10
1 Inna-asen Bulus: Ay ayṯma, mecḥaȓ tmenniɣ s wuȓ inu tẓaǧiɣ i Arebbi aḏ tenjem lʼumma inu.
2 Nec cehhḏeɣ xasen belli rezzun aḏ ggen lwajib ak Arebbi, walakin war ssinen aḏ ggen lwajib.
3 Wami war ssinen ca mammec itarra Arebbi bnaḏem nican akiḏes uca ḏfaren abriḏ nsen niṯni, kkaren war qbiȓen ca abriḏ n Arebbi.
4 Li'anna Lmasiḥ ḏayes ḏi netta iy ṯkemmeȓ ccariƹa ḥima marra wi zzayes ɣa yamnen aḏ iḏweȓ nican ak Arebbi.
Marra iwḏan zemmaren aḏ nejmen
5 Cuf, mammec iǧa ubriḏ n ȓḥaqq ƹlaḥsab ccariƹa? Yura xas Musa inna: Marra wi ɣa ixeddmen s ṯmesȓayin-a ṯina, azzaysent iddar.
6 Walakin wenni irezzun aḏ yiȓi nican ak Arebbi iƹni azzayes yamen, iqqar Lkitab ḏi manaya: War qqar ca ḏeg wuȓ nnec: Min iƹna wi ɣa igaƹƹḏen ɣar ujenna, iƹni bac aḏ d isehwa Lmasiḥ?
7 Niɣ: Min iƹna wi ɣa ihwan ɣar ȓaǧeɣ bȓa ȓaḥedd, iƹni bac aḏ d yarr Lmasiḥ zeg yinni immuṯen?
8 Walakin, min iqqar Lkitab? Iqqar: "Awaȓ-a yuḏes i cek, aqaṯ ḏeg uqemmum nnec ḏ wuȓ nnec." Iƹni awaȓ n lʼiman iy zi netḥeddaṯ.
9 Aqa meȓa ṯcehḏeḏ s uqemmum nnec qa Ƹisa ḏ Siḏic, meȓa ṯumneḏ s wuȓ nnec belli Arebbi isekkar-iṯ-iḏ zi ȓmewṯ, ataf aḏ tnejmeḏ.
10 Liʼanna s wuȓ nnec tamneḏ, cek ac yarr Arebbi nican. U s uqemmum nnec ṯcehhḏeḏ, cek ṯnejmeḏ.
11 Aqa Lkitab iqqar: "Marra wenni zzayes ɣa yamnen war itxiyyib ca."
12 Liʼanna war ḏinni bu ȓfarq jar iʼisraʼiliyen ḏ yinni war iǧin zi Ayṯ-Israʼil. Arebbi netta ḏ ijjen, aqaṯ xaneɣ marra. Itenfeyyaḍ-d ȓxir nnes x marra wenni xas itȓaɣan.
13 Liʼanna "marra wenni iy ɣa iȓaɣan s yisem n Siḏi Arebbi aḏ injem."a
14 Iḏen, mammec xas ɣa ȓaɣan x wenni iy zi war yuminen ca? Mammec zzayes ɣa amnen zeg wenni umi war xas sȓin ca? Mammec xas ɣa sȓen meȓa war ḏasen itḥeddiṯ ḥadd?
15 U mammec ɣa ḥeddṯen meȓa war d twassekken? Aqa iqqar Lkitab: "Mecḥaȓ ṣebḥan iḍaren n yinni itbeccaren s Lʼinjil."
16 Lʼinjil walakin war ṯ qbiȓen ca marra iwḏan. Aqa min iqqar nnabi Icaƹya zi zman: "A Siḏi Arebbi, wi yumnen s minzi netbeccar?"
17 Falihaḏa, lʼiman itas-d zi min netsȓa, u min netsȓa netta ḏ awaȓ n Lmasiḥ.
18 Walakin nec tseqsiɣ, Ma war sȓin? Wah, sȓin. Aqa min iqqar Lkitab:
Ḏi marra ṯamurṯ iffeɣ-d ṣṣut nsen,b
awaȓen nsen uwḍen aȓ ȓaḥedd n ddunect.
19 Ƹaweḏ nec tseqsiɣ, Ayṯ-Israʼil, ma war fhimen? Ḏ amezwaru inna-asen Musa:
Akenniw jjeɣ aḏ tḥesḏem yinni war iǧin ca ḏ lʼumma,
akenniw sƹeṣbeɣ s yij n lʼumma war ifehhmen.
20 Menbaƹd izƹem nnabi Icaƹya inna:
Yinni war xafi irezzun ufin-ayi,
seḍhareɣ-d ixef inu i yinni war xafi itseqsin.
21 Walakin x Ayṯ-Israʼil iqqar:
Nec ifassen inu nhar ikmeȓ ḍeȓqeɣ-ṯen-d
ɣar yij n ccaƹb iƹṣan, ḏaysen ṯaɣennant.