3
1 Neccin, ma nebḏa a ncekkar ixef nneɣ ƹaweḏ zaƹma bac aḏawem nqeddem ixef nneɣ? Ma neccin am ca n iṯarrasen itḥaḏajen ṯibraṯin bac axaneɣ cehhḏent, iƹni ṯibraṯin nni aḏ d asent zzaywem niɣ aɣarwem d asent?
2 Lla, kenniw s yixef nwem ḏ ṯabrat nneɣ iƹni ṯcehhḏem xaneɣ. Ṯabrat-a ṯura ḏeg wuȓawen nneɣ, ssnen-teṯ qqaren-teṯ marra iwḏan.
3 Ṯbanem-d belli kenniw am yij n ṯebrat zi Lmasiḥ, nsiweḍ-it neccin. War ṯuri ca s smex,a ṯura s Arruḥ n Arebbi iddaren. War ṯenqic ca ḏi ṯeȓwiḥin n uzru, ṯenqec ḏi ṯeȓwiḥin n wuȓawen n bnaḏem.
4 Manaya neqqar-iṯ s ttiqeṯ iy ɣarneɣ ḏi Arebbi s Lmasiḥ.
5 Iƹni marra manaya war ḏas nzemmar ca neccin s yixef nneɣ. War netḥessib ca belli ṯizemmar-a tasent-id zzayneɣ, tasent-id zi Arebbi.
6 Ḏ netta iy ḏaneɣ yucin ṯizemmar bac a niȓi ḏ ixeddamen n yij n Ȓƹaheḏ ḏ jḏiḏ. Ȓƹaheḏ-a maci s Ccariƹa, s Arruḥ n Arebbi. Liʼanna Ccariƹa ṯneqq, Arruḥ n Arebbi netta iseddar.
Lƹaḍama n Ȓƹaheḏ ḏ jḏiḏ
7 Fa Ccariƹa nni n ȓmewṯ, ṯira nnes neqcent ḏi ṯeȓwiḥin n uzru. Ccariƹa nni ṯusa-d s yij n lƹaḍama ḏ ṯameqqrant, ataf Ayṯ-Israʼil tuɣa war zemmaren aḏ qqimen xezzaren ḏeg uɣembub n Musa ƹlaḥsab lƹaḍama nni iy zzayes itceƹciƹen waxxa xmi ḏas traḥ lƹaḍama nni.
8 Ȓexxu ȓƹaheḏ ruḥiya, lƹaḍama nnes ktar aṭṭas zi ṯen nneɣni!
9 Meȓa ḏayes ijjen n lƹaḍama ḏi Ccariƹa nni iy d itawin lḥisab ḏ lƹiqab, ȓƹaheḏ-a iy d itawin ṣṣulḥ ataf lƹaḍama nnes ṯemɣar ktar aṭṭas zi ṯen nneɣni.
10 Ḏ ṣṣaḥ min tuɣa ɣares lƹaḍama, ȓexxu war ɣares ṯeqqim ca lƹaḍama iƹni zzaṯ i lƹaḍama-ya ṯameqqrant aṭṭas n ȓƹaheḏ ruḥiya.
11 Cuf, min itwatekksen iƹni Ccariƹa nni, meȓa ṯusa-d s yijjen n lƹaḍama, wa labud lƹaḍama-ya n ȓƹaheḏ itduman aḏ tiȓi ktar aṭṭas zi ṯen nneɣni!
12 Iḏen, meȓa ɣarneɣ ij n lʼamal am wanita ataf ɣarneɣ ij n zƹameṯ.
13 War neǧi ca am Musa tuɣa iɣemmes i uɣembub nnes s yij n ltamb bac war tɣimin ca Ayṯ-Israʼil txezzaren ḏayes xmi ḏas itraḥ uceƹceƹ nni.
14 Niṯni ȓaƹquȓ nsen twaqesḥen war fehhmen ca. Aȓ nhara xmi ɣa ɣren ḏi Ȓƹaheḏ nni aqḏim ƹaḏ tafen ltam nni ḏayes. Ltam nni war itwakkes ca, ɣir s Lmasiḥ iy ɣa itwakkes.
15 Wah, aȓ nhara xmi ɣa ɣren Ayṯ-Israʼil ḏi Lkitab n Musa uȓawen nsen ɣemmsen s yij n ltam.
16 Walakin xmi ɣa yamen can yijjen zi Siḏiṯneɣ, aḏas itwakkes ltam nni.
17 Cuf, Siḏiṯneɣ netta ḏ Arruḥ, u mani ma iǧa Arruḥ n Siḏiṯneɣ teǧa lḥurriya ruḥiya.
18 Ȓexxu neccin aɣembub nneɣ war ḏas iɣmis walu. Netwaȓa lƹaḍama n Siḏiṯneɣ, netwabeddaȓ bac a niȓi ḏ ṣṣifeṯ nnes s yij n lƹaḍama itmernin. Manaya itas-d zi Siḏiṯneɣ ig iǧan ḏ Arruḥ.