11
1 D̯ubva nit̯aḅani mimi, dza hivi vyangu nivyokumut̯aḅani *Kirist̯o.Namuna ya wake wevyonamala kudziweka wakiwa mayomboni
2 Nyakumushad̯ani, kwa dzambo ḍya kwamba mwakunikumbukani kut̯wa na mwakuuḅani haya mayongweezo nimuyongweezeyeyo. 3 Ela natsaka mumanye ya kwamba, Kirist̯o ndiye kitswaa cha muyume. Huyu muyume ndiye kitswa cha mukaziwe, na Muungu ndiye kitswa cha Kirist̯o. 4 D̯ubva, muyume eyenayomba na kusumwiiya Maagu ya Muungu akiwa kadzifinikiza hiki kitswa, huyo kakumugizani yutswa Kirist̯o. 5 Na muke yuḍejwonse eyenayomba na kusumwiiya Maagu ya Muungu pfasipfo kudzifunga kiḍechonse humu kitswani, huyo kakumugizani yutswa muumewe; ni sawa na kwamba kapfeejwa hiki kitswa. 6 Muke adziziye kudzifunga kit̯ambaa cha kitswa, nazichire hizi nywiize. Ela ikiwa kwamba vyaa yutswa kwa muke kuchira ambu kupfeeya hizi nywii, d̯ubva nadzifunge kit̯ambaa. 7 Muyume nkanamala kudzifinikiza hichi kitswache, kwa dzambo jeje ni dza kiyoo cha umbo ḍya Muungu na ni mufaano wa marembo ya Muungu. Ela muke ni dza kiyoo cha marembo ya muumewe. 8 Koro muyume nkakuumbwa kuyawa kwa muke, ela muke ndiye aumbijwe kuyawa kwa muyume. 9 Na wala muyume nkakuumbwa kwa dzambo ḍya muke, ela muke kaumbwa kwa dzambo ḍya muyume. 10 Ndiyo maana muke anamala kudzifunga kit̯ambaa, kuyanga kwamba ka nsii ya mamulaka. Na ni ahende hivyo hivyo pia kwa dzambo ḍya hawa malaika. 11 Hat̯a vivyo, hukwaa hariani mwa Ḅwana, muke ni muhimu kwa muyume, na muyume ni muhimu kwa muke. 12 Koro dza vya muke evyoumbwa kuyawa kwa muyume, muyume nae kavyajwa ni muke; ela kula kintu kiumbwa ni Muungu.
13 Viyoweni nywinywi: Ni sawa kwa muke kumuyomba Muungu wekeani akiwa nkakudzifunga kit̯ambaa cha kitswa? 14 Dza viivyo, mudziyongweeza kwamba nywii ndeya za kumugwa mongoni muyume, zinamuajaisa, 15 ela kwa muke ni rembo. Kazipfegwa zipate kumufinikiza hichi kitswache. 16 Ela muntu akiwa na yuḍaat̯o dzuu ya haya, swiswi na haya matsanganiko ya Muungu ntahudzi ad̯a ingine ya mayombo.
Chakuḍya cha Ḅwana si cha kutsezea
17 Hivi nivyokumwambiani sasa, si vyuuwo vya kumufaarisa hat̯a; koro kutsanganika kwenu kwa mayombo kwakumunangani zaid̯i kuliko kumuelekanya. 18 Cha d̯ura nisikia kwamba, mwipfonakudziana pfamodza dza tsanganiko, munakaa mukigawikana vit̯aro vit̯aro. Nami nina hakika kwamba haya yangine nisikiiyeyo nza ḍugha. 19 Hangu d̯ura, ni had̯i kuwe migawikano kahi yenu, ili hawaḍe wahikiza weo na hachi wapate kuonekana. 20 Mwipfonatsanganika pfamodza, hichi mwichonaḍya si hichi chakuḍya cha Ḅwana hat̯a. 21 Koro mukwakuḍyani ntamuindane. Ndookomu wangine wanawa kufwani nzaa huku wangine wakiwa waruma waa go! 22 Munamba ntamu makwenu kwa kwamba munaḍya na kunwa hat̯a? Ambu munatsaka kuḍibalifa hiḍi tsanganiko ḍya Muungu na muwagize yutswa hawa wasio kintu? Kisa nami nimwambedze, nimufaarise? Hat̯a, siwezi kumufaarisa kaḅisa!
23 Koro haya ya Ḅwana anyambiiyeyo, ndiyo yangu nimuyongweezeyeyo: Ya kwamba, huḍe sikuwe wa kuḍawanywa, Ḅwana Yesu kahwaa mukahe, 24 kamuyaviza ḍuḍa Muungu, kisa kauvunza na kamba, “Hu ni mwii wangu uyavijweo kwa dzambo ḍyenu. Uḍyeni mupate kunikumbuka.” 25 Wakimaaḍya wakisa, kahwaa hichi chikombe dza viviḍe evyohenda d̯ura, na kamba, “Hichi chikombe cha mvinyo ni ḍamano ipfya ḍya Muungu, ḍiwekejweḍyo na mwazi wangu. Kula mwipfonainwa, inweni kunikumbuka mimi.” 26 Yani, kula mwipfonaḍya hu mukahe na kunwa hichi chikombe cha mvinyo, mwakulalabvani kufwa kwa Ḅwana hat̯a adzepfokudza.
27 D̯ubva, yuḍejwonse eyenaḍya chakuḍya cha Ḅwana kwa njia ya kumuajaisa Ḅwana, kakuhendani nabvise ya kuutsowea mwii na mwazi wa Ḅwana. 28 Kwa hivyo, muntu asidzaḍya chakuḍya cha Ḅwana ni had̯i adzipime nguzi tswee. 29 Koro yuḍejwonse eyenaḍya chakuḍya cha Ḅwana pfasipfo kuona maana ya mwii wa Ḅwana, kakudziyeheyani hukumu jeje mwenye. 30 Ndiyo maana wenji wenu mii yenu ntai matsea na mwakujwaani na hat̯a wangine wafwa. 31 Ela t̯ambere hundekaa hukidzipima nguzi, Muungu nkandehuhukumu dza hivi. 32 Ḅwana kakuhuhukumuni na kuhubiga ili hutsekudzahukumigwa pfamodza na hawa walumwengu.