Ḏfar min itegg Siḏna Ƹisa Lmasiḥ
15
1 Fa neccin ig ijehḏen itxeṣṣa-yaneɣ a narbu ḍḍuƹef n yinni war ijhiḏen ca, war ntegg ca min ḏaneɣ iteƹjiben i yixef nneɣ waha.
2 Mkuȓ ijjen zzayneɣ itxeṣṣa-yas axas yarḍa wajjar nnes akis igg ȓxir ḥima aḏ ijheḏ.
3 Liʼanna Lmasiḥ war iggi ca min ḏas iteƹjiben i yixef nnes, mammec iqqar Lkitab: "Ȓbaṭeȓ iy xac nnan ifḍeḥ-ayi."
4 Cuf, marra min yurin ḏi Lkutub ḏi zman aqa urin-ṯ bac a neȓmeḏ neccin. Awaȓ n Arebbi itcejjaƹ-aneɣ, itawi-yaneɣ-d ṣbar bac aɣarneɣ yiȓi lʼamal.
5 Arebbi, iƹni wenni iticcen ṣbar itcejjaƹ, xmi ṯḏeffarem Ƹisa Lmasiḥ akenniw ismun ḥima aḏ tiȓim ḏ ijjen,
6 bac aḏ tḥemḏem Arebbi Babas n Siḏna Ƹisa Lmasiḥ s yijjen n array ḏ yij uqemmum.
7 S manaya qebȓeṯ ayawya mammec iy kenniw iqbeȓ Lmasiḥ ḥima aḏ tsemɣarem Arebbi.
8 Cuf, nec qqareɣ-awem belli Lmasiḥ yusa-d ḥima aḏ yiȓi ḏ axeddam n Ayṯ-Israʼil bac aḏ d iseḍhar lḥaqiqa n Arebbi aḏ igg min iwƹeḏ ssalaf ṣṣaliḥin.
9 Ƹaweḏ bac yinni war iǧin zi Ayṯ-Israʼil aḏ ḥemḏen Arebbi x arraḥmeṯ nnes. Mammec iqqar Lkitab:
S manaya iy cek ɣa ḥemḏeɣ jar ȓegnus,
aḏ ɣennjeɣ i yisem nnec.
10 Iqqar Lkitab ƹaweḏ:
Farḥeṯ, ya ȓegnus ak ccaƹb nnes!
11 Iqqar ƹaweḏ:
Ḥemḏeṯ Siḏi Arebbi, ya ȓegnus marra iḏwem!
Ḥemḏem-ṯ, marra iḏwem ya ccuƹub!
12 Iqqar ƹaweḏ nnabi Icaƹya:
Aḏ iɣmi uẓwer n Yassa,a
netta iy ɣa ikkaren aḏ iḥkem x ȓegnus,
ḏayes iy ɣa ggen ȓegnus lʼamal.
13 Arebbi, iƹni wenni iticcen lʼamal, akenniw iccur s ȓefraḥeṯ ḏ ȓehna wami zzayes ṯumnem, bac aḏ tenfeyyḍem s lʼamal s jjehḏ n Arruḥ iqeddsen.
Bulus netta ḏ arrasul ɣar yinni war iǧin zi Ayṯ-Israʼil
14 Ay ayṯma, nec mteyyqen belli kenniw ṯeccurem s ȓxir ḏ marra ṯusna,b ṯzemmarem aḏ tesȓemḏem ayawya.
15-16 Walakin zeƹmeɣ uriɣ ṯabrat-a ɣarwem x ȓebƹaḍ n ṯmesȓayin bac war ṯent tettum ca. Liʼanna nec teggeɣ ȓxeḏmeṯ n ȓefqih tbeccareɣ awaȓ n Arebbi s lbaraka nnes iy ḏayi yuca bac aḏ iȓiɣ ḏ axeddam n Ƹisa Lmasiḥ i kenniw iy war iǧin zi Ayṯ-Israʼil. Ḥima akenniw qeddmeɣ ḏ ij n ṣṣeḏqeṯ ṯeṣfa s Arruḥ iqeddsen bac at iqbeȓ Arebbi.
