Ṯuḏarṯ n jḏiḏ x ufus n Siḏna Ƹisa
12
1 Iḏen fa ay ayṯma, s arraḥmeṯ n Arebbi tcejjaƹeɣ-kenniw aḏ tqeddmem ixef nwem i Arebbi amecnaw ij n dbiḥeṯ ṯeddar, ṯeṣfa, axas yarḍa netta. Manaya ḏ lwajib n lƹibada xawem.
2 War teggem ca min teggen yiwḏan ḏi ȓweqṯ-a ṯanita. Itxeṣṣa aɣarwem yiȓi ij n ȓaƹqeȓ ḏ jḏiḏ ḥima aḏ twabeddȓem, ssenni aḏ tessnem kenniw min ixes Arebbi, iƹni min iṣebḥan, ḏ min ḏas iteƹjiben, war ḏayes bu uxeṭṭi.
3 Fa s lbaraka iy ḏayi yuca Arebbi qqareɣ i mkuȓ ijjen zzaywem: War ḥesseb ca ixef nnec ktar zi min ṯeƹniḏ. Cek fekkar s ȓaƹqeȓ nnec ƹlaḥsab mecḥaȓ n lʼiman iy ḏac yuca Arebbi.
4 Liʼanna ddat ḏayes aṭṭas n ṭrufaṯ, mkuȓ ṭṭarf ixeddem ȓxeḏmeṯ nnes.
5 Amenni iy neǧa uȓa ḏ neccin. Waxxa neccin aṭṭas iḏneɣ, aqa marra iḏneɣ ḏ ij n ddat ḏi Lmasiḥ. U kuȓ ṭṭarf iteḥḏaja unneɣnit.
6 Ƹlaḥsab lbaraka iy ḏaneɣ immucen, ɣarneɣ neccin ṯizemmar. U kuȓ ṯizemmar war tcibbih ca ḏi ṯenneɣnit. Ijjen meȓa yuca-as Arebbi lwaḥi, labud aḏ isexḏem ṯizemmar nni ƹlaḥsab lʼiman nnes.
7 Ijjen meȓa itsexxar, labud aḏ isexxar. Ijjen meȓa iseȓmaḏ, labud aḏ iseȓmeḏ.
8 Ijjen meȓa itcejjaƹ, labud aḏ icejjeƹ. Ijjen meȓa itṣeddaq, labud aḏ yiȓi ḏ asexxay. Ijjen meȓa itraya, labud aḏ iray s wuȓ nnes. Ijjen meȓa ireḥḥem, labud aḏ irḥem s ȓefraḥeṯ.
Mammec itxeṣṣa aḏ iƹic ȓmumen
9 Ȓemḥibbeṯ itxeṣṣa aḏ tiȓi bȓa nnifaq. Ƹiffeṯ min iǧan ḏ ccerr, ṭṭfeṯ ḏi min iǧan ḏ ȓxir.
10 Xseṯ ayawya am ṯawmat. Weqqareṯ ayawya ktar zi jjehḏ.
11 Ḥawȓeṯ, war teƹgizem ca. Xeḏmeṯ i Siḏi Arebbi s wuȓ ḏ arruḥ.
12 Farḥeṯ ḏi lʼamal. Ṣbareṯ x tamara. Dawwmeṯ x ṯẓaǧiṯ.
13 Ƹawneṯ ȓmuminin ṣaliḥin yinni iteḥḏajen. Reḥḥbeṯ x yinni itsafaren.
14 Barkeṯ i yinni kenniw itƹeddaben, barkeṯ war ṯen neƹƹȓem ca.
15 Farḥeṯ ak yinni ifarrḥen, truṯ ak yinni itrun.
16 Ƹiceṯ ag wayawya ḏi ȓehna. War semɣareṯ ca ixef nwem, mƹacarṯ ag ipubriṯen. War tarraṯ ca ixef nwem ḏ imiɣisen.
17 War tarram ca ccerr s ccerr. Arrem-d ȓbaȓ nwem bac aḏ teḥtarmem marra iwḏan ḏi min teggem.
18 Ƹlaḥsab kenniw, meȓa mumken ggeṯ aḏ tiȓim ḏi ȓehna ak yiwḏan marra.
19 Ay iḥbiben, war tentaqamem zi ḥadd, lƹiqab jjem-ṯ i Arebbi. Aqa Lkitab iqqar: "Ḏ nec ig itentaqamen, ḏ nec iy itxeǧasen, iqqar-it Siḏi Arebbi."
20 Lƹaks: Ȓaƹḏu nnec meȓa iǧuz, uc-as aḏ icc. Meȓa iffuḏ, uc-as aḏ isew. Mayemmi? Meȓa ṯeggiḏ-as ammu, axmi ṯserɣeḏ-as ȓefḥam x uzeǧif nnes.
21 War tejja ca ccerr ac iɣȓeb, ḏ cek iy ɣa iɣeȓben ccerr s ȓxir.