Itraḥ arrasul Bulus ɣar ṯendint n Ruma
27
1 Wami umaren bac aḏaneɣ ssekken ḏeg uɣarrabu ɣar ṯmurṯ n Iṭalya, sellmen Bulus ḏ ȓebƹaḍ n imeḥbas i yij n uƹaskari ḏ ameqqran n arrumanus qqaren-as Yulyus. Netta yusa-d zi ȓƹaskar nni umi qqaren <Lfirqa n Qayṣar.>
2 Nenya ḏeg yij n uɣarrabu itraḥen ḏi ȓweqṯ nni zi ȓemwiyi n Adramit ɣar ȓemwiyawaṯ n lʼiqlim n Asya. Iruḥ akiḏneɣ Aristarxus, netta zi Ayṯ-Masidunya zi ṯendint n Salunik.
3 Ṯiwecca nnes, wami nuweḍ ɣar ṯendint n Ṣayda igga ȓxir Yulus ak Bulus ijji-ṯ aḏ iraḥ ɣar imeddukaȓ nnes bac aḏayes thillan.
4 Ssenni neffeɣ nruḥ ḏeg uɣarrabu ḏi jjiheṯ nni mani ihedden ȓebḥar n ṯeyzirṯ n Qubruṣ, minzi arriḥ iccaṯ-d ḏayneɣ ɣar uɣembub nneɣ.
5 Wami neƹḏu ȓebḥar nni iǧan zzaṯ i lʼiqlim n Kilikya ḏ lʼiqlim n Pamfilya, nuweḍ ɣar ṯendint n Mira ḏi lʼiqlim n Likya.
6 Yufa ḏinni uƹaskari nni ameqqran ij n uɣarrabu yusa-d zi ṯendint n Iskandariya itraḥ ḏi ȓweqṯ nni ɣar ṯmurṯ n Iṭalya, isney-aneɣ ḏayes.
7 Aṭṭas n wussan neccin nuggur ḏeg uɣarrabu walakin nuyur ɣir cwayt n ubriḏ, menbaƹd neƹḏu ṭṭarf i ṯendint n Kanidus. Wami arriḥ war ḏaneɣ ijji bu a nsiɣi x ubriḏ nni, neƹḏu swadday n ṯeyzirṯ n Krit jjiheṯ n Qabu n Salmun.
8 S bezzez nuggur ṭṭarf ṭṭarf n ȓbarr menbaƹd nuweḍ ɣar yij n umcan qqaren-as <Ȓmarsaṯ Ṯiṣebḥanin> netta yuḏes i ubilaj n Lisya.
9-10 Ussan n Ȓƹiḏ ṣafi ƹḏun, tuɣa nexsar aṭṭas n ȓweqṯ ḥetta wami iḏweȓ usafar nneɣ ḏi ȓebḥar ḏayes lxaṭar. Ikkar Bulus iƹȓem-asen inna-asen: "A siyaḏi, nec twaȓiɣ asafar nneɣ aḏ yiȓi ḏ ij n lmuṣiba ḏ ij n ṯxessarṯ ḏ ṯameqqrant, maci ɣir aɣarrabu ḏ sseȓƹaṯ nnes waha, maca ƹaweḏ uȓa ḏ ṯuḏarṯ nneɣ."
11 Walakin aƹaskari nni ameqqran war iggi bu array i Bulus, igga array i bab n uɣarrabu ḏ arrayes nnes.
12 Lʼianna ȓmarsa nni ḏ ṯaƹeffant bac aḏayes seƹḏun ȓmecta ḏinni. X manaya azyen ameqqran ggin aḏ uyuren ssenni ḏeg uɣarrabu, tmennan aḏ awḍen ɣar ubilaj n Finiks aḏayes seƹḏun ȓmecta. Nettaṯ ḏ ij n ȓmarsa ḏi ṯeyzirṯ n Krit teḍhur ɣar ljanub ḏ ccamal ḏi jjiheṯ n lɣarbi.
Lƹaṣifa ḏi ȓebḥar
13 Wami d iṣuḍ ij n arriḥ ifsus zi ljanub, itɣir-asen ufin min rezzun. Sgaƹƹḏen-d aȓiyzima n uɣarrabu ruḥen ḏi ȓebḥar ṭṭarf i ȓbarr n ṯeyzirṯ nni n Krit.
14 Walakin menbaƹd cwayt ikkar-d ij n arriḥ ijheḏ ihwa-d zi ṯeyzirṯ nni, arriḥ nni qqaren-as <Asmawi.>b
15 Lƹaṣifa nni ṯuwi aɣarrabu, wami war nzemmar ca a nuyur ɣar zzaṯ nejja aɣarrabu aṯ yawi arriḥ.
16 Nnuffar zi arriḥ wami neƹḏu swadday n yij n ṯeyzirṯ ḏ ṯamezyant qqaren-as Kawda. Iqseḥ xaneɣ aṭṭas ȓḥaȓ walakin nrekken ṯaɣarrabut n lʼiɣaṯa,
17 nesgaƹƹeḏ-it-id ɣar uɣarrabu. Ixeddamen cedden aɣarrabu s iseɣwan swadday bac war itrezzi ca. Wami ggwḏen aḏ yuyur uɣarrabu aḏ innaɣ ḏeg yijḏi n ȓebḥar n Surt, ssenni sehwan-d ȓeqȓuƹc uɣarrabu jjin arriḥ aṯ yawi.
18 Ṯerni lƹaṣifa nni, ṯiwecca nnes bḏan neṭṭaren sseȓƹaṯ ḏi ȓebḥar.
