Arrasul Bulus itweṣṣa ȓmuminin x ȓemȓac
7
1 Fa ȓexxu a nessiweȓ x ṯmesȓayin iy xef ṯurim. Maṯalan, mliḥ aryaz meȓa war itḥiḏi ca ṯamɣarṯ.
2 Walakin ḥsen meȓa kuȓ ijjen aɣares ṯiȓi ṯemɣarṯ nnes, kuȓ icten aɣares yiȓi uryaz nnes bac war itiȓi ca lfasad.
3 Labud aryaz aḏ yuc ȓḥaqq n ȓemȓac i ṯemɣarṯ nnes. Ammu ƹaweḏ labud ṯamɣarṯ aṯ tucc i uryaz nnes.
4 Liʼanna ṯamɣarṯ war trayi ca x ddat nnes waḥḏes, itraya xas uȓa ḏ aryaz nnes. Ammu ƹaweḏ aryaz war itrayi ca x ddat nnes waḥḏes, traya xas uȓa ḏ ṯamɣarṯ nnes.
5 Itxeṣṣa war ṯqeṭṭƹem ca x wayawya illa meȓa ṯtafqem ak wayawya ij n lmudda waha, ḥima aḏ tucem ȓweqṯ nni i ṯẓaǧiṯ. Menbaƹd aḏ tmunem bac war kenniw itɣarri ca Cciṭan minzi war ṯzemmarem ca aḏ tḥekmem mliḥ x ccehweṯ nwem.
6 Walakin manaya maci ḏ ij n ȓuṣiyeṯ, qqareɣ-awem-t am yijjen n ttesriḥ.
7 Rezzuɣ nec belli marra iryazen aḏ iȓin am nec. Walakin kuȓ ijjen ɣares ṯizemmar iy ḏas yuca Arebbi, ijjen ɣares ṯa ijjen ɣares ṯin.
8 Fa ȓexxu aḏ ssiwȓeɣ x yinni war imȓicen ca u ḏ ṯajjaȓin ƹaweḏ. Mliḥ meȓa qqimen am nec.
9 Walakin meȓa war zemmaren ca aḏ ḥekmen x ccehweṯ nsen, labud aḏ meȓcen. Liʼanna meȓa meȓcen ḥsen zi meȓa qqimen ḥerqen s ccehweṯ.
10 Fa yinni imeȓcen, iweṣṣa xasen Siḏiṯneɣ maci ḏ nec: Memnuƹ ṯamɣarṯ aḏ tesmeḥ ḏeg uryaz nnes.
11 Meȓa ṯesmeḥ ḏeg uryaz nnes, itxeṣṣa-yas war tmeǧec ca ƹaweḏ, niɣ aḏ tmeṣȓaḥ ak uryaz nnes. Memnuƹ ƹaweḏ aryaz aḏ iǧef i ṯemɣarṯ nnes.
12 Fa yinni nneɣni, qqareɣ-asen nec (war t iqqar ca Siḏiṯneɣ, ɣir nec): Meȓa can umaṯneɣ ɣares ṯamɣarṯ maci ḏ ȓmumina nettaṯ ṯeqbeȓ xas aḏ tƹic akiḏes, memnuƹ aḏas iǧef.
13 Ƹaweḏ ṯamɣarṯ, meȓa ɣares aryaz maci ḏ ȓmumen netta iqbeȓ xas aḏ iƹic akiḏes, memnuƹ aḏas ṯeǧef.
14 Cuf, aryaz maci ḏ ȓmumen aqaṯ swadday i lƹinaya n Arebbi s ṯemɣarṯ nnes. Ṯamɣarṯ maci ḏ ȓmumina aqat swadday i lƹinaya n Arebbi s uryaz nnes. Meȓa maci amenni, ṯarwa nwem aḏ iȓin barra n lƹinaya n Arebbi. Maca ȓexxu aqaṯen swadday i lƹinaya nnes.
15 Innama, wenni niɣ ṯenni war yuminen ca meȓa ismeḥ, ṣafi aḏ ismeḥ. Ȓmumen ḏ ȓmumina ɣarsen lḥurriya s ḍḍuruf-a, liʼanna iȓaɣa-yawem-d Arebbi aḏ tƹicem ḏi ȓehna.
16 Cuf a ṯamɣarṯ, zaƹma manis ṯessneḏ cem bac aḏ tesnejmeḏ aryaz nnem? Y cek ay aryaz, zaƹma manis ṯessneḏ cek bac aḏ tesnejmeḏ ṯamɣarṯ nnec?
17 Walakin kuȓ ijjen aḏ iƹic ṯuḏarṯ nnes mamc ḏas t yuca Siḏiṯneɣ, kuȓ ijjen mamc ḏas d iȓaɣa Arebbi. Ammu tweṣṣiɣ ḏi marra ṯijumaƹ n ȓmuminin.
18 Ijjen, meȓa iȓaɣa-yas-d Arebbi u netta ggin-as ṭṭahareṯ,a maci aḏ d iƹqeb aḏ ikkes ṭṭahareṯ nni. Ijjen, meȓa iȓaɣa-yas-d Arebbi war ḏas ggin ca ṭṭahareṯ, maci aḏ irzu aḏ igg ṭṭahareṯ.
19 Meȓa itṭehhar niɣ war itṭehhir ca, manayenni itwaḥsab ḏ walu. Meȓa itegg ȓuṣiyaṯ n Arebbi ḏ manayenni ig itwaḥsaben.
20 Kuȓ ijjen aḏ iqqim ḏi lḥala iy ḏi tuɣa iǧa qbeȓ ma ḏas d iȓaɣa Arebbi.
21 Ma tuɣa cek ḏ ismeɣ wami ḏac d iȓaɣa? Bȓa ma ac icqa manaya. Walakin meȓa ɣarec lfurṣa aḏ trebḥeḏ lḥurriya nnec, egg-it.
