Lwajib nneɣ ƹlaḥsab ȓmexzen
13
1 Labud aḏ iṭaƹ kuȓ ijjen i ṣḥab n ȓmexzen liʼanna war iǧi bu ȓmexzen illa win d ikkin zi Arebbi. U yinni iḥekkmen ḏ Arebbi iy ṯen iggin.
2 X manaya wi itƹarraḍen i ȓmexzen, itƹarraḍ i min igga Arebbi. U yinni ḏasen itƹarraḍen aḏ twaƹeqqben.
3 Liʼanna lḥukkam war ssiggwiḏen ca wenni iteggen ȓxir, ssaggwaḏen wenni iteggen ccerr. Meȓa ṯexseḏ war teggwḏeḏ ca zi ȓmexzen, tegg ȓxir axak yarḍa.
4 Aqa netta ḏ axeddam n Arebbi ac infeƹ. Walakin meȓa teggeḏ ccerr, ggweḏ zzayes liʼanna war iysi ca ssif bȓa ssabab. Netta ḏ axeddam n Arebbi itxeǧas itƹaqab wenni iteggen ccerr.
5 Falihaḏa labud aḏas ṯṭaƹeḏ i ȓmexzen maci ɣir ƹlaḥsab lƹiqab, walakin ƹaweḏ ƹlaḥsab ḍḍamir nnec iy ḏac itetten.
6 Ƹaweḏ ḏ wanita ḏ ssabab iy xef txeǧasem ḍḍariba liʼanna yinni iḥekkmen niṯni ḏ ixeddamen n Arebbi, xeddmen ḏi manaya.
7 Mkuȓ ijjen ucem-as ȓḥaqq nnes: ḍḍariba i bab n ḍḍariba, ȓaƹcur i bab n ȓaƹcur, lʼiḥtiram i bab n lʼiḥtiram, ȓewqar i bab n ȓewqar.
Lwajib nneɣ ƹlaḥsab ȓuṣiyaṯ
8 Itxeṣṣa war itiȓi ca umarwas jarawem, itxeṣṣa aḏ yiȓi illa umarwas n ȓemḥibbeṯ. Aqa wenni itexsen unneɣni itwaḥsab ikemmeȓ min yurin ḏi ccariƹa.
9 Liʼanna ȓuṣiyaṯ nni iy iqqaren war zenna, war neqq, war tacar, war ƹecceq, ḏ ȓuṣiyaṯ nneɣnit, marra iḏsent munent ḏeg yij n ȓuṣiyeṯ: "Aḏ texseḏ ajjar nnec amecnaw ixef nnec."
10 Ȓemḥibbeṯ-a war tḍarri ca ajjar nnes. Falihaḏa, ȓemḥibbeṯ tkemmaȓ ccariƹa amen ṯekmeȓ.
11 Maɣar manaya? Kenniw ṯessnem man ȓweqṯ iy ḏi neǧa neccin. Tuweḍ-d ṯsaƹat ḥima aḏ tfaqem zeg yiḍeṣ. Liʼanna ṯsaƹat-a iy ḏi ɣa nenjem ȓexxu aqa ṯqarreb-d ktar zi ṯenni wami numen ḏ amezwaru.
12 Ǧiȓeṯ aqa ṯeƹḏu, qa yuweḍ-d nhar. X manaya labud a nekkes ȓeḥwayej n ṯaǧest, a negg arruḍ n nnur n ȓeḥḏiḏ.
13 Itxeṣṣa labud a nuyur s lʼiḥtiram am wenni igguren ḏi ṯfawṯ n nhar. War ntegg ca lmadella n ssekra ḏ waṭṭas n creb, ḏ lfasad ḏ ȓeqbaḥeṯ, ḏ umenɣi ḏ ȓeḥseḏ.
14 Walakin, ggeṯ ȓeḥwayej n Siḏna Ƹisa Lmasiḥ. War rehham ca ak ddat nwem, war tseƹƹafeṯ ca ccehwaṯ nnes.