Arrasul Bulus aqaṯ ḍeḏ i yinni itarran ixef nsen ḏ arrusul
11
1-2 Iwa rezzuɣ aḏ teṣbarem cwayt ak ṯubbuhȓiya-ya inu zaƹma. Wah, ṣebbareṯ akiḏi liʼanna ḏayi ij n lɣira xawem, iƹni ij n lɣira zi Arebbi. Aqa xeḍbeɣ-kenniw zaƹma i yijjen n uryaz iƹni ḏ Lmasiḥ akenniw awiɣ ɣares am yij n ṯeƹzriyṯ war ḏayes bu ȓƹib.
3 Walakin nec ggwḏeɣ mammec ḏas iwqeƹ i Ḥawwaa icmeṯ-it ufiɣarb s ṯeḥraymiṯ nnes uȓa ḏ kenniw iƹni ȓaƹqeȓ nwem aḏ iffeɣ abriḏ, war ḏas tṭiƹim ca i Lmasiḥ s wuȓ nwem bȓa nnifaq u bȓa ȓƹib.
4 Liʼanna kenniw ṯeqqarem maƹlic waxxa yusa-d ɣarwem ijjen itbeccaren s yijjen n Ƹisa nneɣni iƹni mzuwwar maci ḏ wenni iy xef netbeccar neccin zi qbeȓ. Niɣ ḏeɣya ṯqebbȓem ij n arruḥ nneɣni iƹni mzuwwar maci wenni iy tuɣaṯ ṯqebȓem-ṯ zi qbeȓ. Niɣ ḏeɣya ṯqebbȓem ijjen n Lʼinjil nneɣni iƹni mzuwwar maci wenni iy tuɣaṯ ṯqebȓem-ṯ zi qbeȓ.
5 Cuf, war ḥessbeɣ ca ixef inu ḏ unqiṣ zi arrusul imezwura. Lla walu.
6 U nec waxxa war ssineɣ ca lxuṭba mliḥ, walakin war ḏayi ṯenqiṣ ca ṯusna. Neccin ṯusna-ya nesbeyyen-awem-t-id nican zi marra ṯimesȓayin.
7 Ma ḏ ȓƹib meȓa beccareɣ-kenniw s Lʼinjil n Arebbi bȓa ma ḏayi ṯxeǧsem, iƹni semzayeɣ ixef inu bac akenniw sgaƹƹḏeɣ?
8 Nec jemƹeɣ-d tmenyaṯ zi ṯjumaƹ nneɣni n ȓmuminin qebȓeɣ zzaysen manayenni bac akiḏwem xeḏmeɣ.
9 Wami ḥḍareɣ akiḏwem u nec tuɣa teḥḏajiɣ, war bessȓeɣ x ḥadd zzaywem. Lla, ucin-ayi min teḥḏajiɣ ayṯmaṯneɣ iy d yusin zi Masidunya. Amenni ugiɣ axawem bessȓeɣ, aḏ qqimeɣ mestammer amenni.
10 S ȓḥaqq n Lmasiḥ iy ḏayi, uȓa ḏ ijjen ḏeg imucan n Uxaya aḏ ikkes lʼiftixar-a inu.
11 Mayemmi? Ma war kenniw texseɣ ca? Arebbi issen belli ṯƹizzem xafi.
12 Fa min teggeɣ aḏ qqimeɣ ammu teggeɣ-ṯ. Mayemmi? Xseɣ aḏasen qesseɣ iḍaren i yinni irezzun lfurṣa aḏ iȓin metsawiyin akiḏneɣ ḏi ṯmesȓayin iy xef teftaxaren.
13 Cuf, iryazen am yina tarran ixef nsen ḏ arrusul xeddmen ḏ iɣeddaren, sneƹmiȓen ḏ arrusul n Lmasiḥ.
14 Iwa war nesteɣȓib ca liʼanna Cciṭan s yixef nnes isneƹmiȓ netta ḏ ij n lmalaʼika n nnur.
15 Falihaḏa, war nesteɣȓib ca meȓa ixeddamen n Cciṭan sneƹmiȓen ḏ ixeddamen n ȓḥaqq. Ȓefna nsen aḏ yiȓi ƹlaḥsab min staḥaqent ȓexḏayem nsen.
