Arrasul Bulus itxeyyaq x lʼumma n siḏna Musa
9
1 Ssawaȓeɣ ȓḥaqq ḏi Lmasiḥ war iǧi bu ḏ ixarriqen. Ȓaƹqeȓ inu u ḏ Arruḥ iqeddsen aḏayi ṣaḥḥen min ɣa iniɣ.
2-3 Iƹni, isḥerreq-ayi ij n ȓeḥriq aṭṭas ḏeg wuȓ inu war itkemmiȓ ca x ssabab n ȓqum inu, iƹni yinni iǧan zi lʼumma inu. Maƹlik nec zemmareɣ, aḏ twaneƹȓeɣ aḏ twaḥarrmeɣ zi Lmasiḥ bac war twaneƹƹȓen ca niṯni war twaḥarrimen ca zi Lmasiḥ.
4 Niṯni ḏ Ayṯ-Israʼil, itbenna-ṯen Siḏi Arebbi. Iseḍhar-asen-d lƹaḍama nnes, iƹaheḏ-iṯen, yuca-asen ccariƹa n Musa ḏ lƹibada, iwƹeḏ-iṯen.
5 Usin-d zi ssalaf ṣṣaliḥin, u zeg uẓwer nsen iy d yusa Lmasiḥ ḏ ddat ḏ bnaḏem. Arebbi itwaḥmeḏ i ȓebda, wenni iḥekkmen x marra. Amin.
6 Walakin, ma awaȓ n Arebbi war injiḥ ca? Lla, injeḥ! Fa maci Ayṯ-Israʼil qaƹ ig iǧan ḏ iʼisraʼiliyen ḏ ṣṣaḥ.
7 Ƹaweḏ war iǧi marra ṯarwa iy d ikkin zi Brahim ig iǧan ḏ ṯarwa nnes n ṣṣaḥ. Inna-as Arebbi: "Ḏ ṯarwa nnec iy d ɣa iffɣen zi mmic Isḥaq iy ɣa itwaḥesben."
8 Manaya ixes aḏ yini belli ṯarwa n Arebbi ḏ ṣṣaḥ twaḥessben zi ṯarwa n ȓƹaheḏ, maci zi ṯarwa n bnaḏem.
9 Liʼanna ȓƹaheḏ-a iy ḏas yuca Arebbi i Brahim ḏ wanita: "Aḏ d ƹeqbeɣ aseggwas iy d ɣa yasen ḏi ȓweqṯ-a, aḏ yiȓi ij uḥenjir ɣar Sara."
10 War iǧi bu manayenni waha. Rafiqa, nettaṯ ṯeysi aƹeddis ɣares acniwen. Babaṯsen netta ḏ jeddiṯneɣ Isḥaq.
11-12 Ṯumma ikkar Arebbi inna-as i Rafiqa qa ameqqran aḏ yiȓi ḏ axeddam ɣar umezyan. Iȓaɣa-yas-d Arebbi i netta waha, war ggin walu niṯni. Tuɣa ƹaḏ war d xȓiqen ca ƹaḏ war ggin ȓxir uȓa ḏ ccerr, walakin Siḏi Arebbi ixḍar ijjen zzaysen iseḍhar-d ȓxaḍar nnes iy ɣa yiȓin.
13 Mammec iqqar Lkitab: "Ḥibbeɣ Yaƹqub, seḥqareɣ Ƹasu."
14 Min ɣa nini x manaya? Ma Arebbi iḍeǧem? Lla, ƹemmarṣ!
15 Qa Arebbi inna-as i Musa: "Aḏ reḥmeɣ wenni xseɣ, aḏ ḥinneɣ x wenni xseɣ."
16 Manaya war iǧi ca zi ȓxeḏmeṯ n bnaḏem niɣ zi min itxes liʼanna aqaṯ ɣar Arebbi, wenni ireḥḥmen.
17 Aqa iqqar Lkitab i Firƹun: "Ggiɣ-c ḏ azeǧiḏ ḥima aḏayek d seḍhareɣ jjehḏ inu, aḏ itwassen yisem inu ḏi marra ddunect."
