Amcan nneɣ ḏeg ujenna
5
1 Cuf, nessen neccin meȓa irez uqiḍun-a iƹni ddat nneɣ ḏi ddunect-a, ataf ɣarneɣ ijjen n ṯzeddiɣṯ nneɣni zi Arebbi. Ṯaddarṯ nni war t bnin ca s ifassen tduma i ȓebda.
2 Ȓexxu neccin nnehhek ḏayneɣ mezȓi a neɣmes s ddat nneɣ n ujenna.
3 Xmi ɣa neɣmes zzayes, ataf war ḏaneɣ tifen ca ḏ iƹaryanen.
4 Liʼanna xmi netɣemmas s ddat-a nneɣ, tbessaȓ xaneɣ neccin ƹaḏ nnehhek. Iwa war nrezzu ca a niȓi bȓa arruḍ, nrezzu a neɣmes s ddat nneɣ n ujenna. Mayemmi? Bac min ifennan aṯ iseɣȓey qaƹ min war itmettin.
5 Wi ḏaneɣ iswejḏen i manayenni? Netta ḏ Arebbi, yuca-aneɣ Arruḥ nnes ḏ ij n ttesbiq.
6 Iḏen ƹemmarṣ a nefceȓ neccin. Nessen meȓa ƹaḏ aqaneɣ ḏi ddat-a n ddunect-a iƹni ƹaḏ ntawggwaj zi Siḏiṯneɣ.
7 Aqa netƹic s lʼiman maci s min netwaȓa.
8 War ntefciȓ ca, lla! Iƹni maƹlic neccin meȓa ntawggwaj zi ddat-a n ddunect-a ataf neccin netƹic ak Siḏiṯneɣ.
9 X manayenni mixef nrezzu? Nrezzu axas narḍa waxxa nzeddeɣ ḏi ddat-a n ddunect-a niɣ ntawggwaj zzayes.
10 Liʼanna labud a nbedd marra iḏneɣ zzaṯ i lƹarc n Lmasiḥ mani iy ɣa netwaḥkem. Kuȓ ijjen aṯ ijaza s min isḏaheǧ ƹlaḥsab ṯimesȓayin nni ig igga wami izḏeɣ ḏi ddat, ḏ ṯiṣebḥanin niɣ ḏ ṯiƹeffanin.
11 Falihaḏa wami nessen a neggweḏ zi Siḏiṯneɣ, nrezzu iwḏan aḏ qtanƹen.
Ȓƹaheḏ n ṣṣulḥ
Wa min neƹna neccin issen-iṯ mliḥ Arebbi, u tmenniɣ ƹaweḏ ḍḍamir nwem aḏ issen manayenni.
12 Ma nebḏa a ncekkar ixef nneɣ ƹaweḏ zaƹma? Lla, nticc-awem minzi ɣa teftaxarem xaneɣ. Mayemmi? Iƹni ḥima aɣarwem yiȓi minzi ɣa ṯarrem x yinni iteftaxaren x min itbanen ɣar barra maci x min iǧan ḏeg wuȓ.
13 Cuf, meȓa iruḥ-aneɣ ȓaƹqeȓ zaƹma, manaya jaraneɣ ḏ Arebbi. Meȓa ɣarneɣ ȓaƹqeȓ nneɣ, manaya mliḥ i kenniw.
14 Liʼanna ȓemḥibbeṯ n Lmasiḥ tsayṭar xaneɣ wami nessen qa immuṯ ijjen ƹlaḥsab marra iwḏan. Falihaḏa ȓmewṯ nnes ḏ ȓmewṯ n marra iwḏan.
15 Immuṯ netta ƹlaḥsab marra iwḏan bac yinni iddaren war teddaren ca i yixef nsen waha, aḏ ddaren i wanita iy xasen immuṯen ṯumma itwasekkar-d zi ȓmewṯ.
16 X manayenni, zi ssa aȓ ṯsawent neccin war nxezzar ḏi ḥadd ƹlaḥsab ȓaƹqeȓ n ddunect-a. Waxxa nxezzar qbeȓ ḏi Lmasiḥ ƹlaḥsab ȓaƹqeȓ n ddunect-a, ȓexxu war ṯ netwiȓi ca amenni.
17 X manaya, ijjen meȓa iǧa ḏi Lmasiḥ aqa itwaxȓeq-d ḏ jḏiḏ; min iǧan ḏ aqḏim aqa iƹḏu yusa-d min iǧan ḏ jḏiḏ.
18 Manaya marra zi Arebbi, isemṣȓaḥ-aneɣ akiḏes s Lmasiḥ yuca-aneɣ a nbeccar s ȓƹaheḏ-a n ṣṣulḥ.
19 Iƹni ḏi Lmasiḥ Arebbi igga bac aḏ isemṣȓaḥ iwḏan akiḏes, war xasen iḥesseb ca ȓmuƹṣiyaṯ nsen. Ƹaweḏ Arebbi ikellef xaneɣ awaȓ-a wanita n ṣṣulḥ.
20 Falihaḏa neccin ḏ lmubcirin n Lmasiḥ, iƹni Arebbi issekk ṭṭalab nnes x ufus nneɣ. Nṭalab-ikenniw ƹlaḥsab Lmasiḥ aḏ temṣȓaḥem ak Arebbi.
21 Wanita tuɣa war ɣares bu ȓmuƹṣiyeṯ iggi-ṯ Arebbi aḏ yiȓi ḏ ȓƹiḏ nneɣ ḥima aḏaneɣ yarr nican ak Arebbi.