Ȓḥaqq n Arebbi iseḍhar-d ȓbaṭeȓ n yiwḏan
3
1 Iwa iʼisraʼiliyen, ma ɣarsen can nfaƹ x yinni war iǧin zi Ayṯ-Israʼil? Ƹaweḏ ṭṭahareṯ, ma ḏayes can nfaƹ?
2 Wah, aṭṭas n nfaƹ! Ḏ amezwaru, ijja-asen Arebbi awaȓ nnes ḏ lʼamana.
3 Iwa meȓa ȓebƹaḍ zzaysen war uminen ca, ma s ssabab n lkufer nsen aḏ isbeṭṭeȓ ȓƹaheḏ nnes Arebbi?
4 Ƹemmarṣ! Ȓaḥeqqac Arebbi iqqar lḥaqiqa waxxa iwḏan marra sxerriqen. Mammec iqqar Lkitab:
Awaȓen nnec aḏ iȓin ṣeḥḥan,
cek aḏ trebḥeḏ xmi ɣa twaḥekmeḏ.
5 Fa meȓa ȓbaṭeȓ nneɣ iy ntegg iseḍhar-d ȓḥaqq n Arebbi, min ɣa nini? (Nec ssawaȓeɣ ƹlaḥsab lfikra n bnaḏem.) Arebbi, ma iḍeǧem xmi ḏaneɣ itƹaqab?
6 Lla, ƹemmarṣ! Maƹlik amenni, mammec ɣa iḥaseb Arebbi ddunect?
7 Imken aḏ yini can yijjen: Mȓi ȓbaṭeȓ inu netta iseḍhar-d mliḥ lḥaqiqa n Arebbi, mȓi zzayes itmerni Arebbi ḏi lƹaḍama nnes, iwa mayemmi ḏayi ɣa iḥaseb ḏ lƹaṣi?
8 Niɣ, yallah a negg ȓbaṭeȓ ḥima azzayes d ikk ȓxir. Ammeni tahamen-aneɣ can yiwḏan s ẓẓur belli neqqar awaȓ-a. Iwḏan-a niṯni isḏaheǧen lƹiqab n Arebbi!
Iwḏan marra ƹeṣṣan Arebbi war ǧin ca nican
9 Iwa, ma neccin Ayṯ-Israʼil lḥala nneɣ ḥsen zeg yiwḏan nneɣnit? Lla, ƹemmarṣ! Nenna qbeȓ qa Ayṯ-Israʼil ḏ yinni war iǧin ca zi Ayṯ-Israʼil marra iḏsen ggin ȓmuƹṣiyeṯ.
10 Mammmec iqqar Lkitab:
War iǧi ḥadd nican, uȓa ḏ ijjen.
11 Uȓa ḏ ijjen ma ifehhem.
War irezzu x Arebbi, uȓa ḏ ijjen.
12 Ffɣen abriḏ marra iḏsen,
ḏewȓen marra war neffƹen.
War iǧi ḥadd itegg min iṣebḥan.
13 Ṯmijja nsen ḏ anḍeȓ inurzmen,
iȓes nsen ixeddƹen.
Ssem n ifiɣeran iteffeɣ-d zeg iyencicen nsen,
14 nnaƹȓeṯ ḏ ṯarzugi iccur zzaysen uqemmum nsen.
15 Tqelliqen s iḍaren nsen aḏ sizzȓen iḏammen.a
16 Tejjan arrwina ḏ lʼazma mani ma ruḥen,
17 abriḏ n ȓehna war ṯ ssinen.
18 Ṯiggwḏi zi Arebbi war ɣarsen ṯeǧi jar ṯiṭṭawin nsen.
19 Fa neccin nessen belli marra min ḏayes ḏi ccariƹa n Musa tweṣṣa yinni ɣar ṯeǧa ccariƹa-ya ḥima uȓa ḏ ijjen war ɣares itiȓi lƹuder, u marra yinni iǧan ḏi ddunect aḏ iȓin swadday i lḥisab n Arebbi.
20 Falihaḏa, uȓa ḏ ij n bnaḏem war izemmar aḏ yiȓi nican akeḏ Arebbi s ȓexḏayem iy ḏayes ḏi ccariƹa. Innama, ccariƹa ṯesbeyyan-aneɣ-d min ṯeƹna ȓmuƹṣiyeṯ.
S lʼiman waḥḏes a niȓi nican ak Arebbi
21 Fa ȓexxu Arebbi iseḍhar-aneɣ-d mammec ɣa niȓi nican akiḏes bȓa ccariƹa. Manaya ṣaḥḥen-ṯ Lkutub n lʼanbiya ḏ ccariƹa n Musa niṯni s yixef nsen.
22-23 Iƹni, Arebbi itarra nican marra wig itamnen zi Ƹisa Lmasiḥ, war itferriq jar yiwḏan. Aqa marra ƹṣan Arebbi, twaḥarrmen zi lƹaḍama nnes.
24 Arebbi, itarra-ṯen netta nican s arḍa nnes baṭeȓ, s usenjam iy d yusin s Ƹisa Lmasiḥ.
25 Arebbi iqeddem-iṯ ḏ lfidyab ḥima aḏ twaɣfarent ȓmuƹṣiyaṯ s iḏammen nnes, iƹni i yinni iqebbȓen manayenni s lʼiman nsen. S manayenni iseḍhar-d Arebbi ȓḥaqq nnes. Netta tuɣa iṣebbar war t yuwi bu ḏi ȓmuƹṣiyaṯ iy iƹḏun,
26 ḥima aḏ d iseḍhar ḏi zman-a ȓḥaqq nnes. Liʼanna Arebbi netta nican ig iǧa, itarra netta nican wenni ɣa yamnen zi Ƹisa.
27 Iwa ma a neftaxer s can ȓḥajeṯ? Lla, memnuƹ! Ma memnuƹ s ccariƹa, iƹni s lḥasanaṯ? Lla, memnuƹ s lʼiman!
28 Maɣar? Ȓaḥeqqac neccin ɣarneɣ belli bnaḏem itarra-ṯ Arebbi nican s lʼiman nnes, bȓa lḥasanaṯ n ccariƹa.
29 Iwa Arebbi, ma netta ḏ Arebbi n Ayṯ-Israʼil waha? Lla! Ma war iǧi uȓa ḏ Arebbi n yiwḏan war iǧin zi Ayṯ-Israʼil? Wah, ḏ Arebbi nsen ȓa ḏ niṯni.
30 Liʼanna Arebbi netta ḏ ijjen. Ḏ netta ig itarran nican Ayṯ-Israʼil s lʼiman, ḏ yinni war iǧin zi Ayṯ-Israʼil s nnefs lʼiman.
31 Iḏen, ma a nesbeṭṭeȓ ccariƹa s lʼiman-a? Ƹemmarṣ! Lƹaks, neccin netḥama ccariƹa.