17 Falihaḏa s Ƹisa Lmasiḥ aḏ ftaxareɣ s ȓxeḏmeṯ inu i Arebbi.
18 Cuf, zeƹmeɣ aḏ ssiwȓeɣ ɣir x min ixeddem Lmasiḥ x ufus inu ḥima yinni war iǧin zi Ayṯ-Israʼil aḏ ṭaƹen i Arebbi x wawaȓ ḏ ȓefƹayeȓ inu,
19 iƹni s jjehḏ n lƹalamaṯ ḏ lmuƹjizaṯ iy d yusin zi jjehḏ n Arruḥ n Arebbi. Ammu iy beccareɣ s Lʼinjil n Lmasiḥ ḏi mkuȓ amcan zi ṯendint n Lquds aȓ jwayeh n Ilirya.
20 U nec rezzuɣ aḏ tbeccareɣ ȓebda s Lʼinjil ḏi ṯmura mani war xas tesȓin ca x Lmasiḥ, bac war benniɣ ca x dsas nni igga ḥadd nneɣni.
21 Mammec iqqar Lkitab:
Yinni war xas itwaxebbaren aḏ twaȓan,
yinni war xas isȓin aḏ fehmen.
22 Ḏ wa ḏ ssabab iy ḏayi iṭṭfen aṭṭas n ṯwaȓaṯin war ɣarwem d usiɣ ca nec.
Arrasul Bulus irezzu aḏ iraḥ ɣar ṯendint n Ruma
23 Maca ȓexxu war ɣari bu umcan mani ɣa xeḏmeɣ ḏi jwayeh-a u nec mecḥaȓ zeg wami tuɣa xseɣ aḏ d aseɣ akenniw ẓreɣ.
24 Xmi ɣa raḥeɣ ɣar Spanya tmenniɣ axawem d kkeɣ, aḏ qqimeɣ aḏ farḥeɣ akiḏwem cwayt n ȓweqṯ. U nec tmenniɣ zzaywem aḏayi ṯƹawnem aḏ kemmȓeɣ x ubriḏ inu.
25 Maca ȓexxu aqa ggureɣ ɣar ṯendint n Lquds bac aḏ ƹawneɣ ȓmuminin ṣaliḥin ḏinni.
26 Liʼanna ȓmuminin iǧan ḏi jwayeh n Masidunya ḏ Uxaya texsen aḏ ƹawnen i ipubriṯen iǧan ḏi ȓmuminin ṣaliḥin ḏi ṯendint n Lquds.
27 Aqa niṯni texsen ad ggen manaya u ḏ ṣṣaḥ manaya ḏ ij n lwajib aqaṯ xasen. Maɣar? Liʼanna yinni war iǧin zi Ayṯ-Israʼil meȓa ysin zi lbaraka ruḥiya n iʼisraʼiliyen, itxeṣṣa labud yinni war iǧin zi Ayṯ-Israʼil aḏ ƹawnen s wagȓa nsen iʼisraʼiliyen.
28 Iḏen xmi ɣa kemmȓeɣ cɣeȓ-a iƹni aḏasen siwḍeɣ marra lmuƹawana-ya, ȓxeddnnit axawem d kkeɣ xmi ɣa raḥeɣ ɣar Spanya.
29 U nec ssneɣ xmi ɣarwem d ɣa aseɣ, aḏ d aseɣ s yij n ȓmudc iccur s lbaraka n Lmasiḥ.
30 Fa tettareɣ zzaywem ay ayṯma, s Siḏna Ƹisa Lmasiḥ ḏ ȓemḥibbeṯ n Arruḥ n Arebbi, bac aḏ tbeddem akiḏi s ṯẓaǧiṯ nwem ɣar Arebbi x ssabab inu.
31 Ẓẓaǧeṯ ḥima aḏ nejmeɣ zeg ifassen n yinni war yuminen ca ḏi jwayeh n Yahuḏiya, ƹaweḏ bac ȓxeḏmeṯ inu ḏi Lquds at qebȓen ȓmuminin ṣaliḥin ḏinni.
32 Ȓxeddnnit, meȓa ixes Arebbi aɣarwem d aseɣ s ȓefraḥeṯ a nreyyeḥ ag wayawya.
33 Arebbi n ȓehna akiḏwem yiȓi marra iḏwem. Amin.