Ccikayaṯ jar ȓmuminin
6
1 Can yijjen zzaywem ɣares ccikaya ḍeḏ i can yijjen nneɣnit. Ma ḏ ṣṣaḥ war itseḏḥi ca netta, itbedda ḏi lmaḥkama ɣar zzaṯ n yinni war yuminen ca, maci ɣar zzaṯ n ṣṣaliḥin?
2 Ma war ṯessinem ca belli ṣṣaliḥin ḏ niṯni iy ɣa iḥekmen x ddunect? Y kenniw meȓa ṯḥekmem x ddunect, mayemmi war ṯzemmarem aḏ tḥellem ccikayaṯ ṯimezyanin?
3 Ma war ṯessinem belli a neḥkem x lmalaʼikaṯ? U labud a neḥkem x ṯmesȓayin n ṯuḏarṯ-a!
4 Iḏen, meȓa jarawem ccikayaṯ am ṯina, mayemmi ṯent ṯsersem zzaṯ i yinni war ɣar ṯeǧi ca lqima ak jmaƹeṯ n ȓmuminin?
5 Qqareɣ-awem manaya ḥima aḏ tseḏḥim. Ma ḏ ṣṣaḥ war ḏinni ḥadd ḏayes ȓefhameṯ jarawem ḥima aḏ iḥell ccikayaṯ-a jar ȓmuminin?
6 Walakin maci mliḥ ayṯmaṯneɣ temcarraƹen jarawem ak wayawya zzaṯ i yinni war yuminen ca.
7 Xmi temcarraƹem kenniw jarawem, ṣafi ṯexsarem. Iwa ḥsen meȓa twaḍeȓmem, ḥsen meȓa twaɣeccem.
8 Iwa lƹaks, kenniw ṯḍeǧmem tɣeccam, teggem manaya i ayṯmaṯwem.
9 Ma war ṯessinem belli yinni war yuminen ca war zemmaren aḏ warṯen ȓmulk n Arebbi? War xeddƹem ca ixef nwem. Yinni iteggen lfasad, uȓa ḏ yinni iƹebbḏen lʼaṣnam, uȓa ḏ yinni izennan, uȓa ḏ iḥenjiren ifessḏen ak iryazen, uȓa ḏ iryazen ifessḏen ak iryazen,
10 uȓa ḏ iceffaren, uȓa ḏ iḍemmaƹen, uȓa ḏ yinni isessen aṭṭas n creb, uȓa ḏ yinni iqqaren ȓbaṭeȓ, uȓa ḏ iɣeccacen war warṯen ca ȓmulk n Arebbi.
11 Ammu iy tuɣa ȓebƹaḍ zzaywem, maca ȓexxu twasirḏem, twaṣeffam, twasemṣȓaḥem ak Arebbi s yisem n Siḏiṯneɣ Ƹisa Lmasiḥ u s Arruḥ n Arebbi nneɣ.
Rewȓeṯ zi lfasad
12 Nec ɣari marra ṯimesȓayin ḥeǧȓent, walakin war neffƹent ca marra ṯimesȓayin nni. Ɣari marra ṯimesȓayin ḥeǧȓent, walakin itxeṣṣa war xafi trayi uȓa ḏ icten n ṯmesȓayṯ.
13 Aḏ yini ijjen: <Iwa lmakla n uƹeddis, aƹeddis n lmakla.> Walakin Arebbi aṯen ihḏem s ṯnayen iḏsen. Ddat maci n lfasad, ddat nettaṯ n Siḏiṯneɣ. U Siḏiṯneɣ itḏebbar i ddat.
14 Arebbi s jjehḏ nnes isekkar-d Siḏiṯneɣ zi ȓmewṯ, aḏaneɣ d isekkar zi ȓmewṯ uȓa ḏ neccin.
15 Ma war ṯessinem ca belli ddat nwem nettaṯ ḏ ṭrufaṯ n ddat n Lmasiḥ? Iwa ṭrufaṯ-a, ma aṯent ysiɣ aṯent smuneɣ akeḏ lfasdaṯ? Lla, ƹemmarṣ!
16 Ma war ṯessinem wenni itmunen akeḏ lfasda aḏ iḏweȓ ḏ ij n ddat akiḏes? Wah, liʼanna iqqar Lkitab: "Niṯni s ṯnayen iḏsen aḏ ḏewȓen ḏ ijjen."
17 Walakin wenni imunen akeḏ Siḏiṯneɣ aḏ iḏweȓ ḏ ij n arruḥ akiḏes.
18 Rewȓeṯ zi lfasad. Kuȓ ȓmuƹṣiyeṯ nneɣnit ig itegg bnaḏem aḏ tiȓi ɣar barra n ddat nnes. Wenni iteggen lfasad iƹeṣṣa ddat nnes nniṯ.
19 Niɣ ma war ṯessinem ddat nwem nettaṯ ḏ ṯamziḏa n Arruḥ iqeddsen ig izeddɣen ḏaywem? Iwa ɣarwem Arruḥ-a zi Arebbi. Kenniw war trayim ca x yixef nwem,
20 liʼanna twasɣem kenniw s yij n ttaman. Falihaḏa semɣareṯ Arebbi s ddat nwem.