7
1 Iḏen ay imƹizzen, wami ḏaneɣ iƹaheḏ Arebbi x ṯmesȓayin-a labud a nsiṣfa ixef nneɣ zi marra min ḏaneɣ itexnizen ḏi ddat ḏ arruḥ ḥima a niȓi ḏ ṣṣaliḥin bȓa axeṭṭi ḏi ṯiggwḏi zi Arebbi.
Arrasul Bulus ṯesfarreḥ-iṯ jmaƹeṯ n ȓmuminin ḏi Kurinṯ
2 Ggem-aneɣ kenniw imucan ḏeg wuȓawen nwem. Uȓa ḏ ijjen war ṯ neḍȓim ca. Uȓa ḏ ijjen war ṯ nesƹewwej ca. Uȓa ḏ ijjen war ṯ nɣecc ca.
3 War qqareɣ ca manaya bac akenniw ƹeyybeɣ lla. Ȓaḥeqqac nniɣ-awem qbeȓ aqa kenniw ḏeg wuȓawen nneɣ, a nemmeṯ niɣ a neddar akiḏwem.
4 Nec teggeɣ akiḏwem zƹameṯ aṭṭas, lʼiftixar iy ɣari ḏaywem imɣar. Twacejjƹeɣ aṭṭas, ȓefraḥeṯ inu temfeyyaḍ x marra ȓemḥayen nneɣ.
5 Cuf, wami d nusa neccin ɣar lʼiqlim n Masidunya ddat nneɣ war ṯriyyeḥ ca, netwazeyyar zi mkuȓ jjihet iƹni amenɣi ɣar barra ḏ ṯiggwḏi ɣar ḏaxeȓ.
6 Walakin Arebbi, iƹni wenni itƹawanen yinni itxeyyaqen iƹawen-aneɣ ƹaweḏ s umaṯneɣ Titus wami d yusa.
7 U maci ɣir wami d yusa Titus, iƹawen-aneɣ Arebbi ƹaweḏ wami tuɣa ḏayes thillam. Ixbar-aneɣ Titus qa tweḥḥcem-ayi, ṯnedmem ṯrezzum xafi aṭṭas. Amenni ȓefraḥeṯ inu ṯerni ktar.
8 Iwa wami kenniw sxeyyqeɣ s ṯebrat nni inu nneɣni, ḏ amezwaru tuɣa nedmeɣ ȓexxu war ndimeɣ ca. Iƹni nedmeɣ wami ẓriɣ ṯabrat nni inu ṯesxeyyeq-ikenniw ḏeg yij n ȓweqṯ walakin ṯeƹḏu ḏeɣya.
9 Ȓexxu nec farrḥeɣ. Maci wami ṯxeyyqem lla, wami ṯxeyyqem bac aḏ ttubem. Ṯxeyyqem iƹni s yij n uxiyyeq zi Arebbi, amenni war kenniw ṯeȓqif uȓa ḏ ij n ṯxessarṯ zzayneɣ.
10 Cuf, axiyyeq zi Arebbi itarew ttuba, ttuba-ya ṯneddeh-ikenniw aḏ tnejmem war tejji ca ndameṯ. Axiyyeq zi ddunect-a lla, itarew ȓmewṯ.
11 Fekkareṯ kenniw ḏi min ḏaywem itarew uxiyyeq-a zi Arebbi. Iƹni mecḥaȓ tḥawaȓem s wuȓ ṯrezzum aḏ tḥellem manaya ḏeɣya. Iƹni mecḥaȓ ṯnedmem mecḥaȓ ṯenxeȓƹem, ḏaywem ij n mezȓi ḏ yij n ṯiggwḏi. Iƹni mecḥaȓ ṯeswejḏem aḏ tḥekmem nican. Min ma iǧan ḏi ṯmesȓayṯ-a aqa kenniw war ḏaywem bu ȓƹib.
12 Nec uriɣ-awem-d ṯabrat nni, mayemmi? Ma ƹlaḥsab wenni iḍeȓmen niɣ ḏ wenni itwaḍeȓmen? Lla, uriɣ-t-id bac akenniw sfehmeɣ zzaṯ i Arebbi mecḥaȓ ḏaneɣ teggem array s wuȓ.
13 X manaya marra netwaƹawen.
Maci netwaƹawen neccin u ṣafi, ƹaweḏ nfareḥ aṭṭas wami neẓra mecḥaȓ ifareḥ Titus arruḥ nnes ṯesreyyḥem-ṯ kenniw marra.
14 Wami zzaywem ftaxareɣ ɣar Titus war iǧi mayemmi ɣa seḏḥiɣ ȓexxu. Ȓaḥeqqac mammec nessiweȓ akiḏwem nican ḏi marra, uȓa ḏ lʼiftixar nneɣ xawem ɣar Titus qa iffeɣ-d nican.
15 Netta ṯeqqimem-as ḏeg wuȓ u ktar ƹaḏ xmi itfekkar ḏi array iy ḏas ṯeggim, iƹni ṯqebȓem-ṯ s yij n ṯiggwḏi terjijim.
16 Farrḥeɣ xmi zemmareɣ axawem ƹewwȓeɣ ḏi mindi mma.