Arebbi, ma inkar Ayṯ-Israʼil?
11
1 Iwa tseqsiɣ nec, ma inkar Arebbi ccaƹb nnes? Lla, ƹemmarṣ! Nec s yixef inu ḏ aʼisraʼili, zi ddurriṯ n Brahim u zi Ayṯ-Benyamin.
2 Arebbi war inkar ca ccaƹb nnes tuɣa issen-iṯen zi qbeȓ. Ma war ṯessinem ca kenniw min iqqar Lkitab x nnabi Ilyas? Wami iceṯca ɣar Arebbi zi Ayṯ-Israʼil, inna-as:
3 "A Siḏi Arebbi! Nɣin lʼanbiya, heḏmen imucan mani ḏac netqeddam dbiḥaṯ. Qqimeɣ ɣir nec waḥḏi, ȓexxu rezzun aḏayi nɣen."
4 Iwa minzi xas ɣa yarr Arebbi? Inna-as Arebbi: "Jjiɣ i yixef inu sebƹa aȓef n iryazen, war rkiƹen ca i lʼaṣnam nni umi qqaren Baƹl!"
5 Iḏen uȓa ḏi zman-a iy ḏi neǧa, qa ḏa ȓebƹaḍ ixḍar-iṯen Arebbi s arḍa nnes.
6 Meȓa ixḍar-iṯen s arḍa nnes, ȓexxu war iǧi ca ƹlaḥsab lḥasanaṯ nsen. Meȓa lla, arḍa war itiȓi bu ḏ arḍa.
7 Iḏen, mixef rezzun Ayṯ-Israʼil war ṯ ufin ca, maca yinni itwaxḍaren wah ufin-ṯ. Min iqqimen lla, uȓawen nsen twaqsḥen.
8 Mammec iqqar Lkitab:
Yuca-asen Arebbi ȓeqfaȓeṯ,
ṯiṭṭawin war twiȓint,
imejjan war tṣenniṭen aȓ nhar n yiḍa.
9 Iqqar nnabi Dawed:
Aḏ iḏweȓ ȓƹiḏ nsen ḏ ṯaxcebṯ ḏ lfexx,
ḏ azru ḏi tneqȓaḍen,
axas ccen aƹmuḏ.
10 Aḏ ḍarɣȓent ṯiṭṭawin nsen ḥima war twiȓint,
aḏ iȓin iƹurar nsen ȓebda qewsen.
Aḏ nejmen uȓa ḏ yinni war iǧin zi Ayṯ-Israʼil
11 Iwa tseqsiɣ, Ayṯ-Israʼil ma nqeȓḍen ṣafi wḍan? Lla, ƹemmarṣ! Lƹaks, s ȓmuƹṣiyeṯ nsen isenjem Arebbi yinni war iǧin zi Ayṯ-Israʼil bac aḏ tekkar lɣira ḏi Ayṯ-Israʼil.
12 Ȓexxu meȓa ȓmuƹṣiyeṯ nni iy ggin Ayṯ-Israʼil ṯuwi-d lbaraka ḏ ṯameqqrant i ddunect, ƹaweḏ meȓa uṭṭu nni iy ggin yuwi-d lbaraka ḏ ṯameqqrant i yinni war iǧin zi Ayṯ-Israʼil, mecḥaȓ ɣa ṯerni lbaraka xmi d ɣa ḏewȓen niṯni ɣar ubriḏ?
13 Fa nec qqareɣ-awem manaya i kenniw iy war iǧin zi Ayṯ-Israʼil. Nec ḏ arrasul ɣar yinni war iǧin zi Ayṯ-Israʼil, ḥessbeɣ ȓxeḏmeṯ-a inu ɣares ij n ccan imɣar.
14 Rezzuɣ aḏaysen snekkareɣ lɣira ḏeg ayṯma iʼisraʼiliyen ḥima aḏ snejmeɣ ȓebƹaḍ zzaysen.
15 Aqa wami xasen yuzzeȓ Arebbi, isemṣȓaḥ netta ddunect akiḏes. Ȓexxu xmi ṯen ɣa iqbeȓ, ṯuḏarṯ aḏ tiȓi i yinni immuṯen!
16 Meȓa ṯqerrṣeḏ cwayt zeg urecṯia iṣfan ṯqeddmeḏ-ṯ i Arebbi, amenni iy ɣa yiȓi iṣfa urecṯi nni amen ikmeȓ. U meȓa iẓewran n ṯcejjarṯ ṣfan, amenni iy ɣa iȓin uȓa ḏ ȓefruƹ, iƹni ṯiseḍwin.
