Arrasul Bulus ḏi ṯeyzirṯ n Malṭa
28
1 Wami nenjem aqaneɣ ḏi ȓbarr, nufa isem n ṯeyzirṯ nni qqaren-as Malṭa.
2 Ibarbariyen n umcan nni ggin ḏayneɣ ȓxir aṭṭas. Reḥben zzayneɣ marra ceƹƹȓen-aneɣ ṯimessi minzi tuɣa ṯesmeḍ anẓar iccaṯ.
3 Bulus ijmeƹ-d ikeccuḍen, wami ṯen isers ḏi ṯmessi iffeɣ-d s ȓeḥmu nni ij ufiɣer, iqqes-as iȓseq-as ḏeg ufus.
4 Wami ẓrin ibarbariyen nni fiɣer iȓseq ḏeg ufus n Bulus, nnan i wayawya: Nican aryaz-a wanita inɣa can yijjen. Arebbi nneɣ umi qqaren <Lʼirada> war ṯ ijji ca aḏ iddar waxxa injem zi ȓebḥar.
5 Maca Bulus inḍar fiɣer nni ḏi ṯmessi war ḏas iwqiƹ walu.
6 Ibarbariyen nni trajan ma aḏ yuff niɣ ḏeɣya aḏ iwḍa aḏ immeṯ. Wami ṯ rajan aṭṭas ẓrin war ḏas iwqiƹ walu, ibeddeȓ array nsen nnan wanita ḏ can nnawƹ n arebbi!
7 Ȓbarr-a wanita yuḏes ɣar can ṯmura n arrayes n ṯeyzirṯ nni, netta qqaren-as Publiyus. Irḥeb zzayneɣ, isnewjew-aneɣ ṯeȓtiyyam ikarem-aneɣ.
8 Babas n Publiyus itnezbar ḏi ṯassuṯ ihȓec s ṯmessi itazzeȓ-as uƹeddis. Iruḥ ɣares Bulus ɣar uxxam nnes iẓẓuǧ, wami xas isers ifassen nnes isgenfa-ṯ.
9 Iwqeƹ manayenni, usin-d ɣares imehȓac n ṯeyzirṯ nni marra isgenfa-ṯen Bulus.
10 Weqqaren-aneɣ ucin-aneɣ aṭṭas n ṯmesȓayin. Wami nsewjaḏ a neffeɣ ḏeg uɣarrabu, ḏebbaren-aneɣ-d ȓqecc iy neḥḏaj.
Arrasul Bulus itaweḍ ɣar ṯendint n Ruma
11 Menbaƹd i ṯeȓt chur, nenya ḏeg yij uɣarrabu zi Iskandariya tuɣa iseƹḏu ȓmecta ḏi ṯeyzirṯ nni. Aɣarrabu nni x uɣembub nnes xas lʼaṣnam Icniwen n Arebbi.
12 Nuweḍ ɣar ṯendint n Saraqusa neqqim ḏayes ṯeȓtiyyam.
13 Ssenni nruḥ ḏeg uɣarrabu ɣar ṯendint n Riǧiw. Ṯiwecca nnes, ikkar-d ij n arriḥ zi ljanub nuweḍ ḏi nhar wis ṯeȓtiyyam ɣar ȓemwiyi n Butiswuli.
14 Nufa ḏinni ȓebƹaḍ n ayṯmaṯneɣ, ƹerḍen-aneɣ akisen neqqim sebƹiyyam. Ammu iy nuweḍ ɣar ṯendint n Ruma.
15 Ɣarsen ȓexbar ɣar ayṯmaṯneɣ ḏi Ruma nusa-d, ffɣen-d aḏaneɣ d ȓqan ḥetta ɣar Ssuq n Wabyan u ḥetta ɣar Ṯraṯa n Ṯuḏrin n imsafaren. Wami ṯen iẓra Bulus, ickar Arebbi itwacejjeƹ.
