Ḅaruwa ya d̯ura ya Paulo kwa tsanganiko ḍya
WAKORINT̯O
Ndwahiyo
Hii ni ḅaruwa ya d̯ura yorejweyo ni Paulo kwa tsanganiko ḍya Korint̯o chima cha mwaka wa 56 ḅaad̯a ya kudza kwa Yesu Kirist̯o. Hiḍi ni tsanganiko eḍyoḍabvisa jeje epfokwenda Korint̯o ngera ya charoche cha d̯ura (Mah. 18:1-18). Ḅaad̯a ya Paulo kunuka, tsanganiko ḍya Korint̯o ḍidzaḍinjia d̯ina garagara, na Ukirist̯o wa Wakorint̯o ntawiiwa mwema. Paulo kora hi hii ḅaruwa ili aweze kunenea dzuu ya hizi hizi d̯ina, na aweze kuḍikumiiza hiḍi tsanganiko faroni mwa Kirist̯o.
Korint̯o wiiwa ni mudzi mukuu wa Wayunani na wiiwa ndiwo makao makuu ya ḍyimbo ḍya Akaya ḍiḍyoḍikit̯awaligwa ni Warumi. Wiiwa ni mudzi mukuu wa kiḅiashara na umanyikana kwa mambo ya kitamaḍuni. Pia mudzi wa Korint̯o wiwa umanyikana kwa t̯aḅia nzuka nzuka za uḅari na kuyomba miungu ya nsuwe.
Paulo haswa kanenea dzuu ya migawikano injiiyeyo humu tsanganikoni (1:10-4:21). Makisa kanjia kunenani dzuu ya d̯ina garagara zizokuwa matsanganikoni. Kanenea dzuu ya uḅari na kuhwaana kwa muke na muyume, kuḍya chakuḍya kiyavijwecho mvuugiya kwa masanamu na kuyomba kwa mupango mwema matsanganikoni. Makisa Paulo kanenea dzuu ya kufufujwa kwa wafu na dzuu ya mat̯ola ya Ruhu Mudheru na namuna ya kuyatumia haya haya mat̯ola garagara kwa faiḍa ya tsanganiko zima. Dhango ḍya 13 ḍinenea dzuu ya matsako, kwamba ndiyo t̯ola nkuu ya mwiso ya Muungu awapfiyeyo wantuwe.
Yeyo humu ḅaruwani kwa ufufi
Ndwahiyo ya hichi chuo na kedhya 1:1-9
Dzuu ya wantu kudziḅaa vit̯aro vit̯aro 1:10-4:21
Dzuu ya uḅari matsanganikoni na kuhwaana kwa muke na muyume 5:1-7:40
Dzuu ya chakuḍya kiyavijwecho mvuugiya kwa masanamu 8:1-11:1
Dzuu ya kuyomba na mupango mwema matsanganikoni 11:2-14:40
Dzuu ya kufufujwa kwa Kirist̯o na hawaḍe wamuhikiziyeo 15:1-58
Dzuu ya kuyavya mvuugiya za kuwagija wantu wa Muungu 16:1-4
Mipango ya Paulo na maghaghisa ya mwiso na kedhya 16:5-24