6
1 Fa neccin ig ixeddmen ak Arebbi ntettar i kenniw neqqar-awem: Maci aḏ tqebbȓem arḍa n Arebbi war zzayes ṯxeddmem ca.
2 Aqa netta iqqar:
"Wami xafi ṯarḍa ȓweqṯ sȓiɣ-ac,
ḏi nhar nni n ufekki ƹawneɣ-c."
Haqac, ȓexxu ḏ ȓweqṯ ig yarḍan x Arebbi. Haqac, ȓexxu ḏi nhara iy ḏi isenjam.
3 War nesrusi walu ḏeg ubriḏ i ḥadd bac aṯ neɣḍeȓ ḥima war tifen ȓƹib ḏi ȓxeḏmeṯ nneɣ.
4 Innama neccin netqeddam-awem ixef nneɣ x marra minzi neccin ḏ ixeddamen n Arebbi: Iƹni nṣebbar aṭṭas; tekkent xaneɣ ȓemḥayen ḏ tamara ḏ uziyyar;
5 tmarraṯen-aneɣ, tḥebbasen-aneɣ, teggen-aneɣ ȓfawḍa; neccin neccaṯ tamara, neqqim ǧiyaȓi bȓa iḍeṣ, neǧuz.
6 Netqeddam-awem ixef nneɣ x ṣfa iy ḏayneɣ ḏ ȓefhameṯ ḏ ttasiƹ n ȓxaḍar ḏ ȓxir ḏ Arruḥ iqeddsen ḏ ijjen n ȓemḥibbeṯ bȓa nnifaq;
7 x wawaȓ n lḥaqiqa ḏ jjehḏ n Arebbi ḏ ȓesnaḥ n ȓḥaqq ig iǧan ḏeg ufusi ḏ uẓermaḍ.
8 Netqeddam-awem ixef nneɣ liʼanna iwḏan tweqqaren-aneɣ sbehdaȓen-aneɣ; qqaren ḏayneɣ ȓbaṭeȓ semɣaren-aneɣ; tarran-aneɣ ḏ iɣeccacen walakin neccin war ḏayneɣ bu ixarriqen;
9 nekkaren-aneɣ walakin neccin netwassen mliḥ; netmetta walakin nteddar; tƹaqaben-aneɣ walakin war ḏaneɣ nɣin ca;
10 netwazeyyar walakin ȓebda nfarreḥ; neccin ḏ ipubriṯen walakin nserbaḥ aṭṭas n yiwḏan; war ɣarneɣ walu walakin ɣarneɣ kuȓci.
11 Ay Ayṯ-Kurinṯ, nessiweȓ akiḏwem s marra ṣṣaraḥa, uȓawen nneɣ nnurzmen aṭṭas i kenniw.
12 Ȓemḥibbeṯ nneɣ war xawem t neɣliq ca neccin, ḏ kenniw iy xaneɣ t iɣelqen.
13 Ssawaȓeɣ akiḏwem am ṯarwa inu. Iwa jjeṯ waxxa ḏ uȓawen nwem aḏ nnurzmen aṭṭas am neccin.
War carrcem ca ak yinni war yuminen ca
14 War teggeṯ xawem ṯzayȓuta ak yinni war yuminen ca, war tiȓiṯ ca ḏ ṯiyuyab akiḏsen. Ma ḏinni can ḥajeṯ ig icarrec ȓḥaqq ak ȓbaṭeȓ? Lla. Min icarrec nnur ak ṯaǧest? Walu.
15 Ma ḏinni ca n ȓḥajeṯ kif-kif ak Lmasiḥ ḏ Ibȓis? Lla. Ma ḏinni ca n ȓḥajeṯ ṯcarrec jar ȓmumen ḏ wenni war yuminen ca? Walu.
16 Min ṯcarrec ṯemziḏa ṯameqqrant n Arebbi ak lʼaṣnam? Walu. Cuf, neccin ḏ ṯamziḏa ig iǧan n Arebbi iddaren. Amenni iqqar Arebbi:
Aḏ zeḏɣeɣ akiḏsen aḏ uyureɣ jarasen,
nec aḏ iȓiɣ ḏ Arebbi nsen,
niṯni aḏ iȓin ḏ ccaƹb inu.
17 X manaya iqqar Siḏi Arebbi:
Ffɣem-d zi ȓwesṭ nsen ƹezȓeṯ ixef nwem,
war tḥaḏaṯ min iǧan ḥaram.
Uca nec akenniw qebȓeɣ,
18 aḏ iȓiɣ ḏ babaṯwem,
kenniw aḏ tiȓim ḏ ṯarwa inu ḏ yissi inu.
Amenni iqqar Arebbi iy izemmaren i kuȓci.