Ḅaruwa ya Paulo kwa matsanganiko ya
GALATIA
Ndwahiyo
Hii ni ḅaruwa yorejweyo ni Paulo kwa matsanganiko yeyokuwa Galatia chima cha mwaka wa 48 ḅaad̯a ya kudza kwa Yesu Kirist̯o. Maagu Mema dzuu ya Yesu Kirist̯o yepfoḍabva kusumwiijwa na kupfokejwa kahi ya wantu wasikwaa Wayahud̯i, kudza chuuwo cha kwamba kuwa Mukirist̯o hachi ni had̯i muntu agije Sharia ya Musa. Paulo kamba sivyo! Ishinu kamba, musinji wa kuishi na Kirist̯o ni kumuserefat̯a, kwikonahupfa kuhwajwa kuwa wantu wahachi usoni kwa Muungu. Ela kahi ya haya matsanganiko ya Galatia kwiwa wantu wamupfingiyeo Paulo. Wamba ni had̯i muntu aigije na Sharia ya Musa ndipfo kawa muhachi usoni kwa Muungu. Ndookomu Paulo kaworea Wagalatia hi hii ḅaruwa, ili awaudzye faroni na mahendoni mwa hachi, hawaḍe wantu waariyeo njia kwa dzambo ḍya haya mayongweezo ya nsuwe.
Paulo kaḍabva na kuḍaat̯ia hachiye ya kuhanwa ntumi jwa Yesu Kirist̯o. Kongeza kunena kwamba katsanwa ni Muungu jeje mwenye kuwa ntumi na wala nkakutsanwa ni mwanaad̯amu (1:1-3). Na uhumisiwe mbwa kwa wantu wasiokuwa Wayahud̯i (1:16; 2:7-8). Makisa kajukuzya yuḍaat̯o jwakwe kwa kunena kwamba muntu anapfonywa kwa njia ya faro t̯u, na wala nkapfonywe kwa kuuḅa Sharia ya Musa.
Na pia Paulo kawakontomeeza wasomai wakwe kwamba, huyu Ruhu ndiye eyenawawezesa kutsauḅa t̯amaa zao za kimwii. Ishinu kawamba huyu Ruhu ndiye eyenawawezesa kuvyaa matunda ya Kiruhu (5:16, 22).
Yeyo humu ḅaruwani kwa ufufi
Ndwahiyo na kedhya 1:1-9
Paulo kaihehea kaziye dza ntumi 1:10-2:10
Paulo kayahehea haya Maagu Mema 2:11-21
Kuwa muhachi usoni kwa Muungu 3:1-4:7
Namutseishi dza wahumwa kawii 4:8-31
Muwekwa huru kuzimuni mwa Kirist̯o 5:1-12
Ishini maisha ya kuyongojwa ni Ruhu jwa Muungu 5:13-26
Tsukwiiyanani mizigo 6:1-10
Maghaghisa ya mwiso na kedhya 6:11-18