16 Nuḏef ṯandint n Ruma, ismeḥ-as ȓmexzen i Bulus aḏ izḏeɣ waḥḏes akis iqqim yij n uƹaskari iy xas ɣa iƹesssen.
Arrasul Bulus itbeccar ḏi ṯendint n Ruma
17 Ṯeƹḏu ṯeȓtiyyam, iȓaɣa-d Bulus i imeqqranen n Ayṯ-Israʼil. Wami d munen inna-asen: "Ay ayṯma, nec war ggiɣ walu ḍed i ccaƹb nneɣ niɣ ḍed i lƹadaṯ n ȓejḏuḏ nneɣ. Waxxa amenni ṭṭfen-ayi ḏi Lquds sellmen-ayi i ifassen n arrumanus.
18 Niṯni ggin-ayi lʼistijwab, xsen aḏayi ḍeȓqen minzi war xafi ufin bu can ttuhma iy xef sḏaheǧeɣ ȓmewṯ.
19 Wami Ayṯ-Israʼil ƹarrḍen, nec war ufiɣ illa aḏ stanfeɣ ddaƹweṯ inu ɣar lmalik Qayṣar. Walakin nec war ggiɣ bu can ttuhma x lʼumma inu.
20 Iḏen x manaya ttareɣ-kenniw akenniw ẓreɣ akiḏwem ssiwȓeɣ. Ƹlaḥsab lʼamal n Ayṯ-Israʼil iy twaceddeɣ s ssensȓeṯ-a."
21 Nnan-as: "War ḏaneɣ d ṯuwiḍ xak uȓa ḏ yij n ṯebrat zi jwayeh n Yahuḏiya. Zeg yinni iy d yusin zi ayṯmaṯneɣ ssenni war ḏaneɣ issiweȓ ḥadd xac, war xak inni ḥadd ȓƹib.
22 Maca nxes azzayek nṣennet lʼafkar nnec, minzi nessen belli aṭṭas n yiwḏan ḏi mkuȓ amcan ȓḥizeb-a wa tƹarraḍen-as."
23 Ttafqen x yij n nhar, twarnin inneɣni usin-d ɣares aṭṭas iḏsen ɣar ṯeddarṯ mani iqqim Bulus. Itḥeddaṯ-iṯen zi ṣbaḥ aȓ wami ḏ aƹecci icehheḏ s ȓmulk n Arebbi, ixes aṯen iseqneƹ s Ccariƹa n Musa ḏ Lkutub n lʼanbiya x Ƹisa.
24 Ȓebƹaḍ zzaysen qtanƹen s min inna, ȓebƹaḍ nneɣnit war uminen ca.
25 Niṯni war mesfhimen ca ak wayawya. Qbeȓ ma aḏ ffɣen ssenni, inna-asen Bulus awaȓ-a ḏ aneggaru: "Arruḥ iqeddsen inna ȓḥaqq i ȓejḏuḏ nwem x yiȓes n nnabi Icaƹya, inna:
26 Ruḥ ɣar ccaƹb-a in-asen:
Cḥaȓ ma tesȓim war ṯefhimem,
cḥaȓ ma ṯxezzarem war twiȓim.
27 Ȓaḥeqqac ccaƹb-a,
uȓ nsen iḏweȓ am uzru,
ƹȓayen war tesȓin walu,
qqnen ṯiṭṭawin nsen.
Ḥima war twiȓin s ṯiṭṭawin nsen,
war tesȓin s imejjan nsen,
war tefhimen s wuȓawen nsen,
aɣari d ḏewȓen aṯen sgenfiɣ.a
28 Itxeṣṣa aḏ tessnem belli uȓa ḏ yinni war iǧin ḏ iʼisraʼiliyen Arebbi aṯen isenjem, niṯni aḏas sȓen." {
29 Wami inna awaȓ-a, ffɣen Ayṯ-Israʼil zzayes u niṯni temnaqaren s jjehḏ jarasen.}