Ȓmuminaṯ ḏi lƹibada
11
1 Ḏeffarem-ayi-d mammec nec ḏeffareɣ Lmasiḥ.
2 Fa tcekkareɣ-kenniw liʼanna teƹqaȓem xafi ḏi marra ṯimesȓayin u ṯḥeffḍem ṯɣuri nni mammec ḏawem t sȓemḏeɣ nec.
3 Walakin xseɣ akenniw sfehmeɣ mliḥ qa azeǧif n mkuȓ aryaz netta ḏ Lmasiḥ u ḏ netta ig itrayan. Azeǧif n mkuȓ ṯamɣarṯ netta ḏ aryaz u ḏ netta ig itrayan. Azeǧif n Lmasiḥ netta ḏ Arebbi u ḏ netta ig itrayan.
4 Mkuȓ aryaz ig itẓaǧan niɣ issawaȓ s min iƹȓem zi Arebbi, meȓa azeǧif nnes netta iɣemmes ataf netta war itweqqar ca azeǧif nnes.
5 Mkuȓ ṯamɣarṯ itẓaǧan niɣ ṯessawaȓ s min ṯeƹȓem zi Arebbi, meȓa azeǧif nnes war iɣemmes ca ataf war tweqqar ca azeǧif nnes. Itwaḥsab axmi azeǧif nnes iḥessen ḏ aqeccar.
6 Meȓa ṯamɣarṯ tagi aḏ teɣmes i uzeǧif nnes ḥsen meȓa ṯḥessen acewwaf nnes. Walakin ḏ ij n ȓefḍiḥeṯ ṯamɣarṯ aḏ tḥessen niɣ aḏ tḥessen ḏ ṯaqeccarṯ, iƹni itxeṣṣa aḏ teɣmes i uzeǧif nnes.
7 Cuf, aryaz itxeṣṣa-yas war iɣemmes ca i uzeǧif nnes liʼanna netta ḏ ṣṣifeṯ ḏ ccenƹeṯ n Arebbi walakin ṯamɣarṯ nettaṯ ḏ ccenƹeṯ n uryaz.
8 Aryaz war d itwaxȓiq ca zi ṯemɣarṯ.a Lla, ṯamɣarṯ iy d itwaxeȓqen zeg uryaz.
9 Ƹaweḏ aryaz war d itwaxȓiq ca i ṯemɣarṯ. Lla, ṯamɣarṯ iy d itwaxeȓqen i uryaz.b
10 S manayenni u ƹlaḥsab lmalaʼikaṯ itxeṣṣa-yas i ṯemɣarṯ aɣares ṯiȓi ij n lƹalama n ssulṭa x uzeǧif nnes.
11 Innama ḏi Siḏiṯneɣ ṯamɣarṯ taƹtama-d x uryaz, aryaz itaƹtama-d x ṯemɣarṯ.
12 Liʼanna mammec ṯexȓeq ṯemɣarṯ zeg uryaz, uȓa ḏ aryaz ixeǧeq-d ȓexxu zi ṯemɣarṯ. U marra zi Arebbi.
13 Ḥekmeṯ s yixef nwem. Ma maƹqul ṯamɣarṯ aḏ teẓẓaǧ i Arebbi bȓa ma aḏ teɣmes i uzeǧif nnes?
14 Yak ddunect s yixef nnes nettaṯ ṯseȓmaḏ-kenniw belli ḏ ij n ȓƹib meȓa aryaz ijja acewwaf ḏ azeyrar, niɣ lla?
15 Walakin ṯamɣarṯ meȓa ṯejja acewwaf ḏ azeyrar netta ḏ ij n ccan nnes. Liʼanna acewwaf nni azeyrar immuc-as bac azzayes ṯeɣmes i uzeǧif nnes.
16 Meȓa irzu can ḥadd aḏ imɣannen x manaya, neccin war nennum ca can lƹada nneɣnit, war t nnument ca ṯjumaƹ n ȓmuminin n Arebbi.
