Jjehḏ ḏ ḍḍuƹef n arrasul Bulus
12
1 U labud aḏ ftaxareɣ ƹaḏ, waxxa war ḏayes bu nfaƹ. Aḏ ssiwȓeɣ ȓexxu x ṯmesȓayin iy d ihwan ḏi lwaḥi ḏ ṯmesȓayin innufaren iy d isbeyyen Siḏiṯneɣ.
2 Ijjen n uryaz ḏi Lmasiḥ,a netta ssneɣ-ṯ ḏ nec. Arbeƹṭac iseggwusa zeg wami itwaxḍef netta ɣar ujenna ig iǧan ḏ wis ṯȓaṯa. Ma itwaxḍef s ddat niɣ bȓa ddat manayenni war ṯ ssineɣ ca nec, issen-iṯ illa Arebbi.
3-4 Aryaz-a ssneɣ itwaxḍef ɣar jjeneṯ. Ma s ddat niɣ bȓa ddat manayenni war ṯ ssineɣ ca nec, issen-iṯ illa Arebbi. Aryaz-a iṣenneṭ i ṯmesȓayin war twaneṭṭqent ca, war ḏas itwasmiḥ ca i bnaḏem aṯent inṭeq.
5 Ij n uryaz am wanita zemmareɣ nec azzayes ftaxareɣ. Walakin war teftaxareɣ ca zi min ḏayi d yusin, teftaxareɣ zi ḍḍuƹef inu u ṣafi.
6 Cuf, mȓi xseɣ aḏ ftaxareɣ zeg yixef inu ataf ssawaȓeɣ s ȓḥaqq, nec maci ḏ abuhaȓi. Walakin ugiɣ aḏ ggeɣ ammu, mayemmi? Ḥima aḏayi ḥesben yiwḏan ɣir s min twaȓan ḏayi s ṯiṭṭawin nsen u ḏ min tṣennaṭen zzayi s imejjan nsen.
7 Iḏen immuc-ayi ij n usennan ḏeg uysum inu,b mayemmi? Ḥima war semɣareɣ ca ixef inu ƹlaḥsab ṯimesȓayin-a istƹejjiben iy ḏayi d isbeyyen Arebbi ḏi lwaḥi. Asennan-a wenni iy d issekken Cciṭan itƹeddab-ayi bac war semɣareɣ ca ixef inu.
8 Ttareɣ-as i Siḏiṯneɣ ṯȓaṯa n ṯwaȓaṯin azzayi isbeƹƹeḏ manaya.
9 Netta inna-ayi lla, qa arḍa inu ikfa-yac liʼanna jjehḏ inu aḏ iḏweȓ ikmeȓ s ḍḍuƹef-a. Falihaḏa farrḥeɣ aṭṭas aḏ ftaxareɣ zi ḍḍuƹef n jjehḏ inu bac jjehḏ n Lmasiḥ aḏayi izḏeɣ.
10 X manaya u ƹlaḥsab Lmasiḥ nec farrḥeɣ s ḍḍuƹef inu ḏ ṯukkwra ḏ tamara ḏ uƹeddeb ḏ uziyyar. Mayemmi? Liʼanna meȓa ḍeƹfeɣ ȓexddennit iy tiȓiɣ nec jehḏeɣ.
Arrasul Bulus ikessi amnus x ȓmuminin n Ayṯ-Kurinṯ
11 Ƹaḏ ssawaȓeɣ s ṯubbuhȓiya-ya zaƹma, ḏ kenniw iy xafi ibezzen ammu. Cuf, tuɣa itxeṣṣa-kenniw aḏayi ṯcekarem, mayemmi? Liʼanna nec waxxa ḏ walu iy ǧiɣ, war ǧiɣ bu ḏ unqiṣ zi arrusul nni imezwura.
12 Ṯimesȓayin nni iy d isbeyyanen nec ḏ arrasul iy ǧiɣ niṯenti tuɣa twaxeȓqent jarawem s yijjen n ṣbar ḏ ameqqran, iƹni lƹalamaṯ ḏ lmuƹjizaṯ ḏ lburhanaṯ.
13 Ma ḏinni can ṯmesȓayṯ minxef arḍiɣ nec ḏi ṯjumaƹ n ȓmuminin nneɣni iy war xas arḍiɣ ca jarawem? Wah icten, iƹni war xawem tbessiȓeɣ ca!c Semḥem-ayi x falṭa-ya.
14 Aqayi wejḏeɣ ȓexxu aɣarwem d aseɣ ḏi zziyara wis ṯȓaṯa. War xawem tbessiȓeɣ ca, war rezzuɣ ca x wagȓa nwem rezzuɣ xawem kenniw. Ȓaḥeqqac war itxeṣṣi ca iḥenjiren aḏ smunen agȓa i lwalidin nsen, itxeṣṣa lwalidin aḏ smunen agȓa i iḥenjiren nsen.
15 Nec s ȓefraḥeṯ aḏ hḏiɣ ixef inu aḏ twahḏiɣ ƹlaḥsab ȓaƹmar nwem. Meȓa texseɣ-kenniw aṭṭas, ma ḏayi ṯesneqṣem ȓemḥibbeṯ nwem zzayi?
16 Iwa ṣafi, meȓa war xawem bessȓeɣ ca, ma ṯeqqarem ȓexxu qa nec ḏ aɣeccac ṭṭfeɣ-kenniw s ṯeḥraymiṯ zaƹma?
17 Ma ṯenwim xewwneɣ-kenniw s yijjen zeg yinni iy tuɣa ɣarwem d ssekkeɣ? Lla, walu.
18 Ḏ nec iy d iweṣṣan Titus aɣarwem d yas, ssekkeɣ-d akiḏes umaṯneɣ nni. War izemmar akenniw iɣecc Titus. Nec ḏ netta nexḏem s ȓaƹqeȓ ḏ ijjen, nsuruf isurifen kif-kif.
19 Mecḥaȓ zeg wami ṯnewwim zaƹma ndafeƹ x yixef nneɣ zzaṯwem waha? Lla ay imƹizzen, nessawaȓ marra manaya ḏi Lmasiḥ zzaṯ i Arebbi bac akenniw nsejheḏ.
20 Cuf, ggwḏeɣ xmi d ɣa awḍeɣ war kenniw tifeɣ ca mammec tmenniɣ akenniw afeɣ. U ƹaweḏ war ḏayi tifem ca mammec tmennim aḏayi ṯafem. Ggwḏeɣ aḏ afeɣ jarawem amenɣi ḏ ȓeḥseḏ ḏ uƹaṣṣeb, kuȓ ijjen irezzu i yixef nnes waha, ḏ ȓbaṭeȓ ḏ nnamima, ḏaywem ttakebbur ḏ ȓfawḍa.
21 Ggwḏeɣ aɣarwem d ƹeqbeɣ aḏ seḏḥiɣ zi Arebbi inu aḏ ruɣ aṭṭas x yinni ig iƹṣan qbeȓ niṯni ƹaḏ war tuben ca zeg ufelles ḏ lfasad ḏ ȓeqbaḥeṯ iy tuɣa xeddmen.