Ṯnayen lqudraṯ ruḥiyaṯ iy war twafhiment ca mliḥ
14
1 Ḏfareṯ abriḏ n ȓemḥibbeṯ u rzuṯ mliḥ x lqudraṯ ruḥiyaṯ, xaṣṣatan ṯenni n wawaȓ itwaƹeȓmen zi Arebbi.
2 Cuf, wenni issawaȓen s lluɣa ruḥiya, ma issawaȓ netta ak yiwḏan? Lla, issawaȓ ak Arebbi. War ḏinni ḥadd iy ḏas itefhamen, iqqar ṯimesȓayin s Arruḥ iqeddsen ḏaysent ȓmaƹna inuffaren.
3 Walakin wenni issawaȓen akeḏ yiwḏan s min iƹȓem zi Arebbi ataf netta isawaḍ-asen ij n wawaȓ bac aḏ twajehḏen aḏ twacejjƹen aḏ twaṣbaren.
4 Wenni issawaȓen s lluɣa ruḥiya istenfaƹ ixef nnes. Wenni issawaȓen s min iƹȓem zi Arebbi netta istenfaƹ jmaƹeṯ n ȓmuminin.
5 Iwa xseɣ marra kenniw aḏ tessiwȓem s lluɣaṯ ruḥiyaṯ, walakin xseɣ ktar aḏ tessiwȓem s wawaȓen iy ṯƹeȓmem zi Arebbi. Wenni issawaȓen s wawaȓ ig iƹȓem zi Arebbi netta imɣar zeg wenni issawaȓen s lluɣaṯ ruḥiyaṯ, illa meȓa can ḥadd istarjem bac aḏ istenfeƹ jmaƹeṯ n ȓmuminin.
6 Fa ȓexxu ay ayṯma, meȓa usiɣ-d ɣarwem ssawaȓeɣ nec s lluɣaṯ ruḥiyaṯ, man nfaƹ iy zi kenniw ɣa nefƹeɣ illa meȓa uwiɣ-awem-d ca n lwaḥi niɣ ca n ṯusna niɣ ca n wawaȓ iy ƹeȓmeɣ zi Arebbi niɣ ca n ṯɣuri?
7 Amenni uȓa ḏ lʼalaṯ n lmusiqa war ḏaysent bu buḥbeȓ. Amecnaw ṯamja niɣ tagembrit, meȓa war ṯṣuḍeḏ nican niɣ war ṯneqṭeḏ war ḏac ticcen bu nneɣma, war ṯzemmareḏ aḏ tessneḏ lmusiqa nni min ṯeƹna.
8 Ƹaweḏ amecnaw zzammar, meȓa war ḏayes ṯṣuḍeḏ ca s yij n ṣṣut iṣfa, wi ɣa iswejḏen i ȓḥarb?
9 Ammu uȓa ḏ kenniw, meȓa twejwijem waha s wawaȓ nwem, wi ḏawem ɣa ifehmen min ṯeqqarem? Ataf kenniw awaȓ nwem am wenni issawaȓen ḏi lhawa!
10 Bȓa ccekk ǧan aṭṭas n lʼanwaƹ n lluɣaṯ ḏi ddunect, walakin kur icten ɣares ȓmaƹna nnes.
11 Iwa meȓa war ssineɣ ca nec ȓmaƹna n lluɣa nni, ataf nec aḏ iȓiɣ am yij ubarrani i wenni issawaȓen. Netta ƹaweḏ aḏ yiȓi am yij ubarrani i nec.
12 Iwa kenniw, wami ṯrezzum aṭṭas lqudraṯ ruḥiyaṯ, ḥawȓeṯ aḏ tekṯarem ḏi ṯinni iy zi istenfaƹen jmaƹeṯ n ȓmuminin.
13 X manayenni, wenni issawaȓen s lluɣaṯ ruḥiyaṯ itxeṣṣa-yas aḏ iẓẓaǧ bac aḏ istarjem min iqqar.
14 Liʼanna meȓa ẓẓuǧeɣ s lluɣa ruḥiya, arruḥ inu itẓaǧa walakin ȓaƹqeȓ inu war istenfiƹ ca.
15 Iwa min ɣa ggeɣ? Aḏ ẓẓaǧeɣ s arruḥ inu, ƹaweḏ aḏ ẓẓaǧeɣ s ȓaƹqeȓ inu. Aḏ ɣennjeɣ s arruḥ inu, ƹaweḏ aḏ ɣennjeɣ s ȓaƹqeȓ inu.
16 Meȓa ṯcekkareḏ Arebbi s arruḥ waha, wenni iy d yusin ɣarwem ḏ zziyara war izemmar aḏ yini amin x ccuker nnec liʼanna war issin ca min ṯeqqareḏ.
17 Wah, imken cek ṯcekkareḏ Arebbi walakin wenni nneɣnit war ṯ ineffeƹ ca.
18 Tcekkareɣ Arebbi, nec ssawaȓeɣ s lluɣaṯ ruḥiyaṯ ktar zzaywem marra.
19 Innama ḏi jmaƹeṯ n ȓmuminin meȓa ssiwȓeɣ ɣir xemsa n wawaȓen ifehhmen ḥsen zi meȓa ssiwȓeɣ ƹecra aȓaf n wawaȓen s yij n lluɣa ruḥiya.
