Bulus itseǧam x can ȓmuminin ḏi ṯendint n Ruma
16
1 Fa tweṣṣiɣ-kenniw x učmaṯneɣ Fifi ixeddmen i jmaƹṯ n ȓmuminin ḏi ṯendint n Kanxarya.
2 Reḥḥbeṯ zzayes ƹlaḥsab Siḏiṯneɣ, iƹni ij n ureḥḥeb iy sḏaheǧen ȓmuminin ṣaliḥin. Ƹawnem-t ḏi marra min teḥḏaj zzaywem, ȓaḥeqqac nettaṯ tƹawan aṭṭas n yiwḏan, tƹawan-ayi uȓa ḏ nec.
3 Siwḍem-asen sȓam i Briskila ḏ Wakilas, yinni akiḏi ixeddmen ḏi Ƹisa Lmasiḥ.
4 Ɣamaren s ṯuḏarṯ nsen x ssabab inu. War iǧi ɣir nec iy ṯen itcekkaren, walakin tcekkarent-ṯen marra ṯijumaƹ n ȓmuminin iy war iǧin zi Ayṯ-Israʼil.
5 Siwḍem-asen sȓam ƹaweḏ i jmaƹṯ n ȓmuminin itmunan ḏi ṯeddarṯ n ṯnayen-a. Siwḍem-as sȓam i uḥbib inu Ibantus wenni iy yumnen ḏ amezwaru ḏi lʼiqlim n Asya s Lmasiḥ.
6 Siwḍem-as sȓam i Maryam ixeddmen aṭṭas xawem.
7 Siwḍem-asen sȓam i Andruni ḏ Yunyas, ȓeḥbab inu, yinni tuɣa akiḏi iǧan ḏi ȓeḥbes. Niṯni maƹrufin jar arrusul, umnen zi Lmasiḥ qbeȓ ma aḏ amneɣ nec.
8 Siwḍem-as sȓam i Amfilawus, aḥbib inu ḏi Siḏiṯneɣ.
9 Siwḍem-asen sȓam i Urban wenni ixeddmen akiḏi ḏi Lmasiḥ ḏ uḥbib inu Staxis.
10 Siwḍem-as sȓam i Apalis, wenni itwamellken ḏi Lmasiḥ. Siwḍem-asen sȓam ƹaweḏ i lƹaʼila n Aristubul.
11 Siwḍem-as sȓam i Ḥarudi iǧan zi ȓeḥbab inu. Siwḍem-asen sȓam i lƹaʼila n Narqis yinni itamnen s Siḏiṯneɣ.
12 Siwḍem-asent sȓam i Ḍrifina ḏ Ḍrifusa, ṯinni ixeddmen aṭṭas ḏi Siḏiṯneɣ. Siwḍem-as sȓam i ṯeḥbibṯ inu Ṯafersist, ṯxeddem aṭṭas ḏi Siḏiṯneɣ.
13 Siwḍem-asen sȓam i Rufus, wenni itwaxḍaren ḏi Siḏiṯneɣ, ḏ yemmas iy ḥessbeɣ amecnaw yemma.
14 Siwḍem-asen sȓam i Sinkritus ḏ Fligun ḏ Harmas ḏ Batrubas ḏ Hirmis ḏ ayṯmaṯsen iy kisen iǧan.
15 Siwḍem-asen sȓam i Filuɣi ḏ Julya ḏ Niryus ḏ učmas ḏ Lumbas ḏ marra ȓmuminin ṣaliḥin iy kisen iǧan.
16 Seǧmem x wayawya s yijjen n sȓam iṣfa. Qa ṯijumaƹ n Lmasiḥ marra tseǧament xawem.
Ȓuṣiyeṯ ṯanegarut zi Arrasul Bulus
17 Ay ayṯma, tettareɣ zzaywem aḏ teḥḍam ixef nwem zeg yinni iferrqen ȓmuminin x wayawya teggen-awem min isefciȓen, iƹni ḍed ṯɣuri nni iy ṯȓemḏem kenniw. Beƹƹḏeṯ xasen x yina.
18 Liʼanna yina war xeddmen ca i Siḏna Ƹisa Lmasiḥ, xeddmen ɣar uƹeddis nsen. S wawaȓ yiziḍen ḏ lmuhawaḍa izewwqen xeddƹen uȓawen n yinni iy ḏi ṯeǧa nniyyeṯ.
19 Kenniw, sȓin xawem iwḏan marra x ṭṭaƹa nwem u nec farḥeɣ zzaywem x manayenni. Walakin xseɣ kenniw aḏ tiȓim ḏ ifṭanen x min iǧan ḏ aṣebḥan, aḏ tɣefȓem x min iǧan ḏ ccerr.
20 Arebbi n ȓehna netta ƹȓayen aḏ iȓbeẓ Cciṭan swadday i iḍaren nwem. Axawem yiȓi arḍa n Siḏna Ƹisa Lmasiḥ.
21 Isiweḍ-awem-d sȓam Timuṯawus wenni ixeddmen akiḏi, ḏ ȓeḥbab inu iƹni Luqyus ḏ Yasin ḏ Sibatru.
22 Nec Tartyus siwḍeɣ-awem-d ij n sȓam ḏi Siḏiṯneɣ. Nec ig yurin ṯabrat-a.
23 Isiweḍ-awem-d sȓam Ɣayus, ḏ netta iy zzayi ireḥḥben ɣar ṯeddarṯ nnes irzem-it i marra jmaƹṯ n ȓmuminin. Isiweḍ-awem-d sȓam Arisṭus, lʼamin n ṣṣenduq n ṯendint,a ḏ umaṯneɣ Qartus.
24 {Axawem yiȓi marra iḏwem arḍa n Siḏna Ƹisa Lmasiḥ. Amin.}
Lxitam n ṯebrat-a
25 Itwabarak Arebbi! Netta ḏ wenni izemmaren aḏawem yuc jjehḏ s Lʼinjil-a iy tbeccareɣ u s uḥeddeṯ n Ƹisa Lmasiḥ ƹlaḥsab min d ibanen tuɣaṯ inuffar zi zman.
26 Iban-d manaya ȓexxu i yiwḏan u manaya itwassen s lkutub n lʼanbiya. Arebbi iƹni wenni itduman i ȓebda yumar bac azzayes amnen marra ȓegnus aḏas ṭaƹen.
27 Arebbi waḥḏes iy ḏi ṯeǧa lḥikma, aḏ tiȓi lƹaḍama i netta i ȓebda s Ƹisa Lmasiḥ! Amin.