Jjehḏ n Arruḥ n Arebbi ixeddmen ḏi ṯuḏarṯ n ȓmuminin
8
1 Iḏen fa ȓexxu, war itiȓi bu lḥisab ḏ lƹiqab x yinni iǧan ḏ ijjen ak Ƹisa Lmasiḥ.
2 Liʼanna ḏi Ƹisa Lmasiḥ, ṭṭabiƹa n Arruḥ iticcen ṯuḏarṯ ṯfekk-icek-d zi ṭṭabiƹa nni n ȓmuƹṣiyeṯ ḏ ȓmewṯ.
3 Cuf, igga Arebbi min war ṯzemmar aḏ tegg ccariƹa n Musa. Mayemmi? Ƹlaḥsab ḍḍuƹef n ddat nneɣ iy ḏas ikksen jjehḏ i ccariƹa. Arebbi, wami iy d issekk Mmis imeṯṯel-iṯ-iḏ am ddat n bnaḏem iƹṣan, issekk-iṯ-id ḏ lfidya x ȓmuƹṣiyeṯ nneɣ. Ammu iḥaseb iƹeqqeb ȓmuƹṣiyeṯ ig iǧan ḏi ddat n bnaḏem
4 bac aḏ itwakemmeȓ min zzayneɣ ṯxes ccariƹa n Musa. Neccin, iƹni ḏ yinni ig igguren ḏeg ubriḏ n Arruḥ, war ntegg array i nnefs nneɣ.
5 Cuf, yinni itƹicen ƹlaḥsab nnefs nsen iƹni xeddmen ȓxaḍar nsen ḏi ṯmesȓayin n nnefs nsen. Walakin yinni itƹicen ƹlaḥsab abriḏ n Arruḥ iƹni xeddmen ȓxaḍar nsen ḏi ṯmesȓayin n Arruḥ.
6 Aqa yinni xeddmen ȓxaḍar nsen ḏi ṯmesȓayin n nnefs nsen ataf aḏ mmṯen. Walakin yinni ixeddmen ȓxaḍar nsen ḏi ṯmesȓayin n Arruḥ ataf aḏ ddaren, aɣarsen yiȓi ȓehna.
7 Aqa ȓxaḍar ixeddmen ḏi ṯmesȓayin n nnefs netta itƹerraḍ Arebbi. War iṭṭiƹi ca i ccariƹa n Arebbi, u ḏ ṣṣaḥ war izemmar ca.
8 U yinni itṭaƹan nnefs nsen war zemmaren ca aḏ sarḍan Arebbi.
9 Amma kenniw, meȓa izeddeɣ ḏaywem Arruḥ n Arebbi, ataf aḏ tƹicem x ubriḏ n Arruḥ war teggem array i nnefs nwem. U wenni war ɣar iǧi Arruḥ n Lmasiḥ, war iǧi ca zi Lmasiḥ.
10 Ṯumma meȓa Lmasiḥ aqaṯ ḏaywem, waxxa ddat nwem ṯemmuṯ x ssabab n ȓmuƹṣiyeṯ, arruḥ nwem iddar liʼanna Arebbi yarri-kenniw nican.
11 Ṯumma meȓa izeddeɣ ḏaywem Arruḥ n Arebbi iy d isekkaren Ƹisa zi ȓmewṯ, ataf wenni iy d isekkaren Ƹisa zi ȓmewṯ aḏ yarr ṯuḏarṯ uȓa ḏi ddat nwem ifennan iƹni s Arruḥ nnes iy ḏaywem izeddɣen.
12 X manayenni ay ayṯma, ixeṣṣa-yaneɣ a negg lwajib, walakin maci ḥima a negg array i nnefs nneɣ.
13 Liʼanna meȓa kenniw teggem array i nnefs nwem, aḏ temmṯem. Meȓa ṯneqqem ȓefƹayer n ddat nwem s Arruḥ n Arebbi, aḏ teddarem.
14 U yinni iḏeffaren Arruḥ n Arebbi, ḏ yinni iǧan ḏ ṯarwa n Arebbi.
15 Liʼanna Arruḥ iy ḏawem immucen war kenniw itarri ca ḏ isemɣan ḥima aḏ tƹicem ƹaweḏ ḏi ṯiggwḏi. Lla, immuc-awem Arruḥ iqeddsen ḥima aḏ tiȓim ḏ ṯarwa n Arebbi. Zzayes zi Arruḥ nni iy ɣa nȓaɣa: Abba, iƹni, a Baba inu.
16 Iƹni Arruḥ n Arebbi s yixef nnes ig iṣaḥḥen ḏi arruḥ nneɣ belli neccin ḏ ṯarwa n Arebbi.
17 U neccin meȓa aqaneɣ ḏ ṯarwa n Arebbi, ataf a nwareṯ. Iƹni a nwareṯ zi Arebbi, a nwareṯ ak Lmasiḥ. Walakin ixeṣṣa-yaneɣ a ncarec akiḏes ḏeg uƹeddeb nnes ḥima a ncarec akiḏes ƹaweḏ ḏi lƹaḍama nnes.
Lƹaḍama iy ḏaneɣ itrajan
18 Cuf, twaȓiɣ nec belli aƹeddeb iy xaneɣ itekken ḏi ddunect-a netta war iǧi ḏ walu bac aḏ imeṯṯel ak lƹaḍama iy ḏaneɣ ɣa itwaḍharen.
19 Aqa marra min d itwaxeȓqen ḏaysen mezȓia ḏ ameqqran aḏ ẓren ṯsaƹat nni iy ḏi d ɣa banen ṯarwa n Arebbi.
20 Liʼanna marra min d itwaxeȓqen ṣaben s lfacal. Maci s array nsen, walakin s array n wenni iy ṯen iṣaben. U manayenni ḏi lʼamal.