18 Falihaḏa Arebbi ireḥḥem wenni ixes, isɣannan wenni ixes.
Aɣḍab n Arebbi ḏ arraḥmeṯ nnes
19 Iwa, a bnaḏem, ma aḏayi ṯiniḏ, Mayemmi ƹaḏ iy ḏaneɣ itḥasab Arebbi? Ma aḏayi ṯiniḏ, Ug izemmaren aḏ imɣannen ak min ixes netta?
20 Cuf a bnaḏem, min ṯeƹniḏ cek bac aḏ tarreḏ awaȓ x Arebbi? Ma zemmaren aḏ inin iɣerrafen i wenni iy ṯen iṣenƹen, Mayemmi ḏaneɣ ṯeggiḏ ammu?
21 Ma war ɣares bu ȓḥaqq ɣar lemƹallem aḏ isexḏem ṯȓaxṯa mammec ixes, iƹni aḏ igg zeg ij n ȓƹajneṯ iḏeqqi ijjen n uɣerraf i min iṣebḥan unneɣnit i min iƹuffnen?
22 Amenni ig igga Arebbi. Wami ixes aḏ iseḍhar aɣḍab nnes aḏ isbeyyen jjehḏ iy ɣares, iṣebbar aṭṭas x yinni iy xef iɣḍeb, iƹni iɣerrafen nni wejḏen aḏ twarzen.
23-24 Igga amenni liʼanna ixes aḏ iseḍhar lƹaḍama nnes imɣaren x yina ig irḥem, iƹni iɣerrafen-a ig isewjeḏ zi qbeȓ i lƹaḍama, iƹni ḏ neccin. Iȓaɣa-yaneɣ-d i neccin iy d yusin zi Ayṯ-Israʼil uȓa ḏ yinni war iǧin zi Ayṯ-Israʼil.
25 Mammec iqqar Arebbi ḏi Lkitab n nnabi Hucaƹ:
Yinni tuɣa war iǧin ḏ ccaƹb inu,
asen ȓaɣiɣ a ccaƹb inu.
Ṯenni tuɣa war iƹizzen,
as ȓaɣiɣ a ṯaḥbibṯ inu.
26 U ḏeg umcan nni wenni mani ḏasen inna Arebbi:
Kenniw war ṯeǧim ḏ ccaƹb inu,
ḏinni iy ḏasen ɣa ȓaɣan a ṯarwa n Arebbi iddaren.
27 Fa nnabi Icaƹya, iȓaɣa netta x Ayṯ-Israʼil inna: Waxxa lƹadad n Ayṯ-Israʼil iǧan am yijḏi n ȓebḥar, ḏrus zzaysen iy ɣa inejmen.
28 Aqa Siḏi Arebbi war itƹeṭṭiȓ ca aḏ ixḏem ḏi ddunect awaȓ ig inna.
29 Ammu ig inna nnabi Icaƹya zi qbeȓ: Maƹlik war iǧi ḏ Siḏi Arebbi Lƹalamin iy iḥefḍen can ddurriṯ nneɣ, iȓi iwqeƹ-aneɣ amecnaw min iweqƹen i ṯendint n Sadum ḏ ṯendint n Ƹamura.
Ayṯ-Israʼil tagin aḏ amnen
30 Iwa, min ɣa nini? Yinni war iǧin zi Ayṯ-Israʼil, tuɣa war rezzun ca iƹni ṣṣulḥ ak Arebbi, walakin ufin-ṯ wami umnen.
31 Ayṯ-Israʼil niṯni wami rezzun ij n ccariƹa iƹni iy ticc ṣṣulḥ ak Arebbi, war ufin ca ccariƹa nni.
32 Maɣar? Liʼanna tuɣa rezzun ṣṣulḥ nni s ȓexḏayem nsen waha bȓa ma aḏ amnen. Nqeȓḍen ḏeg uzru nni ḏi tneqȓaḍen yiwḏan.
33 Mammec iqqar Lkitab:
Aqa ggiɣ ḏi ṯendint n Lquds
ij n ttirceṯ iy ḏi tenqȓaḍen yiwḏan,
ij n uzru iy ṯen iɣeṭṭȓen.
Wenni iy zzayes ɣa yamnen,
ƹemmarṣ aṯ xeyybeɣ.