Lḥisab n Arebbi iǧa nican
2
1 Iḏen ay aryaz, meȓa cek tƹeyyabeḏ x yiwḏan, war ɣarek bu ȓḥaqq min ma ṯeƹniḏ. Liʼanna xmi tƹeyyabeḏ x can yijjen, tƹeyyabeḏ x yixef nnec ƹaweḏ. Maɣar? Liʼanna cek teggeḏ kif-kif mammec teggen niṯni!
2 Wah, neccin nessen qa lƹiqab n Arebbi ihewwa nican x yinni iteggen ṯimesȓayin nni.
3 Ay aryaz, min tfekkareḏ? Iwa, ma aḏ tnejmeḏ zi lƹiqab n Arebbi wami tƹeyyabeḏ x inneɣnit x ṯmesȓayin-a u cek teggeḏ am niṯni?
4 Niɣ ṯseḥqareḏ lḥanana imɣaren n Arebbi ḏ ṣbar nnes ḏ ȓxaḍar iy ɣares? Ma war ṯessineḏ belli Arebbi s lḥanana nnes irezzu ac d isbeyyen abriḏ bac aḏ tubeḏ?
5 Walakin cek s ṯɣennant iy ḏayek ḏ wuȓ nnec war ituben ca, tesmuniḏ i yixef nnec aɣḍab aȓ Yewm Lḥisab ḏ Lƹiqab, nhar iy ḏi d ɣa iḍhar ȓḥukem n Arebbi s ȓḥaqq.
6 Ṯumma aḏ ixeǧes Arebbi mkuȓ ijjen ƹlaḥsab ȓexḏayem nnes.
7 Aḏasen yuc netta ṯuḏarṯ war ifennin i yinni iṣebbaren teggen lḥasanaṯ, liʼanna rezzun x lhimma ḏ uweqqar ḏ ṯuḏarṯ itduman.
8 Walakin aɣarsen yiȓi lḥisab ḏ lƹiqab ɣar yinni itexsen ɣir i yixef nsen ḏ yinni war itṭiƹin ca i lḥaqiqa, ḏeffaren min war iǧin nican.
9 Ṯumma aḏ yiȓi uziyyar ḏ tamara x kuȓ bnaḏem iteggen ssayyiʼaṯ: Ayṯ-Israʼil ḏ imezwura, uca yinni war iǧin ca zi Ayṯ-Israʼil.
10 Walakin ḏ lhimma ḏ uweqqar ḏ ȓehna i marra yinni iteggen lḥasanaṯ: Ayṯ-Israʼil ḏ imezwura, uca yinni war iǧin ca zi Ayṯ-Israʼil.
11 Liʼanna Arebbi war itegg bu s wuḏemawen.
12 Cuf, marra yinni iƹeṣṣan u niṯni war ɣarsen bu ccariƹa, ataf aḏ fnan bȓa ccariƹa. Walakin yinni iƹeṣṣan u niṯni ɣarsen ccariƹa, ataf aḏ twaḥakmen ƹlaḥsab ccariƹa nni.
13 Liʼanna iwḏan war twaḥsiben ca nican ɣar Arebbi meȓa ṣennaṭen waha i wawaȓ n ccariƹa. Lla, belƹaks yinni iteggen array s min ḏayes ḏi ccariƹa, ḏ yinni iy ɣa twaḥsaben nican ɣar Arebbi.
14 U ḏ ṣṣaḥ, yinni war iǧin ca zi Ayṯ-Israʼil, iƹni ḏ yinni war ɣar ṯeǧi ca ccariƹa, maƹlik teggen array s nniyyeṯ nsen min ḏayes ḏi ccariƹa n Musa, aqa niṯni aḏ iȓin ḏ ccariƹa s yixef nsen; waxxa war ɣarsen ca ccariƹa n Musa.
15 Yina seḍharen-d belli min ḏayes ḏi ccariƹa aqaṯ ɣarsen yura ḏeg wuȓawen nsen. Ȓaƹquȓ nsen iy zi ṣaḥḥen manaya, u ḍḍamir nsen iƹeǧem-asen xmi teggen min isebḥan ḏ min war iḥȓin.