20 Ṣafi ay ayṯma, war tfekkareṯ ca am iḥenjiren imezyanen. Lla, iȓim am iseyman ḏi ccerr, u ƹlaḥsab ȓaƹqeȓ iȓim ḏ imeqqranen.
21 Iqqar ḏi Ccariƹa n Musa: "Nec aḏ ssiwȓeɣ i yiwḏan-a s lluɣaṯ n iṯarrasen u s iyencicen n ibarraniyen, waxxa amenni war ḏayi itṣenniṭen ca. Manaya iqqar-iṯ Siḏi Arebbi."
22 X wawaȓ nni, lluɣaṯ ruḥiyaṯ niṯenti ḏ ij n lƹalama war ṯeǧi bu i yinni yumnen. Lla, nettaṯ i yinni war yuminen ca. Walakin awaȓ itwaƹeȓmen zi Arebbi, netta istenfaƹ yinni yumnen maci i yinni war yuminen ca.
23 Iḏen, meȓa ṯmunem jmaƹeṯ ṯekmeȓ n ȓmuminin ṯessawaȓem marra s lluɣaṯ ruḥiyaṯ ṯumma zuren-d yiwḏan n barra niɣ ḏ lkuffar, ataf nnan qa kenniw ḏ ibuhaȓiyen.
24-25 Walakin, meȓa ṯessawaȓem marra kenniw s wawaȓen iy ṯƹeȓmem zi Arebbi ṯumma izur-d ḥadd zi barra niɣ ḏ ij n lkafir, ataf isḥess ḏeg yixef nnes qa aḏ itwaḥaseb aḏ iqneƹ zzaywem marra netta ḏ lƹaṣi, ataf azzayes twasufɣen marra lʼasrar n wuȓ nnes. Ṯumma aḏ isejjeḏ aḏ iƹbeḏ Arebbi aḏ yini qa Arebbi ḏ ṣṣaḥ aqaṯ jarawem!
Nniḍam iǧan ḏi lƹibada ḏi jmaƹeṯ n ȓmuminin
26 Iḏen fa ay ayṯma, xmi ɣa ṯmunem ijjen aɣares yiȓi uɣennij, ijjen aɣares yiȓi ij n wawaȓ n useȓmaḏ, ijjen aɣares yiȓi lwaḥi, ijjen aɣares ṯiȓi lluɣa ruḥiya, ijjen aɣares ṯiȓi ttarjama. Marra ṯimesȓayin-a aḏ iȓint bac aḏ tjehḏem.
27 Meȓa ṯessiwȓem s yij n lluɣa ruḥiya, aḏ tessiwȓem ɣir ṯnayen niɣ ṯȓaṯa iḏwem u ṣafi. Aḏ tessiwȓem ij-ij u labud belli can yijjen aḏ istarjem.
28 Meȓa war ḏinni ḥadd iy ɣa istarjmen, wenni issawaȓen aḏ istuk aḏ issiweȓ ḏeg wuȓ nnes ḏ Arebbi.
29 Fa lʼanbiya labud aḏ ssiwȓen ṯnayen niɣ ṯȓaṯa. Inneɣni aḏ meyyzen awaȓen nni.
30 Meȓa ihwa-d lwaḥi x yijjen nneɣni jarasen iqqimen ḏinni, wenni amezwaru issawaȓen aḏ istuk.
31 Liʼanna ṯzemmarem kenniw marra aḏ tessiwȓem zi min ṯƹeȓmem zi Arebbi ij-ij bac marra aḏ ȓemḏen aḏ twacejjƹen.
32 Wa lqudraṯ ruḥiyaṯ n lʼanbiya aqaṯent x yiri nsen s yixef nsen.
33 Liʼanna Arebbi war iǧi bu n ȓfawḍa walakin Arebbi n ȓehna. Ḏ ṯa ḏ lƹada iy ḏaysent ḏi marra ṯijumaƹ n ȓmuminin.
34 Ṯimɣarin ḏi ṯjumaƹ n ȓmuminin labud aḏ qqiment stukant. War ḏasent itwasmiḥ ca aḏ ssiwȓent. Labud aḏ tseḏḥant mammec ṯeqqar Ccariƹa n Musa.
35 Meȓa rezzunt aḏ ȓemḏent can ṯmesȓayṯ, labud aḏ sseqsant iryazen nsent ḏi ṯeddarṯ. Liʼanna ḏ ij n ȓƹib x ṯemɣarṯ aḏ tessiweȓ ḏi ȓwesṭ n jmaƹeṯ n ȓmuminin.
36 Awaȓ n Arebbi, ma iffeɣ-d zzaywem kenniw? Niɣ ma yuweḍ-d ɣarwem kenniw waha?
37 Meȓa ijjen iḥesseb ixef nnes nican ḏ nnabi niɣ ḏ bnaḏem ruḥiya labud aḏ iqbeȓ belli min ḏawem d tariɣ ḏi ṯebrat-a nettaṯ ḏ ij n ȓuṣiyeṯ n Siḏiṯneɣ.
38 Meȓa war iqbiȓ ca manaya, war itwaqebbeȓ ca netta.
39 X manaya ay ayṯma, rzuṯ aṭṭas aḏ tessiwȓem s wawaȓ itwaƹeȓmen zi Arebbi, u ƹaweḏ war qeṭṭƹeṯ ca aḏ tessiwȓem s lluɣaṯ ruḥiyaṯ.
40 Walakin itxeṣṣa aḏ teggem kuȓci maƹqul s yij n nniḍam nican.