Netwafekk zi ccariƹa
7
1 Ay ayṯma, ssawaȓeɣ akiḏwem ṯessnem ccariƹa. Ma war ṯessinem belli ccariƹa ṯḥekkem x bnaḏem iy iddaren waha?
2 Maṯalan ḏi ccariƹa, ṯamɣarṯ imeȓcen aryaz nnes ƹaḏ iddar, aqat x yiri nnes. Meȓa immuṯ aqa twafekk zi lqanun nni.
3 S manaya, meȓa ṯruḥ ɣar can yijjen nneɣnit, aryaz nnes aqaṯ ƹaḏ iddar, nettaṯ twaḥsab ṯezna. Walakin meȓa immuṯ uryaz nnes, ataf twafekk zi lqanun nni. Ȓxeddnnit meȓa ṯemȓec ak ca uryaz nneɣnit war tiȓi bu ṯezna.
4 Ay ayṯma, amenni iy ṯeǧam uȓa ḏ kenniw. Iƹni twafekkem zi ccariƹa n Musa wami ṯemmuṯ ddat n Lmasiḥ, aqawem x yiri n yijjen nneḍnit netta ḏ yiri n Lmasiḥ iy d ikkaren zi ȓmewṯ, ḥima a narew ȓexḏayem ṣebḥant i Arebbi.
5 Liʼanna qbeȓ wami tuɣa ntegg array i nnefs nneɣ, rnint ccehwaṯ nneɣ ṯiƹeffanin ƹlaḥsab min ḏaneɣ ṯenna ccariƹa-ya, xeddment ccehwaṯ nni ḏi ddat nneɣ uca ntarew ȓexḏayem itawin ɣar ȓmewṯ.
6 Walakin ȓexxu neccin netwafekk zi ccariƹa-ya iy ḏaneɣ iqqnen, nemmuṯ-as i manayenni. Neccin nƹebbeḏ s yij n ubriḏ ḏ jḏiḏ n Arruḥ n Arebbi, war iǧi bu s nniḍam nni aqḏim iy yurin ḏi Lkitab.
Ȓmuƹṣiyeṯ ṯseḍhar-it-iḏ ccariƹa
7 Iwa min ɣa nini? Ma ccariƹa n Musa s yixef nnes nettaṯ ḏ ij n ȓmuƹṣiyeṯ? Lla ƹemmarṣ! Maƹlik ccariƹa war ṯeǧi, ataf war ssineɣ min ṯeƹna ȓmuƹṣiyeṯ. Maƹlik war ḏayes ȓuṣiyeṯ nni <War ƹecceq>, ataf war ssineɣ min iƹna uƹeccaq.
8 Ṯumma ȓmuƹṣiyeṯ ṯufa lfurṣa ḏi ȓuṣiyeṯ-a, ṯerni ḏayi zi kuȓ nnuƹ n uƹeccaq iy iǧan liʼanna bȓa ccariƹa ȓmuƹṣiyeṯ axmi ṯemmuṯ.
9 Nec qbeȓ ma aḏ ssneɣ ccariƹa, tuɣayi ddareɣ. Maca wami d ṯusa ȓuṣiyeṯ n Arebbi, ȓmuƹṣiyeṯ amecnaw ṯekkar-d zi ȓmewṯ uca nec axmi mmuṯeɣ.
10 Ṯumma ufiɣ ȓuṣiyeṯ nni iy d yusin bac aḏayi ṯuc ṯuḏarṯ, ṯuwi-yayi nec ɣar ȓmewṯ.
11 Liʼanna ȓmuƹṣiyeṯ ṯufa lfurṣa ḏi ȓuṣiyeṯ ṯecmeṯ-ayi u zzayes zi ȓuṣiyeṯ-a ṯneɣ-ayi.
12 X manaya ccariƹa n Musa ṯeṣfa, ȓuṣiyeṯ n Arebbi ṯeṣfa, ṯeṣȓaḥ, ṯeṣbaḥ.
Ḏi nnefs n bnaḏem ij umenɣi
13 Iwa, ma iḏweȓ min iṣebḥan ḏ ssabab iy zi ɣa mmṯeɣ nec? Lla, ƹemmarṣ! Lƹaks, ḏ ȓmuƹṣiyeṯ iy iggin manayenni, ṯesxeddam min iṣebḥan bac aḏayi ṯneɣ. Maɣar? Ḥima aḏ tseḍhar ixef nnes nettaṯ ḏ ȓmuƹṣiyeṯ. Ṯumma s lfurṣa n ȓuṣiyeṯ-a ȓmuƹṣiyeṯ ṯseḍhar-d bȓa ȓaḥedd mecḥaȓ iqbeḥ ccerr nnes.
14 Fa neccin nessen belli ccariƹa n Musa nettaṯ zi Arebbi, walakin nec ḏ bnaḏem, twammenzeɣ i ȓmuƹṣiyeṯ.
15 War sent tfehhmeɣ i ȓexḏayem inu liʼanna nec war teggeɣ min xseɣ aṯ ggeɣ. Lƹaks teggeɣ min tƹiffiɣ.
16 U xmi teggeɣ min war texseɣ, tiȓi wafqeɣ belli ccariƹa n Musa ṯeṣbaḥ.
17 Ṯumma zi ssa aȓ ṯsawent maci ḏ nec iteggen manaya, nettaṯ ḏ ȓmuƹṣiyeṯ nni iy ḏayi izeddɣen.
18 Ddat inu nec ssneɣ war ḏayes ṯezḏiɣ uȓa ḏ ij n ṯmesȓayṯ ṯaṣebḥant. Liʼanna rezzuɣ aḏ ggeɣ ṯimesȓayin ṯiṣebḥanin, walakin war zemmareɣ aṯent ggeɣ.
19 Ṯimesȓayin ṯiṣebḥanin iy texseɣ aṯent ggeɣ walakin war ṯent teggeɣ. Lƹaks, ccerr nni iy war texseɣ aṯ ggeɣ teggeɣ-ṯ.
20 Meȓa teggeɣ min war texseɣ, nettat ḏ ȓmuƹṣiyeṯ nni iy ḏayi izeddɣen iteggen manayenni, war iǧi bu ḏ nec.
21 Falihaḏa nec ufiɣ ḏeg yixef inu ij n ṭṭabiƹa, iƹni, xmi texseɣ aḏ ggeɣ can ṯmesȓayṯ ḏ ṯaṣebḥant, ataf ḏinni ccerr yuḏes.
22 Liʼanna ḏi nnefs inu nec farḥeɣ s ccariƹa n Arebbi,
23 walakin nec tafeɣ ij n ṭṭabiƹa nneɣnit ḏeg yixef inu ig itmenɣan akeḏ min ɣari ḏi ȓaƹqeȓ inu. Ṭṭabiƹa-ya teqqen-ayi s ȓmuƹṣiyeṯ nni iy ḏayi izeddɣen ḏeg yixef inu.
24 Ya ȓefḍiḥeṯ inu nec! Wi ḏayi ɣa isnejmen nec zi ddat-a ṯanita n ȓmewṯ?
25 Tcekkareɣ Arebbi s yisem n Siḏna Ƹisa Lmasiḥ!
S manaya nec ḏi ȓaƹqeȓ inu ḏ ismeɣa n ccariƹa n Arebbi, walakin ḏi ddat inu nec ḏ ismeɣ n ṭṭabiƹa n ȓmuƹṣiyeṯ.