Ȓefraḥeṯ ḏ ȓehna ak Arebbi
5
1 Iḏen fa wami ḏaneɣ yarra Arebbi nican s lʼiman nneɣ, aqaneɣ ḏi ȓehna akeḏ Arebbi x ufus n Siḏna Ƹisa Lmasiḥ.
2 Netta zzayes iy nufa abriḏ s lʼiman ɣar arḍa iy ḏi neǧa ȓexxu. Nfarreḥ ḏi lʼamal n lƹaḍama n Arebbi.
3 War iǧi ɣir manaya waha, nfarreḥ neccin uȓa ḏi ȓemḥayen. Nessen belli ȓemḥayen tarwent ṣbar.
4 Ṣbar itarew ḏayneɣ minzi ɣa neɣȓeb x ȓemḥayen. S ȓeɣȓab nni x ȓemḥayen itarew ḏayneɣ lʼamal.
5 Lʼamal war ḏaneɣ itxeyyib ca. Maɣar? Liʼanna Arebbi yuca-aneɣ Arruḥ iqeddsen, zzayes iccur uȓawen nneɣ s ȓemḥibbeṯ nnes.
6 Fa ḏi ȓweqṯ nni nican ṯenni ig ixḍar Arebbi, neccin tuɣa war ɣarneɣ bu jjehḏ immuṯ Lmasiḥ ƹlaḥsab nneɣ wami neƹṣa.
7 Muḥaȓ aḏ iqbeȓ can ijjen aḏ immeṯ ƹlaḥsab n yij n bnaḏem nneɣnit ḏ aṣebḥan waha. Meȓa bnaḏem iǧa ḏ aṣebḥan aṭṭas, imken izemmar can ijjen aḏ iqbeȓ aḏ immeṯ ƹlaḥsab nnes.
8 Walakin neccin tuɣaneɣ ƹaḏ nƹeṣṣa Arebbi wami immuṯ Lmasiḥ ƹlaḥsab nneɣ. S manayenni isbeyyen-aneɣ-d Arebbi mecḥaȓ ḏaneɣ itxes.
9 Iḏen, yarra-aneɣ-d Arebbi ȓexxu nican s iḏammena n Lmasiḥ, u labud zzayes iy ɣa nenjem zeg uɣḍab n Arebbi.
10 Neccin nmeṣȓaḥ akeḏ Arebbi s ȓmewṯ n Mmis wami neccin tuɣaneɣ ƹaḏ ḏ ȓƹadyan nnes. Ȓexxu wami kiḏes nmeṣȓaḥ, labud zzayes iy ɣa nenjem s ṯuḏarṯ nnes!
11 War iǧi ɣir manaya waha, neccin nfarreḥ zi Arebbi s Siḏna Ƹisa Lmasiḥ wenni iy ḏaneɣ isemṣȓaḥen akiḏes.
Ȓfarq jar siḏna Adam ḏ Siḏna Ƹisa
12 Iḏen ṯban-d ȓmuƹṣiyeṯ ɣar ddunect s yij n bnaḏem, iƹni Adam. S ȓmuƹṣiyeṯ nni iy teǧa ȓmewṯ. Ssenni ṯenfreq ȓmewṯ x yiwḏan marra liʼanna niṯni marra ƹṣan.
13 Aqa ȓmuƹṣiyeṯ tuɣa teǧa ḏi ddunect qbeȓ iy d ɣa ṯas ccariƹa. Walakin mani war ṯuwiḍ ccariƹa, Arebbi war itḥisib ḏin bu ȓmuƹṣiyeṯ.
14 Innama zi zman n Adam aȓ zman n Musa ṯeḥkem ȓmewṯ x yiwḏan uȓa x yinni war iƹṣin ca amecnaw ȓmuƹṣiyeṯ n Adam, u netta ḏ ȓmiṯal n bnaḏem iy d ɣa yasen.
15 Walakin ȓmuƹṣiyeṯ n Adam war nzemmar at nmeṯṯel akeḏ lhadiya n arḍa n Arebbi. Cuf, ij n bnaḏem, iƹni ḏ Adam, iƹṣa Arebbi yuwi-d ȓmewṯ i marra yiwḏan. Ȓexxu mecḥaȓ imɣer arḍa n Arebbi ḏ lhadiya iy d infeyyḍen i yiwḏan s arḍa n yij n bnaḏem nneɣnit, netta ḏ Ƹisa Lmasiḥ.
16 Cuf ƹaweḏ, lhadiya n Arebbi maci amecnaw min iweqƹen x ssabab n ȓmuƹṣiyeṯ igga bnaḏem nni Adam. Liʼanna ȓḥukem iy d ṯuwi ij n ȓmuƹṣiyeṯ netta ḏ lḥisab ḏ lƹiqab. Walakin Arebbi s lhadiya-ya yarra bnaḏem nican menbaƹd i waṭṭas n ȓmuƹṣiyaṯ.
17 Iƹni, x ssabab n ȓmuƹṣiyeṯ nni n yij n bnaḏem ṯebḏa ȓmewṯ ṯḥekkem x yiwḏan s bnaḏem nni. Ȓexxu x ssabab n yij n bnaḏem, iƹni s Ƹisa Lmasiḥ, ḏ ṯuḏarṯ nettaṯ ṯḥekkem aṭṭas x yinni iqebbȓen arḍa imɣaren n Arebbi ḏ lhadiya iy ṯen itarran nican.
18 Iḏen ij n ȓmuƹṣiyeṯ ig igga ij n bnaḏem ṯuwi-d lḥisab ḏ lƹiqab i marra iwḏan. Amenni ij n baraʼab ig igga ij n bnaḏem yuwi-d ṣṣulḥ ḏ ṯuḏarṯ i marra iwḏan.
19 Liʼanna mammec iƹṣa Adam Arebbi yuwi-d ȓmuƹṣiyeṯ ɣar waṭṭas n yiwḏan, amenni iṭaƹ Ƹisa i Arebbi meṣȓaḥen aṭṭas n yiwḏan ak Arebbi.
20 U ccariƹa nettaṯ ṯuḏef-d ḥima aḏ kṯarent ȓmuƹṣiyaṯ. Walakin cḥaȓ ma kṯarent ȓmuƹṣiyaṯ, ikṯar arḍa n Arebbi ktar zzaysent.
21 U mammec ṯeḥkem ȓmuƹṣiyeṯ ṯuwi-d ȓmewṯ, amenni iḥkem arḍa iƹni wami ḏaneɣ yarra Arebbi nican akiḏes yuwi-d ṯuḏarṯ n ȓebda x ufus n Siḏna Ƹisa Lmasiḥ.