Siḏna Brahim ḏ lʼiman nnes
4
1 Iwa min ɣa nini x jeddiṯneɣ Brahim? Min ḏas iweqƹen i netta?
2 Maƹlik netta iy ṯ yarra Arebbi nican ƹlaḥsab ȓexḏayem nnes,a iȓi Brahim ɣares ȓḥaqq iy zi ɣa iftaxer zeg yixef nnes, walakin zzaṯ i Arebbi lla.
3 Min iqqar Lkitab?
Uca yumen Brahim zi Arebbi,
ikkar Arebbi iḥseb-iṯ nican s lʼiman nni.
4 Fa wenni ɣa iggen can ȓxeḏmeṯ, isḏaheǧ netta axas itwaxeǧes, niɣ lla? Wah, manaya ḏ texȓiseṯ nnes maci ḏ kadu.
5 Wenni war itwekkiȓenb x ȓexḏayem ig itegg, iƹni netta itwekkiȓ x Arebbi itarran lƹaṣi aȓ ubriḏ, wanita iḥseb-iṯ Arebbi nican s lʼiman nnes.
6 Nnabi Dawed uȓa ḏ netta, issawaȓ x ssaƹḏ n bnaḏem wami ṯ iḥseb Arebbi nican bȓa ȓexḏayem. Iqqar:
7 Ssaƹḏ n yinni umi twaɣfarent ssayyiʼaṯ nsen,
twamḥant ȓmuƹṣiyaṯ nsen.
8 Ssaƹḏ n wenni war itḥisib Siḏi Arebbi
x ȓmuƹṣiyaṯ nnes.
9 U ssaƹḏ-a, ma n yinni iggin ṭṭahareṯ waḥeḏsen, niɣ uȓa n yinni war iggin ca ṭṭahareṯ? Cuf, neccin neqqar: "Arebbi iḥseb Brahim nican s lʼiman nnes."
10 Meȓmi iy ṯ iḥseb nican? Ma qbeȓ ma aḏ igg ṭṭahareṯ niɣ menbaƹd wami iy t igga? Lla, maci menbaƹd i ṭṭahareṯ nnes, walakin qbeȓ.
11 Ṯumma ṭṭahareṯ-a ṯusa-yas-d ḏ ij n lƹalama, ḏ ij n ddalil iseḍharen belli Arebbi iḥseb-iṯ nican s lʼiman nnes iy tuɣa ɣares qbeȓ ma aḏ iṭehhar. Maɣar manaya? Iƹni bac Brahim aḏ yiȓi ḏ jeddiṯsen n yinni marra itamnen waxxa war iggin ca ṭṭahareṯ, bac uȓa ḏ yinni aṯen iḥseb Arebbi nican.
12 U netta ḏ jeddiṯsen ƹaweḏ uȓa n yinni iggin ṭṭahareṯ, walakin maci ggin ṭṭahareṯ u ṣafi. Lla, itxeṣṣa-yasen aḏ ḏeffaren ȓaṯar n lʼiman mamc tuɣa ɣares ɣar jeddiṯneɣ Brahim wami tuɣa ƹaḏ war iggi bu ṭṭahareṯ.
Arebbi iwƹeḏ Siḏna Brahim aɣares yiȓi mmis
13 Ȓƹaheḏ iy zi iwƹeḏ Arebbi Brahim ḏ ddurriṯ nnes ḥima netta aḏ iwareṯ ddunect, ȓƹaheḏ nni war d yusi ca s ccariƹa, yusa-d s lʼiman ig itarran iwḏan nican.
14 Maƹlik aḏ warṯen yinni iḏeffaren ccariƹa, ataf lʼiman-a walu, ataf ȓƹaheḏ-a ixwa.
15 Aqa ccariƹa n Musa tawi-d lƹiqab n Arebbi. Walakin mani war tiȓi ccariƹa war tiȓi ca ḏinni ȓmuƹṣiyeṯ.
16 S manayenni ȓƹaheḏ-a ibna x lʼiman waḥḏes. Ḥima ȓƹaheḏ aḏ d yas zi arḍa nnes, aṯ iḍmen Arebbi i marra ddurriṯ n Brahim. U maci ɣir wenni iḏeffaren ccariƹa n Musa, walakin uȓa ḏ wenni icarrcen lʼiman n Brahim. Netta ḏ jeddiṯneɣ n marra iḏneɣ.
17 Mammec iqqar Lkitab: "Arriɣ-cek ḏ jeddiṯsen i waṭṭas n ȓegnus."
Ḏin Brahim zzaṯ i Arebbi mig itamen, iƹni wenni d isnekkaren yinni immuṯen, iƹni wenni d ixeȓqen min ƹemmarṣ war iǧin.
18 Waxxa war ḏinni bu lʼamal qaƹ, yumen Brahim igga lʼamal. Amenni iy iḏweȓ ḏ jeddiṯsen i waṭṭas n ȓegnus mammec ḏas itwanna: "Min iǧan ḏ iṯȓan ḏeg ujenna amenni iy ɣa ṯiȓi ddurriṯ nnec."
19 Ṯumma lʼiman nnes war inqiṣ ca waxxa ɣares ƹȓayen miyya iseggwusa, waxxa issen ixef nnes war izemmar ca, ṯamɣarṯ nnes Sara war tirew ca.
20 Waxxa amenni war inqiṣ ca lʼiman nnes, war itcekki ca ḏi ȓƹaheḏ ḏas yuca Arebbi. Walakin itemɣur ḏi lʼiman nnes iḥemmeḏ Arebbi,
21 netta aqaṯ metʼakked aṭṭas belli Arebbi izemmar aḏ ikemmeȓ x ȓƹaheḏ nnes.
22 S manaya iḥseb-iṯ Arebbi nican.