Amensi n Siḏiṯneɣ
17 Nec tweṣṣiɣ-kenniw, ȓexxu war kenniw tcekkareɣ ca. Mayemmi? Liʼanna ṯijumaƹ nwem tḍarrant ktar zi min neffƹent.
18 Ḏ amezwaru, xmi tmunem jmaƹeṯ n ȓmuminin tesȓiɣ belli tiȓin jarawem lxilafaṯ, u nec tamneɣ manaya ḏayes cway n ṣṣaḥ.
19 Ȓaḥeqqac wa labud aḏ iȓin lxilafaṯ jarawem bac aḏ banen yinni iǧan nican jarawem.
20 Xmi tmunem kenniw, ma ḏ amensi nican n Siḏiṯneɣ iy tettem ḏinni? Lla, walu.
21 Mayemmi? Liʼanna kuȓ ijjen min itegg: ijjen itraḥ itett waha bȓa ma aḏ iraja wenni nneɣni, ijjen iǧuz, ijjen isess aṭṭas n waman uḍiȓ.
22 Cuf, ma war ɣarwem bu ṯuḏrin mani iy ɣa ṯeccem niɣ ḏ mani iy ɣa ṯeswem? Kenniw, ma tseḥqarem jmaƹeṯ n ȓmuminin n Arebbi tḥeggarem yinni war ɣar iǧi walu? Min ḏawem ɣa iniɣ? Ma kenniw iy ɣa cekkareɣ x manaya? Lla, walu.
23 Cuf, nec aqa min ḏayi yuca Siḏiṯneɣ u ḏ manaya iy ḏawem d siwḍeɣ: Ḏi ǧiȓeṯ nni iy ḏi immenz Siḏiṯneɣ Ƹisa iysi-d netta aɣrum,
24 wami ickar Arebbi irez-iṯ inna: "Wa ig iǧan ḏ ddat inu iy ɣa immucen ƹlaḥsab kenniw. Teggeṯ manaya ḥima aḏayi ṯfekkarem."
25 Ammu ƹaweḏ wami kemmȓen amensi nni, iysi-d netta ȓkas, inna: "Ȓkas-a ḏ ȓƹaheḏ ḏ jḏiḏ s iḏammenc inu. Teggeṯ manaya meȓmi ma ṯ ṯeswim, ḥima aḏayi ṯfekkarem."
26 Minzi meȓmi ma ṯeccim aɣrum-a ḏ meȓmi ma ṯeswim zi ȓkas-a, aqa txebbarem s ȓmewṯ n Siḏiṯneɣ aȓ d ɣa yas.
27 Aqa wenni iy ɣa iccen aɣrum-a n Siḏiṯneɣ niɣ ḏ wenni iy ɣa iswen zi ȓkas-a nnes walakin war ḏasen iticc ca lqima, ataf netta igga ȓmuƹṣiyeṯ ḏ ṯameqqrant ak ddat ḏ iḏammen n Siḏiṯneɣ.
28 Iwa itxeṣṣa-yas i bnaḏem aḏ irajeƹ ixef nnes qbeȓ iy ɣa icc aɣrum-a, qbeȓ iy ɣa isew zi ȓkas-a.
29 Aqa wenni itetten isessen bȓa ma aḏ iƹqeȓ nican x ddat n Siḏiṯneɣ, ataf netta itett isess lƹiqab i yixef nnes.
30 S manayenni ḏinni aṭṭas jarawem ig iǧan ḍeƹfen heȓcen ḏ can ȓebƹaḍ zzaywem mmuṯen.
31 Maƹlik nḥekkem x yixef nneɣ nican, ataf neccin war netwaḥkam ca.
32 Xmi xaneɣ itaḥkam Siḏiṯneɣ iƹni netta inehha-yaneɣ bac war nkessi ca lƹiqab n ddunect-a.
33 X manaya ay ayṯma, xmi tmunem aḏ teccem rajaṯ ayawya.
34 Meȓa iǧuz can yijjen, itxeṣṣa-yas aḏ icc ḏi ṯeddarṯ nnes bac xmi tmunem ataf war kenniw itḥissib ca Arebbi.
Xmi d ɣa aseɣ nec akenniw weṣṣiɣ x ṯmesȓayin nni nneɣnit.