Arrasul Bulus ḏ ȓemḥayen nnes
16 Aḏ iniɣ ƹaweḏ, war ḏayi ḥessbeṯ ca ḏ abuhaȓi. Waxxa ṯḥesbem-ayi ḏ abuhaȓi, qebbȓem-ayi bac aḏ ftaxareɣ cwayt.
17 Manaya iy zi teftaxareɣ qqareɣ-ṯ nec am yijjen n ubuhaȓi, war ṯ iqqar ca Siḏiṯneɣ.
18 Xmi teftaxaren yiwḏan-a aṭṭas ƹlaḥsab min itegg bnaḏem, uȓa ḏ nec aḏ ftaxareɣ.
19 Ma kenniw zaƹma ṯfehmem mliḥ? Iwa mayemmi s ȓefraḥeṯ iy ṯṣebbarem ibuhaȓiyen?
20 Aqa ṯṣebbarem uȓa ḏ yinni iy kenniw itarran ḏ isemɣan, ḏ yinni iy kenniw itetten, ḏ yinni iy xawem itbuṣaren, ḏ yinni iy ḏi iǧa ttakebbur, ḏ yinni iy kenniw iccaṯen s iseqqiȓen.
21 Nec tseḏḥiɣ zaƹma, neccin neḍƹef war nzemmar ca a nexḏem amenni!
Qqareɣ s ṯubbuhȓiya-ya zaƹma qa min ma izƹem ḥadd azzayes iftaxar uȓa ḏ nec azzayes ftaxareɣ.
22 Meȓa niṯni ḏ iƹibraniyen, uȓa ḏ nec ḏ aƹibrani. Meȓa niṯni zi Ayṯ-Israʼil, uȓa ḏ nec zi Ayṯ-Israʼil. Meȓa niṯni usin-d zi ṯarwa n Brahim, uȓa ḏ nec usiɣ-d zi ṯarwa n Brahim.
23 Meȓa niṯni ḏ ixeddamen n Lmasiḥ, uȓa ḏ nec ḏ axeddam n Lmasiḥ ḥsen ƹaḏ (ssawaȓeɣ zaƹma s ṯubbuhȓiya-ya). Nec ccaṯeɣ tamara ktar, ḥebbsen-ayi ktar, uwṯin-ayi s usɣun ktar. Nec mecḥaȓ n ṯwaȓaṯin twajaheɣ ȓmewṯ.
24 Xemsa n ṯwaȓaṯin ccaṯen-ayi iʼisraʼiliyen s arbeƹin n ṯyiṯa qell icten s usɣun.
25 Ṯȓaṯa n ṯwaȓaṯin tmarraṯen-ayi s uƹmuḏ. Ijjen n ṯwaȓa rejmen-ayi s uzru. Ṯȓaṯa n ṯwaȓaṯin iɣreq zzayi uɣarrabu seƹḏuɣ ijjen n wass ḏ yijjen n ǧiȓeṯ ḏi ȓebḥar.
26 Nec mecḥaȓ n ṯwaȓaṯin tsafareɣ tiȓiɣ ḏi lxaṭar n iɣezran, ḏi lxaṭar n iceffaren, ḏi lxaṭar n ȓqum inu, ḏi lxaṭar n iyunaniyen, ḏi lxaṭar ḏi ṯendint, ḏi lxaṭar ḏi ȓexȓa, ḏi lxaṭar ḏi ȓebḥar, ḏi lxaṭar n yinni iteggen ixef nsen ḏ ayṯma.
27 Xeḏmeɣ, ccaṯeɣ tamara, senseɣ xarebbi n ǧiyaȓi bȓa iḍeṣ. Fuḏeɣ ǧuzeɣ, kkiɣ aṭṭas n ṯwaȓaṯin bȓa lmakla. Ṯneɣ-ayi ṯesmeḍ arruḍ inu ḏ unqiṣ.
28 Iwa qaƹ ṯimesȓayin-a u ƹaweḏ ḏayi amnus kuȓ nhar ƹlaḥsab marra ṯijumaƹ n ȓmuminin.
29 Meȓa can yijjen iḍƹef, ma nec war teḍƹifeɣ ca? Meȓa can yijjen itwasufeɣ zeg ubriḏ, ma nec war ḏayi iteqqes wuȓ inu?
30 Meȓa nec labud aḏ ftaxareɣ, aḏ ftaxareɣ zi min d isbeyyanen nec ḍeƹfeɣ.
31 Wenni itwabarken i ȓebda iƹni Arebbi Babas n Siḏiṯneɣ Ƹisa, netta qa issen nec qqareɣ lḥaqiqa.
32 Ḏi ṯendint n Dimaceq, lwali n uzeǧiḏ Ḥariṯ igga ȓƹasseṯ ḏi ṯendint nni bac aḏayi iṭṭef.
33 Walakin sehwan-ayi-d imeḥḍaren inu ḏeg yij n uqbub s iseɣwan zi ṯburjat n ṣṣur n ṯendint rewȓeɣ zeg ifassen nnes.