Ṣṣaḏaqa i ȓmuminin ṣṣaliḥin ḏi ṯendint n Lquds
16
1 U ƹlaḥsab ṣṣaḏaqa i ȓmuminin ṣṣaliḥin, swejḏeṯ kenniw mammec weṣṣiɣ ṯijumaƹ n ȓmuminin ḏi lʼiqlim n Galaṭya.
2 Ḏi nhar amezwaru n kuȓ simana, kur ijjen zzaywem itxeṣṣa aḏ ikkes can tmenyaṯ ƹlaḥsab lmanda nnes aṯent ixemmeȓ. Maci aȓ ɣa d aseɣ ƹaḏ aḏ tebḏam aḏ tesmunem tmenyaṯ.
3 Menbaƹd, iƹni xmi iy d ɣa awḍeɣ nec, aḏ ssekkeɣ yinni iy ɣa ṯsejlem ḏi ṯebraṯin belli ḏaysen ttiqeṯ aḏ raḥen aḏ awin niṯni ṣṣaḏaqa nni iy ṯesmunem ɣar Lquds.
4 Meȓa labud aḏ raḥeɣ uȓa ḏ nec, akiḏi raḥen.
Arrasul Bulus ḏ yinni iy kiḏes ixeddmen i Siḏiṯneɣ
5 Fa xmi ɣa ƹḏuɣ Masidunya, aɣarwem d aseɣ qa nec aḏ d kkeɣ ssenni x Masidunya.
6 Imken akiḏwem qqimeɣ ij n ȓweqṯ niɣ aḏ seƹḏuɣ ȓmecta ḥima aḏayi ṯƹawnem ḏeg usafar inu mani ma ɣa raḥeɣ.
7 War xseɣ ca akenniw ẓreɣ ȓexxu axawem d kkeɣ waha. Lla, tmenniɣ ƹaḏ akiwem qqimeɣ ij n lmudda meȓa ixes Arebbi.
8 Nec aḏ qqimeɣ ḏi ṯendint n Ufasus aȓ ɣa d yaweḍ Ȓƹiḏ n nhar wis xemsin.a
9 Aqa ṯnurzem-ayi-d ij n ṯewwarṯ ḏ ṯameqqrant i ȓxeḏmeṯ walakin yinni tƹarraḍen niṯni mujud.
10 Meȓa yusa-d Timuṯawus thellam ḏayes mliḥ bac war ḏayes itiȓi ca umnus liʼanna netta itegg ȓxeḏmeṯ n Siḏiṯneɣ amecnaw nec.
11 Itxeṣṣa uȓa ḏ ijjen war aṯ iseḥqari ca. Ƹawnem-ṯ ɣar usafar nnes bac aɣari d iƹqeb ḏi ȓehna, qa nec trajiɣ-ṯ ak ayṯmaṯneɣ.
12 U ƹlaḥsab umaṯneɣ Apullus, ttareɣ zzayes aṭṭas ḥima aɣarwem d yas ak ayṯmaṯneɣ nneɣnit maca yugi aḏ d yas ȓexxu. Aḏ d yas xmi ɣares ɣa ṯiȓi ij n lfurṣa.
13 Iȓiṯ ƹlalbal, beddeṯ nican ḏi lʼiman, iȓiṯ ḏ iryazen, iȓiṯ ṯjehḏem.
14 Marra min ɣa ṯeggem kenniw teggem-ṯ s ȓemḥibbeṯ.
15-16 Aqa ṯessnem Stifanus ḏ ȓeḥbab nnes ḏ niṯni iy yumnen ḏi Lmasiḥ ḏ imezwura ḏi lʼiqlim n Uxaya, ṭewwƹen ixef nsen aḏ sexxaren i ȓmuminin ṣṣaliḥin. Tettareɣ zzaywem ay ayṯma aḏasen ṯṭaƹem i yiwḏan-a am yina u ḏ yinni marra icarrcen ḏi ȓxeḏmeṯ-a ccaṯen ḏayes tamara.
17 Nec farḥeɣ wami d usin Stifanus ḏ Furtunawus ḏ Axeykus ȓaḥeqqac ƹemmaren imucan nwem.
18 Niṯni sreyyḥen uȓ inu ḏ wenni nwem. Iwa weqqareṯ iwḏan amecnaw yina.
Lxitam n ṯebrat-a
19 Ṯijumaƹ n ȓmuminin ḏi lʼiqlim n Asya tseǧament-id xawem. Akilas ḏ Briskila ḏ yinni iǧan ḏi jmaƹeṯ n ȓmuminin ḏi ṯeddarṯ nsen tseǧamen-d xawem aṭṭas ḏi Siḏiṯneɣ.
20 Tseǧamen-d xawem marra aymaṯneɣ. Seǧmem x wayawya s yijjen n sȓam iṣfa.