Aysum itqeddamen i lʼaṣnam
8
1 Fa lmakla itqeddamen i lʼaṣnam. Neccin marra iḏneɣ ɣarneɣ ṯusna,a iƹni nessen ṯimesȓayin. Ṯusna-ya iy nessen tsuffa iwḏan s ttakebbur, walakin ȓemḥibbeṯ nettaṯ terni ḏayneɣ jjehḏ.
2 Ijjen meȓa itɣir-as issen, lla, war issin ca. Ƹaḏ itxeṣṣa-yas aḏ issen.
3 Maca wenni itḥibban Arebbi, Arebbi issen-iṯ netta.
4 Amma lmakla itqeddamen i lʼaṣnam, nessen belli iǧan lʼaṣnam ḏi ddunect walakin ḏ ixarriqen waha. Nessen neccin ij n Arebbi ig iǧan, waḥḏes.
5 Waxxa qqaren belli ḏinni arebbiṯen zaƹma ḏeg ujenna ḏ ṯmurṯ, iƹni arebbiṯen nsen mujud ḏ mawlanaṯ nsen mujud.
6 Walakin ɣarneɣ neccin ij n Arebbi waḥḏes, netta ḏ Babaṯneɣ. Zi netta ǧant marra ṯimesȓayin, neccin neǧa i netta. Ɣarneɣ ƹaweḏ ij n Siḏiṯneɣ, iƹni Ƹisa Lmasiḥ. Zi netta mizi xeȓqent marra ṯimesȓayin, zzayes mizi nexȓeq neccin.
7 Walakin maci marra iwḏan ssnen manaya. Ȓebƹaḍ n yiwḏan tuɣa ɣarsen lʼaṣnam ḏ ddin nsen ijheḏ. Meȓa tetten lmakla-ya itqeddamen i lʼaṣnam, ataf itɣir-asen manaya ḏ ṣṣaḥ. Ṯumma ḍḍamir nsen ixnez liʼanna aqaṯ iḍƹef.
8 Iwa maci ḏ lmakla iy ḏaneɣ ɣa isqarrben ɣar Arebbi. War ḏaneɣ ineffeƹ meȓa necca niɣ war necci ca.
9 Walakin ḥḍam ixef nwem bac lḥurriya-ya nwem ṯanita war ṯɣeṭṭeȓ ca yinni iḍeƹfen ḏi lʼiman nsen bac aḏ wḍan.
10 Cuf, wenni umi ɣar iǧa lʼiman iḍƹef. Maƹlik iẓri-c cek ɣarek ṯusna zaƹma tetteḏ ḏeg yij n zzawyiṯ n lʼaṣnam, iȓi ṯcejjƹeḏ-ṯ cek ḥima netta aḏ icc lmakla itqeddamen i lʼaṣnam, niɣ lla?
11 U s ṯusna nnec zaƹma aḏ theḏmeḏ umaṯneɣ wanita iḍeƹfen iy xef immuṯ Lmasiḥ.
12 Xmi ṯƹeṣṣim ayṯmaṯwem tḍarram ḍḍamir nsen iḍeƹfen, iƹni ḏ Lmasiḥ iy ṯƹeṣṣim.
13 X manaya meȓa lmakla inu ṯɣeṭṭeȓ uma ḏi ȓmuƹṣiyeṯ, ƹemmarṣ aḏ cceɣ aysum ƹaweḏ bac war ṯ ɣeṭṭȓeɣ ca.