeɣ x yixef inu nhara zzaṯec cek x marra ttuhmaṯ iy ḏac qeddmen xafi Ayṯ-Israʼil.
3 Xaṣṣatan minzi cek ṯessneḏ marra lƹadaṯ n Ayṯ-Israʼil ḏ lxilafaṯ nsen. S manaya tettareɣ zzayek aḏayi ṯeṣbareḏ aḏayi ṯṣennṭeḏ.
4 Qa marra Ayṯ-Israʼil ssnen mammec tuɣa ṯeǧa ṯuḏarṯ inu zi ṯemzi inu iy ƹiceɣ ḏi ṯmurṯ inu, ƹaweḏ uȓa ḏi ṯendint n Lquds.
5 Niṯni ssnen-ayi aṭṭas zeg wami. Meȓa xsen axafi cehḏen qa nec ƹiceɣ ḏ afarrisi, iƹni ȓḥizeb nni iqesḥen aṭṭas ḏi ddin nneɣ.
6 Cuf, mayemmi nec ǧiɣ nhara ḏi lmaḥkama-ya? Liʼanna ɣari lʼamal zi ȓƹaheḏ nni iy ḏaneɣ yuca Arebbi zi ȓejḏuḏ nneɣ.
7 Ǧiȓeṯ ḏ nhar ṯenƹac n ṯqebbaȓ n Ayṯ-Israʼil ƹebbḏen Arebbi minzi ɣarsen lʼamal belli ȓƹaheḏ nni aḏ yiȓi. Cuf, a si azeǧiḏ, lʼamal-a netta ḏ ttuhma nni iy ḏac qeddmen xafi Ayṯ-Israʼil!
8 Mayemmi ṯenwim qa Arebbi war imkin ca aḏ d isnekkar yinni immuṯen zi ȓmewṯ?
9 Nec qenƹeɣ s yixef inu tuɣa ḍaruri aḏ ggeɣ marra min zemmareɣ bac aḏ ƹarrḍeɣ i yisem n Ƹisa zi Naṣira.
10 Amenni iy ggiɣ ḏi ṯendint n Lquds. S arruxṣa n arruyas n ȓefquha tḥebbaseɣ aṭṭas n ȓmuminin ṣaliḥin. Xmi xasen taḥkamen s ȓmewṯ, nec tafaqeɣ x manayenni.
11 Aṭṭas n ṯwaȓaṯin traḥeɣ zi ṯemziḏa ɣar ṯenneɣnit tƹeddabeɣ-ṯen, rezzuɣ aḏ ssiwȓen s bezzez ȓƹib ḏi Arebbi. S uɣḍab nni inu traḥeɣ ḥetta ɣar ṯneddam ḏi lxarij bac aṯen ƹeddbeɣ ḏinni.
12 X manaya iy ruḥeɣ ij n nhar ɣar ṯendint n Dimaceq, s arruxṣa n arruyas n ȓefquha ḏ ttesriḥ nsen.
13 A si azeǧiḏ, wami tuɣa ggureɣ ɣar uzyen nhar ẓriɣ ij n nnur ḏeg ujenna ṯfawṯ nnes ktar zi ṯfuct, inneḍ-ayi-d itceƹciƹ xafi nec ḏ yinni iy kiḏi igguren.
14 Newḍa marra iḏneɣ ɣar ṯmurṯ, sȓiɣ ij n ṯmijja ṯeqqar-ayi s luɣa lƹibriya: A Cawul, a Cawul! Mayemmi ḏayi tƹeddabeḏ? Teggeḏ am wenni iy ḏi ṯeǧa ṯɣennant isuggur-iṯ Arebbi s ṯsennant.a
15 Nniɣ-as: Min teƹniḏ cek, a Siḏi? Inna-ayi qa Nec ḏ Ƹisa, wenni iy tƹeddabeḏ.
16 Ȓexxu kkar, bedd x iḍaren nnec. Aqa seḍhareɣ-ac-d ixef inu bac ac d ƹezzȓeɣ ḏ axeddam inu ḏ ij n ccaheḏ x min zzayi teẓriḏ ḏ min ḏac ɣa d seḍhareɣ.