17 Cuf, ȓebƹaḍ n ȓefruƹ iƹni ṯiseḍwin twaqessent zi ṯzitunt, ṯumma twaȓeqqmeḏ cek ḏeg umcan nsent jar ṯinneɣni waxxa cek ḏ azemmur, ṯcarrceḏ ḏeg iẓewran n ṯzitunt ṯeddareḏ zzaysen.b
18 Walakin war tsemɣar ca ixef nnec x ȓefruƹ nni itwaqessen. Maɣar? War tettu ca belli ḏ iẓewran iy cek iysin, war iǧi bu ḏ cek iy ṯen iysin.
19 Iḏen, imken cek aḏ tiniḏ qa ṯiseḍwin twaqessent bac aḏ twaȓeqqmeɣ nec ḏeg umcan nsent.
20 Wah, niṯenti twaqessent wami war uminent ca u cek ṯeqqimeḏ ḏinni wami ṯumneḏ. Walakin war tsemɣar ca ixef nnec, lla ggweḏ!
21 Iwa, meȓa tuɣa Arebbi war iḥinn ḏi ȓefruƹ n lʼaṣel, uȓa ḏ cek war ḏayek itḥinni ca.
22 Iḏen xzar mecḥaȓ iṣbeḥ Arebbi mecḥaȓ iqseḥ. Iqseḥ netta x yinni iwḍan. Aḏ iṣbeḥ akiḏek cek meȓa ṯeqqimeḏ ḏi ȓxir nnes, niɣ aḏ twaqesseḏ uȓa ḏ cek.
23 U meȓa war qqimen iʼisraʼiliyen x lkufer nsen, uȓa ḏ niṯni aṯen iȓeqqem Arebbi liʼanna netta ɣares jjehḏ iy zi ṯen ɣa iȓeqqem ƹaweḏ.
24 Cuf, cek twaqesseḏ zeg uzemmur iƹni ṭṭabiƹa nnec, ssenni twaȓeqqmeḏ ḏi ṯzitunt iƹni maci ṭṭabiƹa nnec. U niṯenti, mecḥaȓ ihwen aḏ twaȓeqqment iƹni ṯiseḍwin n ṯzitunt aḏ ƹeqbent ḏi lʼaṣel nsent.
Arraḥmeṯ n Arebbi x marra ddunect
25 Ay ayṯma, ḥima war ḏawem itiȓi ttakebbur rezzuɣ i kenniw aḏ tfehmem ṯamesȓayṯ-a ṯanita inuffaren, iƹni Ayṯ-Israʼil ɣarsen ij n ṯɣennant war tɣimi ca i ȓebda. Aḏ teqqim aȓ ɣa ikemmeȓ lƹadad nni n ȓmuminin iy ɣa inejmen zeg yinni war iǧin zi Ayṯ-Israʼil.
26 Amenni iy ɣa nejmen marra Ayṯ-Israʼil. Mammec iqqar Lkitab:
Zi Lquds iy d ɣa yas wenni iy ṯen ɣa isnejmen,
aḏ isbeƹƹeḏ ccerr x ṯarwa n Yaƹqub.
27 Aḏ yiȓi ḏ wa ḏ ȓƹaheḏ inu akiḏsen
xmi xasen ɣa mḥiɣ ȓmuƹṣiyaṯ nsen.
28 X ssabab n Lʼinjil, iʼisraʼiliyen ḏ ȓaƹḏu ƹlaḥsab kenniw. Walakin x ssabab belli twaxḍaren, niṯni ḏ iḥbiben ƹlaḥsab ssalaf ṣṣaliḥin.
29 Liʼanna Arebbi war ineddem ca x min iticc niɣ x min itixḍar.
30 Cuf, ḏi ȓweqṯ nni iƹḏun tuɣa kenniw ṯƹeṣṣam Arebbi, ȓexxu irḥem-ikenniw x ssabab n ȓmuƹṣiyeṯ nni n Ayṯ-Israʼil.
31 Amenni uȓa ḏ niṯni wami ƹṣan Arebbi ȓexxu, aṯen irḥem mammec iy kenniw irḥem.
32 Liʼanna netta Arebbi yarra iwḏan marra ḏ imeḥbas n ȓmuƹṣiyeṯ, bac aṯen irḥem marra iḏsen.
33 Mecḥaȓ imɣar wagȓa n ȓefhameṯ ḏ ṯusnac n Arebbi!
War twacerrḥen lʼaḥkam nnes,
war twafehhmen ibriḏen nnes.
34 Wig issnen lfikra n Siḏ Arebbi,
niɣ wi kis imcawaren?
35 Wi ḏas yucin can ȓḥajeṯ ḏ amezwaru,
bac netta aḏas-t-iḏ yarr?
36 Aqa marra yusa-d ikka-d zzayes, kulci nnes.
Aḏ tiȓi ɣares lƹaḍama i netta i ȓebda. Amin.