9
1-2 Amma ṣṣaḏaqa i ṣṣaliḥin bȓa ma ḏawem d ariɣ, liʼanna nec qa ssneɣ ṯrezzum aḏ tƹawnem ḏeɣya. Teftaxareɣ nec ḏi manaya ɣar Ayṯ-Masidunya, qqareɣ-asen qa zeg wazeḏɣaṯ kenniw ḏi lʼiqlim n Uxaya ṯsewjaḏem-d aḏ tṣedqem. Ȓxaḍar-a nwem itcejjaƹ azyen-ameqqran aḏ ṣedqen.
3 U ssekkeɣ-d ɣarwem ayṯmaṯneɣ Titus ḏ ṯnayen-a nneɣni bac lʼiftixar nneɣ ḏaywem war itiȓi ca ḏ ȓbaṭeȓ waha, aḏ tiȓim ṯsewjaḏem mammec tuɣa nniɣ nec.
4 Menbaƹd meȓa usin-d akiḏi ȓebƹaḍ zi Ayṯ-Masidunya ufin-kenniw war ṯeswejḏem ca ataf neccin a nseḏḥa x ttiqeṯ nneɣ ḏaywem (uȓa ḏ kenniw aḏ tseḏḥam).
5 S manaya ufiɣ labud aḏ cejjƹeɣ ayṯmaṯneɣ yina iy ḏayi d izwaren ɣarwem zic bac aḏ ƹeḏȓen marra x ṣṣaḏaqa-ya ṯameqqrant, iƹni ṯenni iy zi tuɣa ṯƹahḏem jaraneɣ zi qbeȓ. Ammu aḏ tiȓi ṣṣaḏaqa-ya mujud s wuȓ nwem u maci s bessif.
Ṣṣaḏaqa tas-d s ȓefraḥeṯ
6 Fekkareṯ, wenni izerrƹen ḏrus ataf aḏ imjar ḏrus. Wenni izerrƹen aṭṭas ataf aḏ imjar aṭṭas.
7 Kuȓ ijjen itxeṣṣa-yas aḏ iṣeddeq min inwa ḏeg wuȓ nnes war iǧi bu s uxeyyaq niɣ s bessif, minzi Arebbi itexs wenni itṣeddaqen s ȓefraḥeṯ.
8 Arebbi netta izemmar akenniw isfeyyeḍ s lbaraka bac ataf ȓebda ɣarwem min teḥḏajam ḏi marra ṯumma aḏ ternim aṭṭas ḏi marra ȓxeḏmeṯ iṣebḥan.
9 Mammec iqqar ḏi Lkitab: <Netta ifreq aṭṭas yuca-asen i ipubriṯen, ȓḥaqq ig itegg netta itduma i ȓebda.>
10 Wenni ig iferrqen zzarriƹeṯ i ufeǧaḥ ig izerrƹen iticc-as ƹaweḏ ȓa ḏ aɣrum iy ɣa icc, ataf netta ƹaweḏ aḏawem irni ḏi zzarriƹeṯ iy ṯzerrƹem aḏ isemɣar min ṯmejjarem zi ṣṣaḏaqa-ya nwem.
11 Aɣarwem yiȓi ȓxir aṭṭas ḏi marra bac ataf aḏ tiȓim ṣaxiyin. U xmi ɣa nsiweḍ ṣṣaḏaqa-ya nwem aḏ teḏweȓ ḏ ij n ccuker i Arebbi.
12 Liʼanna ṣṣaḏaqa-ya iy teggem maci ɣir tƹemmar ifassen ixwan n ȓmuminin ṣṣaliḥin ḏi Lquds lla, nettaṯ ƹaweḏ itenfeyyaḍ zzayes aṭṭas n ccuker i Arebbi.
13 Ṣṣaḏaqa-ya ṯuca ddalil xawem u zzayes iy ɣa ḥemḏen ṣṣaliḥin Arebbi. Ṯumnem s Lʼinjil n Lmasiḥ, ṯṭaƹem-as xmi ṯṣeddqem aṭṭas xasen u x marra iwḏan.
14 Rezzun xawem tẓaǧan xawem ƹlaḥsab arḍa ameqqran iy ḏawem ihḏa Arebbi.
15 A neḥmeḏ Arebbi x lhadiya nni nnes, war ḏas nzemmar at newṣef.