Arrasul Bulus itḏafaƹ x ȓxeḏmeṯ nnes
10
1 Fa nec ḏ Bulus, s yixef inu tṭalabeɣ-kenniw s ttawaḍuƹ ḏ lḥanana n Lmasiḥ. Wah, ṯeqqarem nec zaƹma terjijiɣ xmi tiȓiɣ akiḏwem tiȓiɣ nec qesḥeɣ xmi tɣabeɣ xawem.
2 Tettareɣ-kenniw bac war ḏayi tijjim ca aḏ iȓiɣ qesḥeɣ ak ȓebƹaḏ zzaywem am trajiɣ nec aḏ ggeɣ, ȓebƹaḍ-a tfekkaren qa netƹic s array n bnaḏem waha.
3 Ḏ ṣṣaḥ netƹic am bnaḏem, walakin war netḥarib ca am bnaḏem.
4 Ȓesnaḥ nneɣ maci ḏ wenni ig isxeddam bnaḏem, ɣarneɣ ijjen n ȓesnaḥ nneɣ zi Siḏi Arebbi zzayes iy netrezza imucan ijehḏen.
5 Netrezza awaȓen ḏ kuȓ array iy ḏi iǧa ttakebbur ig itƹarraḍen i min nessen x Arebbi. Nḥebbes kuȓ lfikra bac nettaṯ aḏ tṭaƹ i Lmasiḥ.
6 Xmi ɣa ṯsiwḍem nican ṭṭaƹa nwem, ataf neccin a niȓi nsewjaḏ bac a nƹaqeb wenni war itṭiƹin ca.
7 Kenniw ṯxezzarem ɣar min d itbanen x wuḏem waha. Meȓa can yijjen metʼakked netta zi Lmasiḥ, labud aḏ ifekkar uȓa ḏ neccin zi Lmasiḥ am netta.
8 Waxxa teftaxareɣ cwayt s ṣṣaraḥa-ya x ssulṭa nni iy ḏaneɣ yuca Siḏiṯneɣ, war tseḏḥiɣ ca x manaya. Ssulṭa-ya yuca-aneɣ-t ḥima akenniw nsejheḏ maci ḥima akenniw nrez.
9 War xseɣ ca aḏawem tɣiȓ belli nec akenniw siggwḏeɣ s ṯebraṯin inu.
10 Liʼanna qqaren xafi ȓebƹaḍ zzaywem qa ṯibraṯin n Bulus jehḏent qesḥent. U qqaren ƹaweḏ walakin xmi akiḏneɣ itiȓi netta s yixef nnes iteḍƹif awaȓen nnes xwan.
11 Lla! Wenni issawaȓen ammu itxeṣṣa aḏ issen min neƹna neccin ḏi ṯebraṯin nneɣ xmi netɣab, amenni iy ɣa nexḏem xmi ɣa neḥḍar.
12 Cuf, war nzemmar a nqaran ixef nneɣ niɣ a nmeṯṯel ixef nneɣ ak yinni itcekkaren ixef nsen. Yina xmi tmeyyazen ixef nsen ak wayawya tmeṯṯalen ixef nsen ak wayawya iƹni ḏaysen ȓeqfaȓeṯ.
13 Walakin neccin a neftaxar x min iǧan nican maci ktar, a neftaxar s minzi ḏaneɣ ikellef Arebbi iƹni xawem kenniw.
14 Iwa kenniw, ma ikellef-aneɣ Arebbi xawem niɣ lla? Wah, neccin nuweḍ-d ɣarwem, nusa-d ɣarwem ḏ imezwura s Lʼinjil n Lmasiḥ.
15 War nteftaxar ca x ȓxeḏmeṯ iy ggin midden iƹni bac a nawi ccan nnes. Lla, neccin netmenna aḏ ternim ḏi lʼiman nwem bac ƹaweḏ lḥudud nneɣ akiḏwem itmerni.
16 Ammu neccin a nbeccar s Lʼinjil ḏeg imucan aɣirin nwem, aqa war nexs ca a neftaxar s ȓxeḏmeṯ iy ggin midden.
17 Mamc iqqar Lkitab: "Wenni irezzun aḏ iftaxar, aḏ iftaxar netta zi Siḏi Arebbi."
18 Liʼanna maci wenni itqeddamen ixef nnes iy ɣa itwaqebbȓen. Lla, wenni iy ɣa itwaqebbȓen ḏ Siḏi Arebbi iy ṯ itqeddamen.