19 Nhar wis ṯeȓtiyyam nḍaren ȓqecc uɣarrabu ḏi ȓebḥar s ifassen nsen.
20 Ṯeqqim amenni lƹaṣifa nni, aṭṭas n wussan war neẓri ṯfuct uȓa ḏ yiṯran. Neccin ḏeg uneggaru nefqeḏ lʼamal belli a nenjem.
21 Wami kkin aṭṭas n ȓweqṯ war ccin walu, ikkar Bulus inna-asen: "Ay iryazen, maƹlik ḏayi ṯeggim array war ṯeffiɣem ca zi ṯeyzirṯ n Krit, ataf war xawem ṯekki tamara-ya ḏ ṯxessarṯ-a.
22 Ȓexxu tettareɣ zzaywem aḏ tiȓim ḏ iryazen aqa war itmetti ḥadd zzaywem, walakin aɣarrabu-ya ṣafi, aḏ irez.
23 Cuf, ǧiȓeṯ-a ṯa qa ṯeḍhar-ayi-d ij n lmalaʼika n Arebbi, Arebbi-ya netta ḏ wenni xeddmeɣ netta ḏ bab inu.
24 Ṯenna-ayi lmalaʼika nni: A Bulus, war teggweḏ ca! Labud aḏ tbeddeḏ ɣar lmalik Qayṣar. Xzar ƹaweḏ, yinni marra iy kic itsafaren isenjem-iṯen Arebbi akiḏec."
25 Inna-asen Bulus: "Iwa iȓiṯ ḏ iryazen kenniw! Qa nec tamneɣ zi Arebbi belli min ḏayi inna aḏ yiȓi aḏ yiȓi.
26 Maca labud aḏ innaɣ uɣarrabu-ya ɣar ṭṭarf n can ṯeyzirṯ."
27 Ḏi ǧiȓeṯ nni wis arbeƹṭac ȓyewm u neccin ƹaḏ nuggur nweddar ḏi ȓebḥar n Wadriyatiki, ɣar uzyen n ǧiȓeṯ nni tɣir-asen i ixeddamen uɣarrabu qa tqerraben ɣar ȓbarr.
28 Ƹbaren ȓaǧeɣ n ȓebḥar ufin sebƹa u ṯȓaṯin mitru. Ṯeƹḏu cwayt n ȓweqṯ ƹbaren ƹaweḏ ufin ɣir sebƹa u ƹicrin mitru.
29 Ggwḏen aɣarrabu aḏ iȓqef can uzru, nḍaren zi puppad uɣarrabu arbeƹa iȓiyzame qqimen tẓaǧan bac aḏ iṣbeḥ ȓḥaȓ.
30 Rezzun ixeddamen uɣarrabu aḏ rewȓen zzayes, sehwan ṯaɣarrabut n lʼiɣaṯa ɣar waman sneƹmiȓen axmi xsen aḏ nḍaren iȓiyzam zi prubaf uɣarrabu.
31 Inna-as Bulus i uƹaskari nni ameqqran ḏ ȓƹaskar nnes: "Meȓa war qqimen ca ixeddamen-a ḏeg uɣarrabu, war ṯzemmarem aḏ tnejmem."
32 Qessen ȓƹaskar iseɣwan n ṯɣarrabut n lʼiɣaṯa jjin-teṯ axasen ṯbeƹƹeḏ.
33 Wami ibḏa aḏ iṣbeḥ ȓḥaȓ, ikkar Bulus ittar zzaysen marra aḏ ccen can ȓḥajeṯ inna-asen: "Ṯeƹḏu arbeƹṭac ȓyewm trajam waha bȓa lmakla, war ṯeccim walu.
34 Ȓexxu tettareɣ zzaywem aḏ teccem can ȓḥajeṯ bac aḏ teqqimem ṯeddarem, war iweṭṭi uȓa ḏ ij n uzuṭṭu zeg uzeǧif nwem."
35 Wami inna awaȓ-a, ikkar iysi-d aɣrum ickar Arebbi zzaṯsen marra, irez-iṯ ibḏa itett.
36 Cejjƹen marra iḏsen ccin.
37 Neccin lƹadad nneɣ ḏeg uɣarrabu miyytayen u setta u sebƹin n yiwḏan.
38 Wami ccin jjiwnen, nḍaren irḏan ḏi ȓebḥar bac aḏ sefssen aɣarrabu.
39 Wami d iṣbeḥ ȓḥaȓ, niṯni twaȓan can ṯmurṯ war t ssinen ca. Ẓrin ij n lxalij ḏinni, cceṭṭ nnes ḏayes ijḏi. Ggin aɣares ƹanen aɣarrabu meȓa zemmaren.
40 Qeḍwen iȓiyzam jjin-ṯen ḏi ȓebḥar, serxun iseɣwan iy zi twarekknen dmamaṯ.g Sgaƹƹḏen ȓeqȓaƹ n zzaṯ i arriḥ itṣuḍen, wejjhen ɣar ȓbarr.
41 Maca aɣarrabu yuwṯa ij uyeddim n yijḏi ḏi ȓwesṭ n waman innuɣ ḏinni. Pruba nnes ṯennuɣ mliḥ war tenhezzi. Puppa nnes ṯebḏa trezza s jjehḏ n ȓemwaj.
42 Ȓƹaskar nwan aḏ nɣen imeḥbas bac war itƹummi ḥadd zzaysen aḏ irweȓ.
43 Walakin aƹaskari nni ameqqran ixes aḏ isenjem Bulus, isbedd-iṯen x min xsen aḏ ggen. Yumar yinni izemmaren aḏ ƹummen aḏ neḍwen ḏ imezwura ḥima aḏ ffɣen ɣar ȓbarr.
44 Inneɣnit aṯen ḏfaren x ṯfeȓwin niɣ x ṯeȓwiḥin uɣarrabu. Amenni iy ffɣen marra iḏsen ɣar ȓbarr nejmen.