Ḅaruwa ya pfii ya Paulo kwa tsanganiko ḍya
WAKORINT̯O
Ndwahiyo
Hii ni ḅaruwa ya pfii yorejweyo ni Paulo kwa tsanganiko ḍya Korint̯o chima cha mwaka wa 57 ḅaad̯a ya kudza kwa Yesu Kirist̯o. Paulo kaiḍabva hi ḅaruwa na kuwambia hawa Wakirist̯o maana asiyowat̯embeeya dza evyowaahid̯i. Paulo kaperuya mipango ya kwenda Korint̯o kwa kwamba nkekitsaka kwenda akawe mukali kwao (1:23). Na pia ekitsaka kuwayowa kwamba avi vyuuwovye wanavihwaa ambu hat̯a.
Kuzimuni mwehii ḅaruwa, Paulo kaukakanya mojowe kwa Wakorint̯o akinenea haswa dzuu ye kazi yakwe dza ntumi na akiwayombea Wakorint̯o waweze kukuya faroni mwa Kirist̯o. Paulo kakuyangani namuna hwiyonaweza kupata ushindi hukiwa mad̯inani. Kanena dzuu ya d̯ina akuntiyezo maishani mwakwe dza muhumisi jwa Kirist̯o. Na hwakuonani namuna ya t̯ei ya Muungu ivyonahenda kazi. Hat̯a Shaat̯ani kahendadze, Muungu ni mushindi. Jeje anawangiza nguvu hawaḍe weonamuemeeya.
Paulo kakuwakumbusyani Wakirist̯o kwamba, Muungu ni mubalicha, na anatsaka wantuwe wawe dzae kwa kuyavya ugijo kwa hawaḍe weo na t̯uri (8:1-9:15).
Paulo ni muhumisi muhikizika jwa hiḍi Ḍamano Ipfya (3:1-18). Ka t̯ayari kuwanuha wantu kwa Muungu hat̯a ikiwa kwamba jeje ni had̯i akunte d̯ina (4:1-6:13, 10:1-12:10). Muungu kamuhuma Kirist̯o adzeangize naghea kahi yehu swiswi na Muungu. Naswi kahupfa kazi ya kungiza naghea kahi ya wangine nae jeje. Yani chuuwoche kiwafikiye hawaḍe wasiodzamuhikiza ili wapate kupfyehuza mama (5:18-19).
Yeyo humu ḅaruwani kwa ufufi
Paulo kamuyavia ḍuḍa Muungu 1:1-11
Kazi ya ntumi kwa wantu wa Muungu 1:12-2:11
Kazi ya Paulo dza ntumi jwa Kirist̯o 2:12-6:13
Paulo kawayomba Wakorint̯o waishi maisha ya udheru 6:14-7:16
Mvuugiya kwa wantu weo na t̯uri 8:1-9:15
Paulo ni ntumi jwa ḍugha 10:1-13:10
Kedhya na maḍamano 13:11-14