Netmetta s ȓmuƹṣiyeṯ, nteddar s Lmasiḥ
6
1 Iwa min ɣa nini? Ma a nsiɣi ḏi ȓmuƹṣiyaṯ ḥima aḏ ikṯar arḍa n Arebbi?
2 Lla, ƹemmarṣ! Neccin nemmuṯ-as i ȓmuƹṣiyeṯ,a ixeṣṣa-yaneɣ ȓexxu war netsiɣi ca a nƹic ḏaysent.
3 Ma war tessinem kenniw? Neccin, wami nṭehhar s waman ḥima a niȓi ḏ ijjen ak Lmasiḥ, iƹni nṭehhar akiḏes ḥima a ncarec ḏi ȓmewṯ nnes.
4 Falihaḏa wami nṭehhar akiḏes s waman, iƹni netwanḍeȓ akiḏes ḏi ȓmewṯ. Maɣar? Ḥima mammec d ikkar Lmasiḥ zi ȓmewṯ s lƹaḍama n Arebbi Babaṯneɣ, amenni uȓa ḏ neccin aqa a nƹic ḏeg yij n ṯuḏarṯ ḏ jḏiḏ.
5 Cuf, meȓa ncarec akiḏes ḏeg yij n ȓmewṯ am ṯenni iy igga netta, amenni iy kiḏes ɣa ncarec ƹaweḏ ḏeg yij n lqiyama am ṯenni iy igga netta.
6 Neccin nessen belli nnefs nneɣ tuɣat ṯeǧa qbeȓ, nettaṯ iƹni, twaṣelleb akeḏ Lmasiḥ ḥima aḏ tbeṭṭeȓ nnefs nneɣ iccuren s ȓmuƹṣiyaṯ, bac ssa aȓ ṯsawent war netɣimi ƹaḏ ḏ isemɣanb n ȓmuƹṣiyeṯ.
7 Aqa wenni immuṯen ihna zi ȓmuƹṣiyeṯ.
8 Fa meȓa nemmuṯ neccin akeḏ Lmasiḥ, ntamen ƹaweḏ akiḏes neddar.
9 Neccin nessen qa Lmasiḥ ikkar-d zi ȓmewṯ, ƹemmarṣ aḏ immeṯ ƹaweḏ. Ȓmewṯ war tɣimi axas ṯḥekkem.
10 Liʼanna wami immuṯ, immuṯ ij n ṯwaȓa waha i ȓebda i min iǧan ḏ ȓmuƹṣiyeṯ. Ṯuḏarṯ nnes iy iddar ȓexxu, iddar-it i Arebbi.
11 Ammu labud aḏ tḥessbem ixef nwem kenniw ṯemmuṯem-as i ȓmuƹṣiyeṯ, walakin ṯeddarem i Arebbi s Ƹisa Lmasiḥ.
12 Falihaḏa ixeṣṣa war tejjim ca ȓmuƹṣiyeṯ aḏ teḥkem x ddat nwem iy ɣa ifnan ḥima war teggem array i ccehweṯ nnes.
13 War tqeddameṯ uȓa ḏ ij n ṭṭarf zi ddat nwem i ȓmuƹṣiyeṯ aḏ tegg ccerr s ddat nwem. Qeddmeṯ ixef nwem i Arebbi am yiwḏan zaƹma iy d ikkaren zeg imettinen ɣar ṯuḏarṯ. Qeddmeṯ kuȓ ṭṭarf zi ddat nwem ḥima azzayes itwagg min iǧan nican.
14 Aqa ȓmuƹṣiyeṯ war tɣimi ca aḏ teḥkem xawem liʼanna war ṯeǧim ca swadday i ufus n ccariƹa, kenniw ṯeǧam swadday i arḍa n Arebbi.
Min iǧan nican, neccin ḏ lƹibad nnes
15 Iwa ma neccin a neƹṣa Arebbi wami aqaneɣ swadday i arḍa nnes, war neǧi bu swadday i ufus n ccariƹa? Lla, ƹemmarṣ!
16 Ma war ṯessinem? Meȓa ṯsellmem ixef nwem i ca ḥadd ṯḏewȓem ḏ isemɣan, ṯṭaƹam-as, ataf aḏ tiȓim ḏ isemɣan i wenni umi ṯṭaƹam. Imma aḏ tṭaƹem i ȓmuƹṣiyeṯ itawin ɣar ȓmewṯ, niɣ aḏ tṭaƹem i wenni iy kenniw ɣa yarren nican.
17-18 Walakin a neḥmeḏ Arebbi! Waxxa ṯṭaƹem ȓmuƹṣiyeṯ qbeȓ, ȓexxu kenniw ṯṭaƹam s wuȓ nwem s ṯɣuri nni iy ḏawem siwḍen. Ṯehnam zi ȓmuƹṣiyeṯ, ṯḏewȓem ḏ isemɣan i min iǧan nican.
19 Nec ssawaȓeɣ akiḏwem s wawaȓen ƹadi liʼanna iqseḥ x bnaḏem aḏ ifhem manaya. Qbeȓ tuɣa tqeddamem kuȓ ṭṭarf zi ddat nwem azzayes itwagg lfasad ḏ ccerr itemɣuren. Maca ȓexxu qeddmeṯ ddat nwem aḏ texḏem min iǧan nican ḥima aḏ tiȓim ṯeṣfam.
20 Cuf, wami tuɣa ṯṭaƹam i ȓmuƹṣiyeṯ, tuɣa ɣarwem lḥurriya aḏ trezzum war teggem min iǧan nican.
21 Ḏi ȓweqṯ nni, ṯimesȓayin nni ma ḏaysent can nfaƹ minzi ȓexxu tseḏḥam? Walu, liʼanna ṯimesȓayin nni neddhent ɣar ȓmewṯ.
22 Ȓexxu ṯehnam zi ȓmuƹṣiyeṯ, ṯṭaƹam i Arebbi. Man nfaƹ iy zzayes ɣa ṯawim? Iƹni aḏ tiȓim ṯeṣfam u manayenni ineddeh ɣar tuḏarṯ n ȓebda.
23 Aqa axeǧes n ȓmuƹṣiyeṯ netta ḏ ȓmewṯ, walakin lhadiya n Arebbi nettaṯ ḏ ṯuḏarṯ n ȓebda ḏi Siḏna Ƹisa Lmasiḥ.