Ṯaɣennant n Ayṯ-Israʼil ḏ ij n lmiṯal i neccin
10
1 Cuf ay ayṯma, war xseɣ ca aḏ tettum belli ȓejḏuḏ nneɣ tuɣaṯen marra iḏsen swadday i useynua nni iḥeṭṭa-ṯen. Marra iḏsen zwan ɣar ujemmaḍ-in n Ȓebḥar Azeggwaɣ.b
2 Marra iḏsen twaṭehharen s waman ƹlaḥsab i Musa wami ƹḏun ḏeg useynu nni ḏ ȓebḥar nni.
3 Marra iḏsen ccin zeg yij n lmakla ruḥiya.
4 Marra iḏsen swin zeg yij n ṯsessi ruḥiya. Liʼanna niṯni swin zeg uɣbaȓ n uzruc nni ruḥiya iy ṯen iḏeffaren, u aɣbaȓ n uzru nni tuɣaṯ netta ḏ Lmasiḥ.
5 Waxxa amenni ȓebƹaḏ zzaysen waha mixef yarḍa Arebbi, menḍaren ḏinni ḏ immurḍas ḏi ȓexȓa nni.
6 Ṯimesȓayin nni weqƹent ḏ ij n lmiṯal i neccin. Mayemmi? Ḥima war ḏayneɣ itiȓi mezȓi x ccerr mammec tuɣa cehhan niṯni.
7 War ƹebbḏeṯ ca lʼaṣnam mammec ggin ȓebƹaḍ iḏsen. Mammec iqqar Lkitab: "Iwḏan nni qqimen aḏ swen aḏ ccen, kkaren aḏ zhun."
8 Itxeṣṣa war nfesseḏ ca mammec ggin ȓebƹaḍ iḏsen, mmuṯen wḍan ɣar ṯmurṯ can ṯȓaṯa u ƹicrin aȓef iḏsen ḏeg yij n nhar.
9 Itxeṣṣa war nzeƹƹem ca a nẓer Lmasiḥ min ɣa igg netta, mammec ggin ȓebƹaḍ iḏsen uca twanɣen s ifiɣeran.
10 Itxeṣṣa war netceṯca ca mammec ggin ȓebƹaḍ iḏsen wami xasen iqḍa Ƹazȓayen.
11 Weqƹent-asen ṯimesȓayin-a am ij n lmiṯal i neccin. Zemmmen-ṯent ḥima azzaysent neȓmeḏ, iƹni xeḍȓent-id xaneɣ neccin aȓ uneggaru n zman.
12 S manaya itxeṣṣa-yas i wenni umi itɣiȓ qa ibedd war iweṭṭi ca, bac aḏ d yarr ȓbaȓ nnes.
13 Ṯimesȓayin nni ṯinni ig itiȓin ȓebda akeḏ bnaḏem ḏ ṯinni iy c itɣarran. U Arebbi netta ḏayes ttiqeṯ, war kenniw itejji ca aḏ twaɣarram s min war ṯzemmarem ca aḏas ṯeṣbarem. Lla, aḏawem iḏebbar ij n ṯewwarṯ ḥima aḏ teṣbarem i manaya.
14 S manayenni ay ayṯma iƹizzen inu, rewȓeṯ zi lʼaṣnam.
15 Ssawaȓeɣ akiḏwem ɣarwem ȓaƹqeȓ nwem, meyyzeṯ x min qqareɣ ma ḏ ṣṣaḥ niɣ lla.
16 Ȓkas nni n lbaraka iy netbarak neccin, iƹni zzayes zi netta iy ncarrec ḏeg iḏammen n Lmasiḥ. Aɣrum nni iy netrezza, iƹni zzayes zi netta iy ncarrec ḏi ddat n Lmasiḥ.
17 Ḏinni ij n ṯxebbast n uɣrum waḥḏes, s ssabab-a neccin ḏ ijjen waxxa ḏinni aṭṭas iḏneɣ. Minzi neccin marra iḏneɣ ncarrec ḏeg yijjen n ṯxebbast.
18 Fekkareṯ ḏi Ayṯ-Israʼil, yak yinni itetten dbiḥaṯ niṯni carrcen ḏi ȓmeḏbaḥ nni, niɣ lla?
19 Min xseɣ aḏ iniɣ? Ma qqareɣ nec belli lmakla nni itqeddamen i lʼaṣnam nettaṯ ḏ ca ḥaja? Niɣ qqareɣ belli lʼaṣnam niṯni ḏ ca ḥaja?
20 Lla, walakin qqareɣ belli lkuffar min ɣarrṣen ḏ dbiḥaṯ tqeddamen-ṯent i ccayaṭin maci i Arebbi. Nec war xseɣ ca akisen ṯcarcem ak ccayaṭin.
21 War ṯzemmarem aḏ teswem zi ȓkas n Siḏiṯneɣ ḏ ȓkas n ccayaṭin s ṯnayen iḏsen. War ṯzemmarem aḏ tcarcem missa n Siḏiṯneɣ ḏ missa n ccayaṭin s ṯnayen iḏsent.
22 Ma nrezzu a nesƹeṣṣeb Siḏiṯneɣ s lɣira? Ma nejheḏ xas neccin?
Lḥurriya n ȓmuminin
23 Marra ṯimesȓayin ḥeǧȓent, walakin maci marra ṯimesȓayin stenfaƹent. Marra ṯimesȓayin ḥeǧȓent, walakin maci marra ṯimesȓayin aḏaneɣ sjehḏent.
24 War rezzuṯ ca ȓxir i yixef nwem, rzum-ṯ i wajjar nwem.
25 Cceṯ min ma ṯufim itmenza ḏi ssuq n igezzaren, war tseqsam jjeṯ ḍḍamir nwem mertaḥ.
26 Liʼanna iqqar: "Ṯamurṯ nettaṯ ḏ marra min ḏayes n Siḏi Arebbi."
27 Meȓa can yijjen maci ḏ ȓmumen iƹred-ikenniw bac aḏ teccem akiḏes u kenniw ṯrezzum aḏ traḥem, cceṯ min ma sersen zzaṯ nwem, war tseqsam war rezzuṯ ḍḍamir nwem mertaḥ.
28 Walakin meȓa inna-awem ca ḥadd qa manaya qeddmen-ṯ ḏ dbiḥeṯ i lʼaṣnam, war t tettem ca. Manaya ƹlaḥsab wenni iy ḏawem ṯ innan u ƹlaḥsab ḍḍamir.
29 Iƹni ḍḍamir n wenni iy kenniw iƹerḍen, maci ḍḍamir nwem. Ȓaḥeqqac mayemmi ḍḍamir n yijjen nneɣnit aḏ iḥkem x lḥurriya inu?
30 Meȓa cekkareɣ Arebbi x can lmakla, mayemmi iy ḏayi ɣa ḥasben x manayenni iy zi cekkareɣ Arebbi?
31 Iḏen, meȓa ṯsessem niɣ tettem niɣ min ma teggem, ggeṯ marra manayenni bac aḏ itwasemɣar Arebbi.
32 War ɣeṭṭȓeṯ ḥadd waxxa niṯni ḏ iʼisraʼilyen niɣ ḏ iyunaniyen niɣ ḏ jmaƹeṯ n ȓmuminin n Arebbi.
33 Nec rezzuɣ aḏ sarḍiɣ marra iwḏan ḏi marra min teggeɣ. War rezzuɣ ca ȓxir i yixef inu, rezzuɣ-ṯ i marra iwḏan bac aḏ nejmen.