21 Lʼamal, iƹni, belli marra min d itwaxeȓqen aḏ twafekken zi lfana n ȓmewṯ, aḏ carcen ḏi lḥurriya n lƹaḍama iy ɣarsen ɣar ṯarwa n Arebbi.
22 Cuf, neccin nessen belli marra min d itwaxeȓqen aqaṯen aȓ nhara ƹaḏ tnezbaren amecnaw ṯamɣarṯ xmi ḏayes ȓeḥriq n ṯarwa.
23 U maci ɣir niṯni, uȓa ḏ neccin umi immuc Arruḥ iqeddsen ḏ amezwaru nnehhek ḏeg yixef nneɣ. Ḏayneɣ mezȓi u netraja zi Arebbi aḏ d isbeyyen belli neccin ḏ ṯarwa nnes, iƹni aḏ ifekk ddat nneɣ.
24 Aqa ḏi mezȓi-ya neccin nenjem. Cuf, meȓa ṣafi nufa mezȓi nni iy nrezzu, ataf war ḏayneɣ bu mezȓi ƹaḏ. Ma a nȓaja mezȓi nni meȓa ṣafi nufi-ṯ?
25 Walakin meȓa ƹaḏ war nufi ca mezȓi nni, ataf aṯ nȓaja s ṣbar.
26 Fa ammu Arruḥ iqeddsen itƹawan-aneɣ ḏi ḍḍuƹef nneɣ liʼanna neccin war nessin ca mliḥ minxef ɣa neẓẓaǧ. Walakin Arruḥ iqeddsen s yixef nnes itṭalab i Arebbi x ssabab nneɣ, itṭalab-as s unhak war itsemiƹen.
27 Ṯumma Arebbi wenni itwaȓan min iǧan ḏeg wuȓ n bnaḏem, netta itessen min itxes Arruḥ iqeddsen. Liʼanna Arruḥ ƹlaḥsab ȓxaḍar n Arebbi itṭalab x ssabab n ȓmuminin ṣaliḥin.
28 Fa neccin nessen belli marra min itewqiƹen qaƹ, itarra-ṯ Arebbi ḏ ttisir i yinni iy ṯ itexsen, yinni umi d iȓaɣa ƹlaḥsab lɣaraḍ nnes.
29 Liʼanna yinni iy tuɣa issen-iṯen zi qbeȓ, izemmem-iṯen zi qbeȓ ḥima aḏ iȓin x ṣṣifeṯ n Mmis aḏ iȓin am netta. Ammu aḏ yiȓi netta ḏ mmis amenzub n waṭṭas n ayṯmas.
30 Ṯumma yinni iy tuɣa izemmem zi qbeȓ, iȓaɣa-d xasen. Ṯumma yinni umi d iȓaɣa, isemṣȓaḥ-iṯen akiḏes. Ṯumma yinni iy kis isemṣȓaḥ, yuca-asen amcan ḏi lƹaḍama nnes.
Ȓemḥibbeṯ n Arebbi ḏi Lmasiḥ
31 Iwa, min ɣa nini menbaƹd i marra manaya? Meȓa Arebbi aqaṯ akiḏneɣ, uw izemmaren aḏ yiȓi ḍed nneɣ?
32 Siḏi Arebbi war isƹizz ca Mmis xaneɣ, iqeddem-iṯ i ȓmewṯ x neccin marra. Ma aḏ teqqim can ȓḥajeṯ war ḏaneɣ-t iticc akiḏes?
33 Wi izemmaren aḏ itahem yinni iy ixḍar Arebbi? Uȓa ḏ ijjen! Arebbi netta s yixef nnes ig itarran iwḏan nican.
34 Wi izemmaren axasen iḥkem? Uȓa ḏ ijjen! Liʼanna Ƹisa Lmasiḥ ḏ netta ig immuṯen. U ktar, ikkar-d zi ȓmewṯ u ḏ netta iy iǧan x ufusi n Arebbi, ḏ netta iy itcafaƹen ḏayneɣ.
35 Wi ḏaneɣ ɣa iƹezȓen x ȓemḥibbeṯ n Lmasiḥ? Uȓa ḏ ijjen! Ȓa ḏ azeyyar, ȓa ḏ tamara, ȓa ḏ aƹeddeb, ȓa ḏ buheyyuf, ȓa ḏ ṯuƹaryant, ȓa ḏ lxaṭar, uȓa ḏ ssif.
36 Mammec iqqar Lkitab:
X ssabab nnec cek netwahjah ȓmewṯ nhar ikmeȓ.
Netwaḥsab amecnaw iḥuȓiyen umi ɣa ɣarṣen.
37 Walakin ḏi marra manaya neccin ktar zi lʼabṭal x ufus n wenni iy ḏaneɣ ixsen.
38-39 Aqa nec metʼakked belli uȓa ḏ ij n ṯmesȓayṯ zi min d itwaxeȓqen war ṯzemmar aḏaneɣ ṯeƹzeȓ x ȓemḥibbeṯ n Arebbi iy d iseḍharen ḏi Siḏna Ƹisa Lmasiḥ: ȓa ḏ ȓmewṯ, ȓa ḏ ṯuḏarṯ, ȓa ḏ lmalaʼikaṯ, ȓa ḏ ccayaṭin, ȓa ḏ jnun, ȓa ḏ min iǧan ȓexxu, ȓa ḏ min d ɣa yasen, ȓa ḏ min yuƹȓan, ȓa ḏ min yuǧɣen, uȓa ḏ can nneɣnit.