22 Liʼanna wenni tuɣa iǧan ḏ ismeɣ wami ḏas d iȓaɣa Siḏiṯneɣ netta ȓexxu ɣares ij n lḥurriya ḏi Siḏiṯneɣ. Amenni wenni tuɣa iǧan ɣares lḥurriya ȓexxu netta iḏweȓ ḏ ismeɣ n Siḏiṯneɣ.
23 Ṣafi, isɣi-kenniw s yij n ttaman, war tarraṯ ca ixef nwem ḏ isemɣan n bnaḏem.
24 Ay ayṯma, aḏ iqqim kuȓ ijjen ḏi lḥala iy ḏi ḏas d iȓaɣa Arebbi.
25 Fa ȓexxu aḏ ssiwȓeɣ x ṯḥarmucin war imȓicen ca. War ɣari bu ȓuṣiyeṯ zi Siḏiṯneɣ, walakin ticceɣ array inu. Teyyqeṯ ḏayi ƹlaḥsab arraḥmeṯ n Siḏiṯneɣ.
26 Ƹlaḥsab ȓweqṯ-a iqesḥen, iƹni mliḥ meȓa iqqim bnaḏem mamc iǧa.
27 Cek, ma ɣarek ṯamɣarṯ? War rezzu ca aḏ tsemḥeḏ ḏi manaya. Ma war ɣarek bu ṯemɣarṯ? War rezzu ca x ṯemɣarṯ.
28 Walakin meȓa ṯmeȓceḏ maƹlic, war ṯeƹṣiḏ ca. Ƹaweḏ ṯaḥarmucṯ meȓa ṯemȓec maƹlic, war ṯeƹṣi ca. Walakin yinni imeȓcen aɣarsen iȓin lmacakil ḏi ddunect. Rezzuɣ nec axawem sbeƹƹḏeɣ manayenni.
29 Fa min rezzuɣ aḏ iniɣ ay ayṯma? Ȓweqṯ aqa ṯqarreb-d. Ssa aȓ ṯsawent yinni imeȓcen aḏ ƹicen axmi war mȓicen ca,
30 ḏ yinni itxeyyaqen axmi war txeyyiqen ca, ḏ yinni ifarrḥen axmi war farrḥen ca, ḏ yinni issaɣen axmi manayenni war ṯ tmelliken ca,
31 ḏ yinni ineffƹen zi ddunect-a axmi war zzayes neffƹen ca. Mayemmi? Minzi ṭṭabiƹa n ddunect-a war tdumi ca.
32 Fa rezzuɣ aḏ tiȓim bȓa amnus. Wenni war imȓicen ca ikessi amnus x cɣeȓ n Siḏiṯneɣ, iƹni mammec axas ɣa yarḍa Siḏiṯneɣ.
33 Walakin wenni imeȓcen ikessi amnus x cɣeȓ n ddunect-a, iƹni mammec axas ɣa ṯarḍa ṯemɣarṯ nnes.
34 Amnus nnes ifarreq s ṯnayen. Ṯamɣarṯ war imȓicen ca ḏ ṯenni ig iǧan ḏ ṯaƹzriṯ niṯenti kessint amnus x cɣeȓ n Siḏiṯneɣ, mammec iy ɣa xeḏment i Siḏiṯneɣ s ddat nsent ḏ wuȓ nsent. Ṯamɣarṯ imeȓcen nettaṯ ṯkessi amnus x cɣeȓ n ddunect-a, iƹni mammec axas ɣa yarḍa uryaz nnes.
35 Manaya qqareɣ-ṯ bac akenniw nefƹeɣ, maci bac akenniw sḥesȓeɣ. Lla, rezzuɣ aḏ tƹicem s lmaƹqul aḏ tƹebbḏem Siḏiṯneɣ bȓa can umnus nneɣni.
36 Fa wenni ixeḍben, meȓa war izemmar aḏ iṣbar x ṯḥenjirṯ nni iƹni war iḥekkem ca mliḥ x ccehweṯ nnes, ṣafi itxeṣṣa aḏ igg lwajib nnes iƹni aḏ imȓec maƹlic, netta war iƹeṣṣi ca.
37 Amma wenni iƹewwȓen mliḥ ḏeg wuȓ nnes aḏ ifsex ak ṯenni ig ixḍeb. Meȓa ikkes manaya ḏeg wuȓ nnes war ḏinni ḥetta ḥaja axas ṯzeyyar iƹni iḥekkem x ccehweṯ nnes, maƹlic aḏ igg mliḥ.
38 X manaya wenni imeȓcen akeḏ ṯenni ig ixḍeb, maƹlic aḏ igg mliḥ. U wenni war kiḏes imȓicen ca, maƹlic ḥsen ƹaweḏ.
39 Ṯamɣarṯ imeȓcen nettaṯ aḏ tiȓi x yiri n uryaz nnes meȓa iddar. Meȓa immuṯ, ɣares lḥurriya aḏ temȓec akeḏ wenni ṯxes nettaṯ, walakin ɣir meȓa ḏ ȓmumen zi Siḏiṯneɣ.
40 Maca s min twaȓiɣ nec, aḏ tfareḥ ktar meȓa ṯeqqim mammec ṯeǧa. Wah, tfekkareɣ belli uȓa ḏ nec iǧa akiḏi Arruḥ n Arebbi ḏi manaya.