Arrasul Bulus iƹeǧem i yinni iy ḏas itƹarraḍen
13
1 Ṯanita ḏ zziyara wis ṯȓaṯa taseɣ-d ɣarwem. Mamc iqqar Lkitab: "Kuȓ ttuhma axas cehḏen ḏ ddalil ṯnayen niɣ ṯȓaṯa n ȓechuḏ."
2 Nec ḏi zziyara wis ṯnayen iy tuɣa d ggiɣ ɣarwem ƹeȓmeɣ-asen i yinni iƹeṣṣan ḏ yiwḏan nneɣni marra. Ȓexxu xmi xawem tɣabiɣ aḏawem ƹeȓmeɣ ƹaweḏ, iƹni xmi d ɣa awḍeɣ uȓa ḏ ijjen zeg yinni iƹeṣṣan ma axas ḥinneɣ.
3 Mayemmi? Liʼanna ṯrezzum ddalil Lmasiḥ issawaȓ zzayi. Ma iḍƹef netta ḏi ȓwesṭ nwem? Lla, netta ijheḏ jarawem.
4 Wah, netta itwaṣelleb x ṣṣalib ḏi ḍḍuƹef, innama iteddar s jjehḏ n Arebbi. Amenni uȓa ḏ neccin. Neḍƹef ḏayes ḏi netta, innama jarawem nteddar akiḏes s jjehḏ n Arebbi.
5 Jarrbeṯ ixef nwem ma aqa kenniw ḏi lʼiman. Rajƹeṯ ixef nwem. Yac ṯessnem qa Ƹisa Lmasiḥ aqaṯ ḏaywem? Iƹni meȓa war ṯesqiṭem ca.
6 U nec tteyyqeɣ aḏaneɣ ṯafem kenniw belli neccin war nesqiṭ ca.
7 Ntettar-as i Arebbi bac war ṯƹeṣṣim ca, maci bac aḏaneɣ afen yiwḏan war nesqiṭ ca ḏi ttuhma-ya iy xawem nqeddem lla. Neccin nrezzu aḏ teggem min iǧan nican. Meȓa zɣiȓ-asen i ȓebƹaḍ belli nesqeṭ zaƹma ḏi ttuhma-ya iy xawem nqeddem, iwa maƹlic.
8 Cuf, war nzemmar a negg walu ḍed i lḥaqiqa lla, neccin nxeddem i lḥaqiqa.
9 Liʼanna nfarreḥ meȓmi ma neḍƹef, kenniw aḏ tiȓim ṯjehḏem. Ḏ manaya mixef nrezzu ḏi ṯẓaǧiṯ nneɣ iƹni aḏ tṣeȓḥem nican.
10 X manaya iy tariɣ ṯimesȓayin-a ḏi ṯebrat-a nec ɣabeɣ zzaywem. Ammu xmi iy d ɣa ƹeqbeɣ ɣarwem war xseɣ ca aḏ qesḥeɣ akiḏwem s ssulṭa nni iy ḏayi yuca Siḏiṯneɣ. Yuca-ayi-t bac akenniw sjehḏeɣ maci bac akenniw rzeɣ.
Lxitam n ṯebrat-a
11 Ṣafi ay ayṯma, farrḥeṯ. Ṣeȓḥeṯ ibriḏen nwem nican. Tṣennaṭeṯ ɣari min ḏawem qqareɣ. Iȓiṯ ḏ ijjen ḏi array nwem. Tƹiceṯ ḏi ȓehna. Arebbi nneɣ n ȓemḥibbeṯ ḏ ȓehna aḏ yiȓi akiḏwem.
12-13 Seǧmeṯ x wayawya s yijjen n sȓam iṣfa. Tseǧamen-d xawem marra ȓmuminin ṣṣaliḥin.
14 Arḍa n Siḏiṯneɣ Ƹisa Lmasiḥ ḏ ȓemḥibbeṯ n Arebbi ḏ umƹacar n Arruḥ iqeddsen akiḏwem iȓin marra. Amin.