Ij n lmiṯal n ṣṣaḏaqa zi ȓmuminin ig iǧan ḏi Masidunya
8
1 Fa ay ayṯma, nexs aḏ tessnem x arḍa nni iy ḏasent yuca Arebbi i ṯjumaƹ n ȓmuminin iǧan ḏi lʼiqlim n Masidunya.
2 Ṯekka xasen ijjen n ȓmiḥneṯ ḏ ṯameqqrant ṯeqseḥ xasen aṭṭas. Waxxa niṯni ḏ ipubriṯen war ɣarsen walu maca ȓefraḥeṯ nsen ṯemɣar. Zi manayenni iy zi teffeɣ ij n ṣṣaḍaqa ḏ ṯameqqrant aṭṭas.
3 Aqa nec cehhḏeɣ belli ṣedqen s min zemmaren aḏ ucen, u ḏ ṣṣaḥ ṣedqen ktar zi min zemmaren. Ggin manaya s ȓxaḍar nsen waḥeḏsen,
4 ttaren zzayneɣ s wuȓ nsen aḏ ƹawnen s ȓxir-a ȓmuminin ṣṣaliḥin iǧan ḏi Lquds.
5 Neccin neḏhec wami ggin manayenni. Ƹlaḥsab min ixes Arebbi sellmen ḏ amezwaru ȓxaḍar nsen i Siḏiṯneɣ ṯumma sellmen-ṯ ƹaweḏ i neccin.
6 Amenni nweṣṣa Titus. Wami tuɣa ibḏa ijemmeƹ zi qbeȓ ȓxir n ṣṣaḏaqa-ya zzaywem, ȓexxu nweṣṣa-ṯ at ikemmeȓ.
7 Kenniw teggem zyada ḏi marra ṯimesȓayin, iƹni ḏi lʼiman ḏ lxuṭba ḏ ṯusna nwem ḏ mammec iy tḥawaȓem s wuȓ u ḏ ȓemḥibbeṯ nwem i neccin. Ammu iy ɣa ṯeggem mliḥ aṭṭas ḏi ȓxir n ṣṣaḏaqa-ya ƹaweḏ.
8 War qqareɣ ca manaya ḏ ij n ȓuṣiyeṯ lla. Nec rezzuɣ aḏ jarrbeɣ lḥaqiqa n ȓemḥibbeṯ nwem wami cabbheɣ min teggem kenniw akeḏ mammec tḥawaȓen iwḏan nneɣnit s wuȓawen nsen ḏi ȓxeḏmeṯ-a.
9 Aqa ṯessnem arḍa n Siḏiṯneɣ Ƹisa Lmasiḥ. Netta tuɣa ɣares kuȓci, walakin ƹlaḥsab neccin ismeḥ ḏi marra manayenni bac aɣarneɣ yiȓi kuȓci s manayenni iy ḏi ismeḥ.
10 Ȓexxu nec aḏawem uceɣ array inu ḏi manaya, azzayes ṯawim nfaƹ. Azeḏɣaṯ kenniw ig iṣedqen ḏ imezwura. Kenniw ƹaweḏ ḏ imezwura iy xsen aḏ teggem manayenni.
11 Ȓexxu labud aḏ tkemmȓem cɣeȓ-a s min ṯzemmarem aḏ tṣedqem. Iƹni min ṯebḏam s wuȓawen nwem, iwa ƹaweḏ kemmȓem-ṯ.
12 Liʼanna bnaḏem meȓa s ȓxaḍar nnes, min ɣa iṣeddeq aḏ itwaqbeȓ. Walakin ƹlaḥsab min ɣares ḏ agȓa, maci ƹlaḥsab min war ɣares iǧi.
13 Cuf, neccin ma nrezzu kenniw aḏasen ṯucem fus i yiwḏan nneɣni, kenniw axawem ibesseȓ dqeȓ? Lla, nrezzu i mkuȓ ijjen ȓḥaqq nnes nican.
14 Ḏi ȓweqṯ-a ṯanita min ḏawem ɣa iceṭṭen ḏ agȓa aḏ infeƹ i min teḥḏajan niṯni. Menbaƹd, min ḏasen ɣa iceṭṭen aḏ infeƹ i min teḥḏajam kenniw. Ammu iy ɣa yiȓi ȓḥaqq nnes i mkuȓ ijjen nican.
15 Mammec iqqar Lkitab: "Wenni ismunen aṭṭas war ḏas iceṭṭ walu, wenni ismunen cwayt waha war ḏas itxeṣṣi walu."
Ssekken Titus ḏ ca n wawmaṯen ɣar ṯendint n Kurinṯ
16 A neḥmeḏ Arebbi wami ḏas igga ḏeg wuȓ i Titus nnefs n ȓxaḍar iy ɣari nec xawem.
17 Iqbeȓ Titus ṭṭalab nneɣ, u ktar itegg marra ṯizemmar nnes aɣarwem d yas s ȓxaḍar nnes nniṯ.
18 Ak Titus nessekk umaṯneɣ nni maƹruf ɣar marra ṯijumaƹ n ȓmuminin x ȓxeḏmeṯ itegg ƹlaḥsab Lʼinjil.
19 Maci manayenni waha, qa xḍarent-ṯ-iḏ ṯjumaƹ n ȓmuminin bac akiḏneɣ isafer xmi nkessi ȓxir n ṣṣaḏaqa-ya. Nkellef x ṣṣaḏaqa-ya i lƹaḍama n Siḏiṯneɣ s yixef nnes u bac aḏ d imeḍhar mammec ntegg ṯizemmar a nƹawen.
20 Ammu nexs axaneɣ nesbeƹƹeḏ aya n ȓƹib iy xaneɣ ɣa inin x mammec iy ɣa nkellef x ṣṣaḏaqa-ya ṯameqqrant.
21 Ntegg ṯizemmar bac a negg min iǧan ḏ aṣebḥan maci ƹlaḥsab Siḏi Arebbi waha, ntegg ƹaweḏ ƹlaḥsab min twaȓan yiwḏan.
22 Ƹaweḏ nessekk akiḏsen umaṯneɣ nneɣni aṭṭas n ṯwaȓaṯin njarreb-iṯ nufi-ṯ ixeddem mliḥ s wuȓ nnes. Ȓexxu ƹlaḥsab ttiqeṯ ḏ ṯameqqrant iy ɣares ḏaywem ixeddem s wuȓ nnes ƹaḏ ktar zi min tuɣa ixeddem qbeȓ.
23 Meȓa sseqsan x Titus, netta icarrec akiḏi ixeddem akiḏi jarawem. Meȓa sseqsan x ayṯmaṯneɣ yina, niṯni ssekkant-ṯen ṯjumaƹ n ȓmuminin sbeyyanen-d lƹaḍama n Lmasiḥ.
24 Falihaḏa, awim-asen i iryazen-a ddalil n ȓemḥibbeṯ nwem ḏ ssabab s minzi nteftaxar ḏaywem bac manaya aṯ ẓrent ṯjumaƹ n ȓmuminin.