Arruḥ iqeddsen iticcen lqudraṯ i ȓmuminin
12
1 Fa amma war xseɣ ca aḏ tqefȓem ixef nwem x lqudraṯ ruḥiyaṯ ay ayṯma.
2 Ṯessnem belli wami tuɣa kenniw ḏ lkuffar twasufɣem zeg ubriḏ ɣar lʼaṣnam izeynunen.
3 X manayenni xseɣ aḏ tfehmem mliḥ belli war ḏinni ḥadd aḏ yini s Arruḥ n Arebbi <qa Ƹisa itwanƹeȓ>! Ƹaweḏ war ḏinni ḥadd aḏ yini <qa Ƹisa ḏ Mawlana> illa s Arruḥ iqeddsen.
4 Fa ḏinni lʼanwaƹ n lqudraṯ, walakin Arruḥ ḏinni ijjen.
5 Ḏinni lʼanwaƹ n lmesʼuliyaṯ, walakin Siḏiṯneɣ ḏinni ijjen.
6 Ḏinni lʼanwaƹ n ȓexḏayem, walakin Arebbi ḏinni ijjen iƹni ḏ netta iy ṯent isxeddamen marra ḏi kuȓ bnaḏem.
7 Immuc-as i kuȓ ijjen iy zi ɣa iseḍhar ȓxeḏmeṯ n Arruḥ iqeddsen aḏ infeƹ marra iwḏan.
8 Ijjen immuc-as s ufus n Arruḥ iqeddsen bac aḏ issiweȓ s lḥikma. Ijjen immuc-as wawaȓ n ṯusnaa s ufus n Arruḥ-a wanita.
9 Ijjen immuc-as lʼiman ijheḏ s ufus n Arruḥ-a wanita. Ijjen mmucent-as can lqudraṯ bac aḏ isgenfa s ufus n Arruḥ-a wanita.
10 Ijjen immuc-as aḏ igg lmuƹjizaṯ. Ijjen immuc-as aḏ issiweȓ s min iƹeȓmen zi Arebbi. Ijjen mmucent-as ṯizemmar aḏ imeyyez jar n arruḥaṯ. Ijjen immuc-as aḏ issiweȓ s ȓebƹaḍ n lluɣaṯ ruḥiyaṯ. Ijjen immuc-as aḏ istarjem lluɣaṯ nni.
11 Marra ṯimesȓayin-a ṯina twasxeddament s ufus n yij n Arruḥ, wanita. Ifareq-iṯent i kuȓ ijjen waḥḏes mammec ixes netta.
Marra neccin ḏ ij n ddat ḏi Lmasiḥ
12 Cuf, ddat nneɣ nettaṯ ḏ icten ɣares aṭṭas n ṭrufaṯ, walakin ṭrufaṯ-a waxxa niṯni ḏ aṭṭas aqaṯen ḏ ijjen. Ammu iǧa Lmasiḥ.
13 Liʼanna neccin marra netwaṭehhar s waman s yij n Arruḥ bac a niȓi ḏ ij n jmaƹeṯ, iƹni Ayṯ-Israʼil niɣ ḏ iyunaniyen, ḏ yinni ɣar iǧa bab nsen niɣ ḏ yinni ɣarsen lḥurriya nsen. Neccin marra iḏneɣ yuca-aneɣ a nsew iƹni a ncarec ḏeg yij n Arruḥ.
14 Ȓexxu cuf, ddat war ɣares ca ij n ṭṭarf waha. Lla, ɣares aṭṭas n ṭrufaṯ.
15 Meȓa inna uḍar nnes qa nec war ǧiɣ bu ḏ fus nec war ǧiɣ ca zi ddat-a, iƹni maci s wawaȓ-a iy zi ɣa iffeɣ zi ddat nni.
16 Meȓa inna umejjun nnes qa nec war ǧiɣ bu ḏ ṯiṭṭ nec war ǧiɣ ca zi ddat-a, iƹni maci s wawaȓ-a iy ɣa iffeɣ zi ddat nni.
17 Meȓa ddat ṯekmeȓ nettaṯ ḏ ij n ṯiṭṭ, manis ɣa ṯṣenneṭ? Meȓa ddat ṯekmeȓ nettaṯ ḏ ij n umejjun, manis ɣa ṯcumm?
18 Walakin ȓexxu Arebbi isettef ṭrufaṯ n ddat kuȓ icten mammec ixes netta at igg.
19 Iwa maƹlik marra ṭrufaṯ-a tuɣa ḏ ijjen, mani ṯeǧa ddat?
20 Ȓexxu ḏinni aṭṭas n ṭrufaṯ walakin ḏinni ij n ddat.
21 Fa ṯiṭṭ war ṯzemmar aḏas ṯini i ufus qa nec war c teḥḏijiɣ ca. Niɣ ƹaweḏ azeǧif aḏasen yini i iḍaren qa nec war kenniw teḥḏijiɣ ca.
22 Lƹaks, ṭrufaṯ nni n ddat iy ḏaneɣ itɣiȓ ḍeƹfent ȓa ḏ niṯenti twaḥḏajant ktar.
23 Ṭrufaṯ nni n ddat iy ḏaneɣ itɣiȓ war ɣarsen bu lqima, ntegg-asen lqima ktar. Ƹaweḏ ṭrufaṯ nneɣ iy war tbinen ca, netseḏḥa zzaysent ktar.
24 Walakin ṭrufaṯ nneɣ iy tbanen war teḥḏijin ca azzaysen nseḏḥa. Iƹni Arebbi igga lƹaks, isettef ṭrufaṯ n ddat bac aḏ yuc lqima i ṭṭarf nni iteḥḏajan lqima.
25 Ammu war iǧi bu lxilaf ḏi ddat. Lla, aḏ thellan ḏeg waywaya kif-kif.
26 Meȓa itƹeddab yijjen, twaƹeddaben s kuȓci. Meȓa ijjen immuc-as lqima, ataf aḏ farḥen akiḏes marra.
27 Fa kenniw ḏ ddat nni iƹni ḏ jmaƹeṯ n Lmasiḥ, kuȓ ijjen zzaywem ḏ ijjen ṭṭarf nnes.
28 Ḏi jmaƹeṯ n ȓmuminin iretteb Arebbi ḏ amezwaru arrusul, wis ṯnayen lʼanbiya, wis ṯȓaṯa imseȓmaḏen, menbaƹd yinni isxeddamen lmuƹjizaṯ ḏ yinni ɣar ǧant lqudraṯ bac aḏ sgenfan, ḏ yinni itƹawanen, ḏ yinni itkellafen s ȓxeḏmeṯ, ḏ yinni issawaȓen s ȓebƹaḍ n lluɣaṯ ruḥiyaṯ.
29 Ma zaƹma marra iḏsen ḏ arrusul? Ma marra iḏsen ḏ lʼanbiya? Ma marra iḏsen ḏ imseȓmaḏen? Ma marra iḏsen sxeddamen lmuƹjizaṯ?
30 Ma marra iḏsen ɣarsen lqudraṯ aḏ sgenfan? Ma marra iḏsen ssawaȓen s lluɣaṯ ruḥiyaṯ? Ma marra iḏsen starjamen?
31 Fa kenniw ṯrezzum aṭṭas x lqudraṯ yuƹȓan, maca aḏawem cerrḥeɣ ij n ubriḏ yuƹȓan zi marra ibriḏen.