War tƹeyyab ca x wumac
14
1 Fa wenni umi iḍƹef lʼiman nnes qebȓem-ṯ jarawem, bȓa ma ṯmenɣem akiḏes x lʼafkar nnes.
2 Ijjen itwaȓa lmakla marra ḥalal. Ijjen nneɣnit wenni ɣar iǧa lʼiman nnes iḍƹef, itett ɣir zi ȓxuḍarṯ.
3 Wenni itwaȓan marra lmakla ḥalal, itxeṣṣa-yas war iseḥqar ca wenni war itetten ca. Ƹaweḏ wenni war itetten ca, itxeṣṣa-yas war itƹeyyib ca x wenni itwaȓan lmakla marra ḥalal, liʼanna Arebbi iqbeȓ-iṯ.
4 Cek min ṯeƹniḏ bac aḏ tƹeyybeḏ axeddam n midden? Meȓa injeḥ niɣ war injiḥ ca, manaya ḏ cɣeȓ n siḏis. U ḏ ṣṣaḥ netta aḏ injeḥ liʼanna Siḏi Arebbi izemmar aṯ isenjeḥ.
5 Cuf, ijjen itwaȓa ij n nhar mubarek zi nhuraṯ nneɣnit. Ijjen itwaȓa nhuraṯ qaƹ kif-kif. Itxeṣṣa labud aḏ yiȓi mkuȓ ijjen iqneƹ mliḥ s array nnes.
6 Wenni itwaȓan ij n nhar mubarak zeg unneɣnit, itegg manaya bac aḏ iweqqar Siḏi Arebbi. Wenni itetten zi marra lmakla, itett bac aḏ iweqqar Siḏi Arebbi liʼanna itcekkar Arebbi. Wenni war itetten ca zi marra lmakla, itegg manaya bac aḏ iweqqar Siḏi Arebbi, uȓa ḏ netta itcekkar Arebbi.
7 Cuf, war ḏayneɣ ḥadd iddar i yixef nnes, war itmetti ḥadd i yixef nnes.
8 Neccin meȓa neddar, a neddar i Siḏi Arebbi. Meȓa nemmuṯ, a nemmeṯ i Siḏi Arebbi. Falihaḏa, meȓa neddar niɣ nemmuṯ neccin n Siḏi Arebbi.
9 Liʼanna x manaya iy xef immuṯ Lmasiḥ uca ṯeƹqeb-d ḏayes ṯuḏarṯ, ḥima aḏ yiȓi netta ḏ Siḏiṯsen n yinni immuṯen ḏ yinni iddaren.
10 Iwa cek mayemmi tƹeyyabeḏ umac? Mayemmi cek ṯseḥqareḏ umac? Neccin marra a nbedd zzaṯ i lƹarc n Arebbi mani iy ɣa netwaḥkem.
11 Aqa yura ḏi Lkitab:
Nec tjaǧiɣ s ṯuḏarṯ inu, inna Arebbi,
aqa marra iwḏan aḏayi sejjḏen x ifadden nsen,
mkuȓ iȓes aḏ icheḏ belli nec ḏ Siḏi Arebbi.
12 Falihaḏa, mkuȓ ijjen zzayneɣ aḏ itwaḥaseb zzaṯ i Arebbi.
War ɣeṭṭeȓ ca umac
13 Iḏen itxeṣṣa-yaneɣ labud war netƹeyyib ca x wayawya zi ssa aȓ ṯsawent. Innama, itxeṣṣa-kenniw aḏ tfekkarem mliḥ ḥima war ṯɣeṭṭȓem ca can wumaṯwem niɣ aṯ tesfecȓem.
14 Nec ssneɣ u mteyyqen ḏi Siḏna Ƹisa aqa min nettet war ḏayes bu can ȓḥajeṯ ḥram. Walakin itiȓi ḥram x wenni iy t itwaȓan ḥram.
15 Liʼanna meȓa itxeyyaq wumac s macca nni iy tetteḏ, ataf cek war ṯuggureḏ ca nican s ȓemḥibbeṯ. War tegg ca macca nnec ḏ ssabab iy zi ɣa inehḏem wumac, x wenni mix immuṯ Lmasiḥ.
16 Amenni war tejjam ca iwḏan aḏ ssiwȓen ccerr x min twaȓim ḏ aṣebḥan.
17 Liʼanna ȓmulk n Arebbi war iǧi ca ḏ macca niɣ ḏ ṯisessi, walakin netta ḏ ṣȓaḥeṯ ak Arebbi ḏ ȓehna ḏ ȓefraḥeṯ s Arruḥ iqeddsen.
18 Aqa wenni iy ɣa ixeḏmen i Lmasiḥ s manayenni, Arebbi ireṭṭa xas iwḏan tcekkaren-ṯ.
19 Iḏen fa itxeṣṣa-yaneɣ u labud a nḥaweȓ a negg min itawin ɣar ȓehna ḏ minzi ɣa ncejjeƹ ayawya.
20 War heddem ȓxeḏmeṯ n Arebbi ƹlaḥsab lmakla. Ḏ ṣṣaḥ marra min iǧan netta ḥalal, walakin netta ḏ ij n ȓƹib meȓa ṯɣeḍȓeḏ ijjen nneɣnit s ssabab n min tetteḏ.
21 Ḏ ij n ȓxir meȓa war tetteḏ ca aysum, niɣ war ṯsesseḏ ca aman uḍiȓ, niɣ ḏ can ȓḥajeṯ nneɣnit iy ɣa iɣeḍȓen umac.
22 Min ma ṯumneḏ x ṯmesȓayin-a, ejj-iṯent jarac-d ḏ Arebbi. Ssaƹḏ n wenni war d itiwin lḥisab ḏ lƹiqab i yixef nnes ƹlaḥsab min itwaȓa ḥalal.
23 Walakin meȓa ijjen itett itcekka ḏi lmakla nni, axas itwaḥakem axas itwaƹeqqeb, liʼanna war itett ca s lʼiman nnes. U marra min war itiȓin s lʼiman netta ḏ ij n ȓmuƹṣiyeṯ.