Ccerr ḏi jmaƹeṯ n ȓmuminin
5
1 Intentacar ȓexbar belli ḏinni ij n nnawƹ n lfasad jarawem war xas ṣebbaren ca waxxa ḏ lkuffar! Iƹni ij n uryaz ɣares ṯamɣarṯ n babas.
2 Y kenniw, ma ḏaywem ttakebbur?! Lla, itxeṣṣa aḏ txeyyqem. Itxeṣṣa aḏ tsufɣem wenni iggin manaya zi jmaƹeṯ nwem.
3 Nec, waxxa ɣabeɣ ssenni s ddat inu, ḏinni akiḏwem arruḥ inu. Ṣafi, nec axmi aqayi ḏinni ḥekmeɣ x wenni iggin ṯamesȓayṯ-a.
4 Xmi ɣa ṯmunem s yisem n Siḏiṯneɣ Ƹisa ƹaweḏ ḏinni akiḏwem arruḥ inu, s jjehḏ n Siḏiṯneɣ Ƹisa
5 aḏ tsufɣem aryaz nni ɣar Cciṭan ḥima aḏ ifna array aƹeffan n nnefs nnes bac arruḥ nnes aḏ injem ḏi Nhar n Siḏiṯneɣ.
6 Maci mliḥ wami teftaxarem. War ṯessinem ca belli ɣir ḏrus n untuna isgaƹƹaḏ-d marra ȓƹajneṯ n urecṯi?b
7 Kkseṯ antun nni aqḏim ḥima aḏ tiȓim kenniw ḏ ij n ȓƹajneṯ ḏ jḏiḏ n urecṯi, iƹni bȓa antun. Liʼanna ammu ḏ ṣṣaḥ iy ṯeǧam kenniw. Cuf, itwaɣareṣ ȓƹiḏ nneɣ iƹni Lmasiḥ.
8 X manaya a nƹeyyeḏ walakin war netƹeyyiḏ ca s untun nni aqḏim, iƹni antun nni n ȓeqbaḥeṯ ḏ ccerr. Lla, a nƹeyyeḏ neccin s ṯefḍirṯ, iƹni ij n uɣrum ḏayes lḥaqiqa war ḏayes bu ixarriqen.
9 Tuɣa uriɣ-awem-d ḏi ṯebrat nni inu war tƹacareṯ ca yinni iteggen lfasad.
10 Walakin tuɣa war ssiwiȓeɣ ca x lkuffar n ddunect-a iteggen lfasad niɣ ḏ iḍemmaƹen niɣ ḏ iɣeccacen niɣ ḏ yinni iƹebbḏen lʼaṣnam. Maƹlik amenni, iȓi labud aḏ teffɣem zi ddunect-a qaƹ.
11 Lla, walakin ȓexxu uriɣ-awem-d ḥima war tƹacarem ȓmumen iƹni netta iqqar-ac nec ḏ umac, walakin netta itegg lfasad niɣ ḏ aḍemmaƹ niɣ iƹebbeḏ lʼaṣnam niɣ iqqar ȓbaṭeȓ niɣ isess aṭṭas n creb niɣ netta ḏ aɣeccac. Ijjen am wanita, war tettem ca akiḏes qaƹ.