17 Ac snejmeɣ zi lʼumma nnec, ac snejmeɣ ƹaweḏ zeg yinni war iǧin zi Ayṯ-Israʼil. Ac ssekkeɣ ɣarsen
18 bac aḏasen ṯrezmeḏ ṯiṭṭawin nsen, aṯen ṯesbeƹƹḏeḏ zi ṯaǧest ɣar nnur, aṯen ṯesbeƹƹḏeḏ x ssulṭa n Cciṭan ɣar Arebbi. Ammu aḏasen twaɣfarent ȓmuƹṣiyaṯ nsen aɣarsen yiȓi umcan ak ṣṣaliḥin, iƹni s lʼiman nsen iy ḏayi iy ggin.
19 Nec a si azeǧiḏ Aɣribas, war ƹṣiɣ ca lwaḥi nni iy d ihwan zeg ujenna.
20 Lla, tbeccareɣ ḏ amezwaru imezḏaɣ n tendint n Dimaceq, ṯumma imezḏaɣ n ṯendint n Lquds, ṯumma marra jwayeh n ṯmurṯ n Yahuḏiya, ḏ aneggaru marra yinni war iǧin zi Ayṯ-Israʼil. Tbeccareɣ-ṯen aḏ tuben aḏ ḏewȓen ɣar Arebbi, aḏ xeḏmen ȓexḏayem iǧan n ttuba n ṣṣaḥ.
21 X manaya ṭṭfen-ayi Ayṯ-Israʼil ḏi ṯemziḏa ṯameqqrant, xsen aḏayi nɣen.
22 Walakin Arebbi iƹawen-ayi-d zi qbeȓ ḥetta nhara. Ammu aqayi nec beddeɣ ḏa tbeccareɣ i umezyan ḏ umeqqran. Qqareɣ ɣir ṯimesȓayin nni iy nnan lʼanbiya ḏ Musa labud aḏ weqƹent.
23 Iƹni, Lmasiḥ labud aḏ iƹeddeb. Axmi ɣa yiȓi netta ḏ amezwaru iy d ɣa ikkaren zi ȓmewṯ, aḏ ibeccar s nnur lʼumma nneɣ ḏ marra yinni war iǧin zi Ayṯ-Israʼil."
24 Bulus aqaṯ ƹaḏ issawaȓ itḏafaƹ x yixef nnes, ikkar lwali Fastus inna-as s jjheḏ: "A Bulus, ma cek ṯeflippaḏ? Ṯɣuri nnec ṯemɣar, ṯesbuhȓi-cek!"
25 Inna-as Bulus: "A si lwali Fastus, nec war flippaɣ ca. Lla, min qqareɣ ḏ ṣṣaḥ u s ȓaƹqeȓ.
26 Azeǧiḏ Aɣribas issen mliḥ x manaya, nec rezzuɣ akis ssiwȓeɣ s ṣṣaraḥa marra. Nec ttaqiɣ belli uȓa ḏ ij n ȓḥajeṯ zi manaya war ṯeqqim war t issin, liʼanna war ṯewqiƹ bu ḏi can n ṯɣemmarṯ waha.
27 A si azeǧiḏ Aɣribas, ma tamneḏ s lʼanbiya? Ssneɣ nec belli cek tamneḏ."
28 Inna-as uzeǧiḏ Aɣribas: "Ma s cwayt n ȓweqṯ ṯa ṯenwiḏ aḏayi ṯarreḏ ḏ amasiḥi?"
29 Inna-as Bulus: "S cwayt n ȓweqṯ ṯa niɣ s waṭṭas, tettareɣ zi Arebbi i cek ḏ yinni iy ḏayi itesȓan nhara aḏ tiȓim am nec, maca mebȓa snaseȓ-a."