Ȓxeḏmeṯ n arrusul
4
1 Cuf, itxeṣṣa aḏaneɣ ẓren ḏ ixeddamen n Lmasiḥ, netkellaf x ṯmesȓayin inuffaren n Arebbi.
2 U labud yinni itkellafen aḏ tiȓi ḏaysen ttiqeṯ.
3 Nec war ḏayi ithimmi ca aṭṭas meȓa tḥakamem-ayi kenniw niɣ ḏ can lmaḥkama nneɣni. Uȓa ḏ nec war ǧiɣ bu ḏ ȓqaḍi x yixef inu.
4 Ḍḍamir inu mertaḥ ig iǧa, walakin ma nec bariʼ iy ǧiɣ ƹlaḥsab ḍḍamir inu? Lla, ḏ Siḏi Arebbi iy ḏayi ɣa yucen ȓḥukem-a.
5 X manaya war qqarem walu x ȓḥukem qbeȓ ȓweqṯ, iƹni qbeȓ iy d ɣa yas Siḏiṯneɣ. Ḏ netta iy ɣa isbeyynen ɣar nnur ṯimesȓayin nni ig inuffaren ȓexxu ḏi ṯaǧest, aḏ d iseḍhar kuȓ lɣaraḍ ig iǧan ḏeg wuȓawen n yiwḏan. Ȓexddennit kuȓ ijjen aɣares yiȓi usemɣar nnes zi Arebbi.
6 Ay ayṯma qqareɣ manaya x Apullus ḏ nec, meṯṯleɣ manaya ḥima azzayes ṯawim nfaƹ. Kenniw aḏ tȓemḏem zzayneɣ min iƹna lmiṯal nni ig iqqaren <War tbeƹƹaḏeṯ ca zi min iǧan ḏi Lkitab.> Amenni war ḏinni ḥadd aḏ isecneƹ ij n uryaz x unneɣnit.
7 Cek, wi c iscenƹen x unneɣnit? Ma ɣarek can ȓḥajeṯ war ḏac ṯemmuc ca niɣ? Y cek, meȓa immuc-ac manaya mayemmi teftaxareḏ axmi war ḏac immuc ca?
8 Ma ṣaaaafi ɣarwem marra min ṯexsem? Kenniw, ma ṣaaaafi ṯḏewȓem ḏ twajar? Ma ḏ ṣṣaḥ ṯḏewȓem ḏ izeǧiḏen bȓa neccin?! Iwa mecḥaȓ xseɣ aḏ yiȓi ḏ ṣṣaḥ teḥkamem bac aḏ tcarcem ȓeḥkam nwem akiḏneɣ.
9 Liʼanna itɣir-ayi belli neccin arrusul isfurruj-aneɣ Arebbi ḏ ineggura ḏi lmelƹab, am yiwḏan ḥekmen xasen s ȓmewṯ aḏ mmṯen ḏinni. Igga-aneɣ a nesfurruj ddunect ṯekmeȓ, iƹni iwḏan ḏ lmalaʼika.
10 Neccin ḏ ibuhaȓiyen zaƹma ƹlaḥsab Lmasiḥ, ma kenniw ḏ imiɣisen ḏi Lmasiḥ? Neccin neḍƹef, ma kenniw ṯjehḏem? Karrmen-kenniw, neccin sbehdaȓen-aneɣ.
11 Qa ƹaḏ ɣar ṯsaƹat-a neǧuz, nfuḏ, aqaneɣ s ixarṭiṭen, tmarraṯen-aneɣ, war ɣarneɣ mani ɣa ndurra.
12 Neccaṯ tamara, nxeddem s ifassen nneɣ. Xmi ḏaneɣ tzebbaȓen, neccin netbarak-iṯen. Xmi ḏaneɣ tƹeddaben, neccin nṣebbar.
13 Xmi qqaren xaneɣ ȓbaṭeȓ, neccin ntarra-d xasen s yij n lʼiḥsan. Qa ƹaḏ aȓ ȓexxu neḏweȓ neccin am ṯzewbayṯ n ddunect ḏ zbeȓ n marra yiwḏan.
14 Maci uriɣ ṯimesȓayin-a bac akenniw feḍḥeɣ. Lla, nehhiɣ-kenniw amecnaw ṯarwa inu iƹizzen.
15 Waxxa akiḏwem ƹecra aȓaf n lmurebbiyin ḏi Lmasiḥ, war ɣarwem aṭṭas n babaṯwem. Liʼanna ḏi Ƹisa Lmasiḥ nec ḏ babaṯwem ḏi Lʼinjil.
16 Iḏen, tcejjaƹeɣ-kenniw aḏ teggem am teggeɣ nec.
17 X manayenni iy xef kenniw d ssekkiɣ Timuṯawus. Netta amecnaw memmi, iƹizz xafi u netta ḏayes ttiqeṯ ḏi Siḏiṯneɣ. Akenniw isfekkar x ibriḏen inu ḏi Lmasiḥ mammec ṯen seȓmaḏeɣ ḏi marra imucan u ḏi marra ṯijumaƹ n ȓmuminin.
18 Fa ȓebƹaḍ zzaywem ḏaysen ttakebbur, tɣir-asen belli nec war ɣarwem d tiseɣ ca.
19 Lla, qa ƹȓayen aɣarwem d aseɣ meȓa ixes Arebbi. Yinni iy ḏi iǧa ttakebbur aṯen ssneɣ nec; war iǧi bu min qqaren niṯni lla, walakin ma ḏaysen can jjehḏ niɣ lla.
20 Liʼanna ȓmulk n Arebbi war iǧi bu ḏeg wawaȓ lla, aqaṯ ḏi jjehḏ.
21 Mamc ḏawem iteƹjib? Ma ɣarwem d aseɣ s uƹmuḏ niɣ s ȓemḥibbeṯ ḏ yij n wuȓ iṣebbaren?