Lʼinjil nnur nnes itceƹciƹ ḏi ṯaǧest
4
1 X manaya, war ntefciȓ ca minzi ɣarneɣ ȓƹaheḏ-a wanita s arraḥmeṯ n Arebbi.
2 Neccin netbeƹƹaḏ x ṯmesȓayin n ȓefḍiḥeṯ ig itwaxeddmen s ṯnufra. War nesxeddim ca ṯaḥraymiṯ, war netḥerrif ca awaȓ n Arebbi. Neccin zzaṯ i Arebbi nseȓmaḏ lḥaqiqa bȓa ma at nesnuffar. Ammu aḏ ssnen marra iwḏan ḏi ḍḍamir nsen belli ḏayneɣ ttiqeṯ.
3 Lʼinjil nneɣ meȓa iɣemmes s yijjen n ltam,a iɣemmes ɣir i yinni ifennan.
4 Yinni war yuminen ca ȓaƹquȓ nsen isṭemmeṣ-iṯen Ibȓis wenni iḏewȓen ḏ arebbi n ddunect-a zaƹma. Niṯni war zemmaren aḏ ẓren nnur n Lʼinjil iƹni lƹaḍama n Lmasiḥ, netta iǧan ḏ ṣṣifeṯ n Arebbi.
5 War netbeccar ca s yixef nneɣ, netbeccar s Ƹisa Lmasiḥ iƹni netta ḏ Siḏiṯneɣ. U neccin ḏ ixeddamen nwem ƹlaḥsab Ƹisa.
6 Ḏ Arebbi ig innan: "Nnur aḏ iceƹceƹ zi ṯaǧest." Ḏ Arebbi-ya ig iceƹcƹen ḏeg wuȓawen nneɣ bac a nessen lƹaḍama n Arebbi ig itceƹciƹen ḏeg wuḏem n Ƹisa Lmasiḥ.
Ȓkenz iy ɣarneɣ ḏi iɣerrafen n ucaȓ
7 Fa ȓkenz-a wanita itiȓi ɣarneɣ ḏeg iɣerrafen n ucaȓ iƹni ḏi ddat nneɣ, bac aḏ d imeḍhar belli jjehḏ-a ameqqran aṭṭas itas-d zi Arebbi maci zzayneɣ.
8 Neccin netwazeyyar zi mkuȓ jjihet, walakin war netwaḥesseȓ ca. War nessin ca mani ɣa narr s uzeǧif, walakin war ntefciȓ ca.
9 Netwaƹeddab, walakin war neqqim ca waḥeḏneɣ. Netwaɣḍeȓ, walakin war nerriz ca.
10 Ȓebda nrebbu ḏi ddat nneɣ ȓmewṯ n Ƹisa bac aḏ d tmeḍhar uȓa ḏ ṯuḏarṯ n Ƹisa ḏi ddat nneɣ.
11 Liʼanna neccin ig iddaren netwasellam ȓebda ɣar ȓmewṯ ƹlaḥsab Ƹisa ḥima ṯuḏarṯ n Ƹisa aḏ d tmeḍhar ḏi ddat nneɣ itmettan.
12 X manaya xmi neccin netwajah ȓmewṯ, kenniw aḏaywem tiȓi ṯuḏarṯ.
13 Iqqar yijjen ḏi Lkitab: "Umneɣ, s manaya ssiwȓeɣ." Nnefs lʼiman-a iǧan ḏayneɣ, zzayes iy ntamen zzayes iy nessawaȓ.
14 Nessen belli wenni iy d isekkaren Siḏiṯneɣ Ƹisa netta ƹaweḏ aḏaneɣ d isekkar ak Ƹisa aḏaneɣ iseḥḍar zzaṯ nnes akiḏwem.
15 Cuf, marra manaya iwqeƹ bac akenniw infeƹ. Xmi itentacar arḍa ɣar yiwḏan aṭṭas s waṭṭas iƹni aḏ d isfeyyeḍ ccuker i lƹaḍama n Arebbi.
16 X manaya neccin war ntefciȓ ca. Waxxa ṭṭabiƹa n ddat nneɣ n barra traḥ, ṭṭabiƹa nneɣ ɣar ḏaxeȓ tejhiḏ zi nhar aȓ nhar.
17 Cuf, ȓemḥayen nneɣ fsusent traḥent tasent-id ḏeɣya, sewjaḏent-aneɣ ɣar yijjen n lƹaḍama ḏ ṯameqqrant bȓa ȓeqyas.
18 War nesrusi ca ṯiṭṭawin nneɣ ḏi min netwaȓa, nsrusa-ṯent ḏi min war netwiȓi ca. Liʼanna min netwaȓa ḏeɣya itraḥ, min war netwiȓi ca netta ig itduman i ȓebda.