16 Iqqar Lʼinjil iy zi ḥeddṯeɣ, Manaya aḏ yiȓi, ḏi nhar nni xmi ɣa iḥaseb Arebbi x ufus n Ƹisa Lmasiḥ marra min inuffaren ḏeg wuȓawen n yiwḏan.
Min yurin x Ayṯ-Israʼil ḏi ccariƹa n Musa?
17 Ȓexxu cek, meȓa ṯḥessbeḏ ixef nnec ḏ aʼisraʼili, trajiḏ zi ccariƹa, ṯeftexareḏ s lƹalaqa nnec ak Arebbi.
18 Meȓa cek ṯessneḏ min ixes Arebbi, ṯessneḏ aḏ tixḍareḏ min iǧan nican liʼanna ccariƹa n Musa ṯesfehham-ic.
19 Meȓa aqac metʼakked belli ṯzemmareḏ aḏ tsuyureḏ iḍarɣaȓen u cek ḏ nnur i yinni iǧan ḏi ṯaǧest,
20 ṯneṣṣḥeḏ yinni war issinen, ṯseȓmaḏeḏ imezyanen, liʼanna ɣarek ḏi ccariƹa n Musa marra ṯusnaa ḏ lḥaqiqa.
21 Iwa cek iy iseȓmaḏen yinni, maɣar war ṯseȓmiḏeḏ ixef nnec? Cek tḥeddaṯeḏ ṯeqqareḏ: "War tacar ca." Y cek, ma tacareḏ?
22 Ṯeqqareḏ: "War zenna ca." Y cek, ma ṯzenniḏ? Cek tƹiffiḏ lʼaṣnam. Y cek, ma tacareḏ zi ṯemziḏawin?
23 Cek iteftaxaren s ccariƹa, ma war tweqqareḏ Arebbi xmi ṯƹeṣṣiḏ min ḏayes ḏi ccariƹa n Musa?
24 Aqa mammec iqqar Lkitab: S ssabab nwem Ayṯ-Israʼil minzi qqaren awaȓ war iḥȓin x yisem n Arebbi yinni war iǧin ca zi Ayṯ-Israʼil.
25 Cek meȓa ṯxeddmeḏ s min ḏayes ḏi ccariƹa, ṭṭahareṯb nnec tiȓi ɣares arbeḥ. Walakin meȓa ṯƹeṣṣiḏ ccariƹa, tiȓiḏ axmi war ṯeggiḏ ca ṭṭahareṯ.
26 Innama meȓa ḏinni can yijjen war iggi ca ṭṭahareṯ, netta ixeddem s min ḏayes ḏi ccariƹa n Musa, wanita itwaḥsab axmi igga ṭṭahareṯ.
27 Iƹni wenni ixeddmen s min ḏayes ḏi ccariƹa n Musa, waxxa war iggi ca ṭṭahareṯ ḏi ddat, axac iḥkem cek iy ɣar iǧa Lkitab nni ḏ ṭṭahareṯ. Maɣar? Liʼanna cek ṯƹeṣṣiḏ ccariƹa.
28 Liʼanna wenni iǧan ḏ aʼisraʼili ḏ ṣṣaḥ, war iǧi ḏ wenni d itbanen am iʼisraʼiliyen ḏi ddat waha. Ƹaweḏ ṭṭahareṯ n ṣṣaḥ war ṯeǧi ṯenni d itbanen ɣar barra waha x ddat.
29 Walakin aʼisraʼili iǧan ḏ ṣṣaḥ itiȓi ɣares manaya ɣar ḏaxeȓ. U ḏ ṭṭahareṯ n ṣṣaḥ tiȓi ḏeg wuȓ s Arruḥ n Arebbi, war iǧi bu s ccariƹa. Bnaḏem-a war ṯ tcekkaren ca yiwḏan, itcekkar-iṯ Arebbi.