Ȓḥaqq n ccarḍ iy ɣarsen ɣar yinni itrayan x ȓmuminin
9
1 Ɣari lḥurriya iƹni maci ḏ ismeɣ. Nec ḏ arrasul, ẓriɣ Siḏiṯneɣ Ƹisa. Yac ḏ kenniw iy iǧan ḏ nnatija n ȓxeḏmeṯ inu ḏi Siḏiṯneɣ, niɣ lla?
2 Meȓa war ǧiɣ ḏ arrasul i can yiwḏan nneɣnit, ataf i kenniw iy ǧiɣ ḏ arrasul. Liʼanna kenniw ḏ ddalil belli Siḏiṯneɣ igga-ayi nec ḏ arrasul.
3 Ḏ wa ḏ ddifaƹ inu ɣar yinni ḏayi iteggen lʼistijwab.
4 Iƹni, neccin ma war ɣarneɣ ȓḥaqq a necc a nsew?
5 Ma war ɣarneɣ bu ȓḥaqq a nawi akiḏneɣ ṯimɣarin ȓmuminaṯ mammec ggin arrusul nneɣni ḏ ayṯmas n Siḏiṯneɣ ḏ Buṭrus?
6 Ma nec ḏ Barnaba waḥeḏneɣ iy war ɣarneɣ bu ȓḥaqq ḏi ccarḍ, itxeṣṣa-yaneɣ i neccin a nexḏem ḏi ca nneɣnit bac a nƹic?
7 Cuf, ma iǧa ḥadd iy ɣa yaḏfen ḏi ȓƹaskar bȓa ma aṯ xeǧsen? Lla! Ma iǧa ḥadd iy ɣa iẓẓun ṯzayarṯ uḍiȓ bȓa ma aḏ icc ṯizewrin nnes? Lla! Ma iǧa ḥadd iy ɣa irewsen ṯḥimerṯ bȓa ma aḏ isew aɣi nnes? Lla!
8 Ma qqareɣ manaya ɣir ƹlaḥsab n array n bnaḏem? Lla, ƹlaḥsab n array n Ccariƹa iqqar kif-kif.
9 Iƹni iqqar Lkitab n Musa: War tegg bu ṯacmant i uqemmum n uyenduz xmi itiȓi iṣarwaṯ. Ma i iyenduzen waha umi iticc Arebbi lhimma?
10 Niɣ iqqar-it marra ƹlaḥsab neccin? Wah, iqqar-it ƹlaḥsab neccin. Liʼanna wenni icerrzen ḏ wenni iṣarwaṯen labud aḏ rezzun aḏ ccen zi ṯfeǧaḥṯ nni.
11 Meȓa tuɣa nezreƹ ṯimesȓayin n ujenna jarawem, ma ḏ aṭṭas xaneɣ meȓa nemjar zzaywem ṯimesȓayin n ṯmurṯ?
12 Meȓa iwḏan nneɣnit ɣarsen ȓḥaqq nni n ccarḍ aḏasen ṯucem, yak neccin ɣarneɣ ȓḥaqq-a ktar niɣ lla?
Walakin neccin nugi a nkessi ȓḥaqq-a wanita. Lla, nṣebbar aṭṭas i ṯmesȓayin bac war netbellaƹ ca ṯawwarṯ i Lʼinjil.
13 Ma war ṯessinem ca yinni ixeddmen ḏi ṯemziḏa kessin-d lmakla nsen zzayes, ḏ yinni ixeddmen ḏi ȓmeḏbaḥ kessin-d ȓḥaqq nsen zi min itwaɣarrṣen ḏi ȓmeḏbaḥ?
14 Amenni uȓa ḏ yinni itbeccaren s Lʼinjil, yumar xasen Siḏiṯneɣ aḏ kessin ccarḍ nsen zi Lʼinjil.
15 Walakin nec war ksiɣ uȓa ḏ ijjen zi ȓḥuquq nni. Ƹaweḏ nec war tariɣ ca ṯabrat-a ȓexxu bac ataf kenniw aḏayi ṯucem ȓḥuquq nni. Lla, nec ḥsen meȓa mmuṯeɣ qbeȓ ma aḏayi ikkes ḥadd manaya iy zi ɣa ftaxreɣ.
16 Walakin meȓa tbeccareɣ, war ɣari iy zi ɣa ftaxreɣ liʼanna labud aḏ beccareɣ. Ya tamara xafi nec maƹlik war tbeccareɣ ca!
17 Meȓa beccareɣ s ȓxaḍar inu, aḏayi ijaza Arebbi. Meȓa war iǧi bu s ȓxaḍar inu, iƹni teggeɣ ij n lmesʼuliya bezzez xafi waha.
18 Iḏen, min iƹna ccarḍ inu? Ccarḍ inu ḏ wa: Xmi tbeccareɣ s Lʼinjil tqeddameɣ-ṯ baṭeȓ iƹni maci ƹlaḥsab ȓḥaqq n ccarḍ-a iy ɣari ḏi Lʼinjil.
19 Waxxa nec war ɣari bu bab inu, arriɣ ixef inu zaƹma ḏ ismeɣ i marra bac aḏ rebḥeɣ aṭṭas n zziyada n yiwḏan.
20 Nec arriɣ ixef inu am yijjen ḏ aʼisraʼili ɣar Ayṯ-Israʼil bac aṯen rebḥeɣ. Arriɣ ixef inu am yijjen minxef teḥkam Ccariƹa n Musa ɣar yinni minxef teḥkam Ccariƹa n Musa bac aṯen rebḥeɣ (waxxa nec war xafi teḥkim ca Ccariƹa nni).
21 Arriɣ ixef inu am yijjen bȓa Ccariƹa n Musa ɣar yinni war ɣarsen ṯeǧi ca Ccariƹa n Musa bac aṯen rebḥeɣ (waxxa nec war ǧiɣ ca bȓa ccariƹa n Arebbi, nec teḥkam xafi ccariƹa n Lmasiḥ).
22 Arriɣ ixef inu am yijjen iḍƹef ɣar yinni iḍeƹfen bac aṯen rebḥeɣ. Arriɣ ixef inu ḏ marra i marra iwḏan bac aḏ ggeɣ marra lʼimkaniyaṯ aḏ snejmeɣ ca zzaysen.
23 Teggeɣ marra manaya ƹlaḥsab Lʼinjil ḥima aḏ carceɣ nec ḏi lbarakaṯ nnes.
24 Ma war ṯessinem ṯazȓa nni iteggen ḏi lmelƹab? Marra tazzȓen maca ḏ ijjen waha iy ɣa irebḥen ljaʼiza. Ammeni itxeṣṣa uȓa ḏ kenniw aḏ tazȓem bac at ṯrebḥem.
25 Marra yinni itemƹanaḏen ḏi lmelƹab tḥakamen x ddat nsen ḏi ṯmesȓayin marra. Teggen manaya bac aḏ d awin ij n ttaj iƹni war ḏasen itdumi ca. Walakin neccin ntegg manaya bac a d nawi ij n ttaj itduman i ȓebda.
26 X manaya war tizzȓeɣ ca bȓa lʼitijah, war cciṯeɣ ca s ȓbuks am wenni iccaṯen ḏi lhawa waha.
27 Lla, tzeyyareɣ x ddat inu tarriɣ-t ḏ ṯismeɣṯ inu. Ammu aḏ beccareɣ iwḏan nneɣnit, u ɣar uneggaru war ǧiɣ ca jar n yinni iy ṯen isufɣen bȓa ljaʼiza.