Kedhya kwa watsakwa
16
1 Natsaka kumumanyisa kwamba, imbu ḍyehu Fibe eyenaḍihumikia hiḍi tsanganiko ḍya Kenkerea, ni muke muhikizika muno na njwakudza kwenu. 2 Adzepfokudza mupfokeyeni urembo muno kwa kwamba nyonse mumuhikiza Ḅwana. Munamala kuhenda dzavyo, kwa kwamba nywinywi mu wantu wa Muungu. Kisa mumpeni ugijo uḍewonse adzeotsaka kuyawa kwenu, koro jeje mwenye kawapfa ugijo wantu wenji muno. Hat̯a nami pia kanimpa ugijo.3 Nikedhyeani Pirisila na Akwila. Huyu huyu muke na muumewe nihenda nao kazi ya kumuhumikia *Kirist̯o Yesu, 4 na hat̯a wewa wayangiza maisha yao hat̯arini kwa dzambo ḍyangu. Hachi nina ḍuḍa nao muno. Kisa simi t̯u niyekuwayaviani ḍuḍa, ela hat̯a haya matsanganiko yonse ya wantu wa vyeet̯i vingine, yana ḍuḍa nao.
5 Nikedhyeani hat̯a hiḍi tsanganiko ḍiḍyonayomba nyumbani mwao.
Nikedhyeani huyu ḅamu jwangu mutsakwa Epaneto. Jeje ewa ndiye muntu jwa d̯ura jwa ḍyimbo ḍya Asia amuhikiziye Kirist̯o.
6 Nikedhyeani na Maria, huyu muke ahendeye kazi muno kwa dzambo ḍyenu.
7 Niyaviani na kedhya zingine kwa Andironiko na Yunia.a Hawa ni Wayahud̯i wenzangu hwiwofungwa gerenzani pfamodza. Wewa wamuhikiza Kirist̯o d̯ura kaḅila mimi sidzamuhikiza, na wao wamanyikana muno kahi ya hawa *ntumi.
8 Munikedhyeyeni Ampuliato, ḅamu jwangu mutsakwa na amuhikiziye Ḅwana dzami.
9 Munikedhyeyeni na Urubano. Huyu huyu nae huhenda kazi ya kumuhumikia Kirist̯o pfamodza.
Munikedhyeyeni na Sitako, eye ḅamu jwangu mutsakwa.
10 Niyaviani kedhya zingine kwa Apele, ayangiye kwamba kamuhikiza Kirist̯o ḍugha,
na munikedhyeye na wantu wa balabalani mwa Arisitobulaso.
11 Munikedhyeyeni na huyu Muyahud̯i mwenzangu eyenahanwa Herod̯ioni,
na munikedhyeye wantu wa balabalani mwa Narikiso wamuhikiziyeo Ḅwana.
12 Niyaviani kedhya zingine kwa Tirofena na Tirofosa. Hawa hawa wake wowii wamuhumikia Ḅwana na hiḍu muno.
Nikedhyeani na mutsakwa Perisisi. Nae pia ni muke amuhumikiyee Ḅwana na hiḍu nyinji muno.
13 Nikedhyeani na Rufasi na mamajwe. Rufasi ni muntu adziyaviyee kumuuḅa Ḅwana na mojo mumodza.b Mamajwe namuhwaa dza mama anivyaiye.
14 Wangine niokutsakani munikedhyeye ni aḍe Asikirito, Fulego, Hamesa, Patirobasi, Hama pfamodza na hawa wandugu wangine wonse weo pfamodza nao.
15 Nikedhyeani na Filologu na Yulia.
Pia nikedhyeani na Neriusi na imbuḍye, na Olimpa pfamodza na hawa wahikiza wangine wonse weo pfamodza nao.
16 Mukwakukedhyanani, noneanani, kuyangana matsako ya kindugu. Haya matsanganiko ya Kirist̯o yonse yamukedhya nto.
Mafunda ya mwiso
17 Na sasa wandugu zanguni, nyakumuyombani kwamba mudzit̯unze na hawa wantu weonayongweeza mayongweezo ya kwaarya wantu, yakayeha kutsaimukana na wantu wakaḅaikana vit̯aro vit̯aro. Haya weyokuyongweezani ni garagara na haya mayongweezo muyongweezejweyo. Wantu dzao wakaiyeni kuye. 18 Koro hawa hawa wantu ntawakwaa kumuhumikiani Ḅwana jwehu Yesu Kirist̯o hat̯a, ela wakuhendani hivi ili waweze kudzit̯oseza hizi t̯amaa zao wezonazo. Wakwakunenani, wananena vyuuwo vya kuhalahala wantu na kuwashad̯a na vyuuwo vyema vyema. Kwehii njia wanakaa na kuziheka hizi akili za hawaḍe wasioimuka kwamba wakwambijwani nsuwe. 19 Nitsekea kwa dzambo ḍyenu muno kwa kwamba kula muntu kamanya namuna mwivyonamut̯ii Kirist̯o. Ela hat̯a vivyo natsaka muimanye hi hachi na muhende yeyo mema, ili mutsekudzanjia kuhendani mazuka. 20 Ndookomu mukihenda hivi, huyu Muungu eyenangiza naghea kahi yenu anazitsaratsara nguvu zonse za Shaat̯ani si hat̯a kae, na anamumpa uwezo dzuuye. T̯ei ya Ḅwana jwehu Yesu naiwe pfamodza nanywi.c
21 Pfokeani kedhya kuyawa kwa Timoteo, huyu muhumisi mwenzangu niiye nae. Hawa Wayahud̯i wenzangu aḍe Lukio, Yasoni na Sosipata, nao pia wamukedhya nto. 22 Tatio, huyu oreye hi hii ḅaruwa kwa niaḅa yangu, nae pia kamukedhya kwa sari ḍya Ḅwana.
23 Gayo na Erasto nao wamukedhya nto. Hapfa niipfo nyakukaani nyumbani mwa Gayo, na hat̯a hiḍi tsanganiko ḍyonse ḍinakaa na kuyomba nyumbani mwakwe. Kwarito, huyu muntu eyenat̯unza hi nkandi ya mudzi nae pia kamukedhya nto.d
Wiya wa kumushad̯a Muungu
25 D̯ubva hwonse nahumushad̯eni Muungu! Jeje ndiye eyenaweza kuikumiiza hi faro yenu mwiyonayo kwa Kirist̯o. Haya *Maagu Mema dzuu ya Yesu Kirist̯o niyonakaa na kusumwiiya, ndiyo yeyonamumpa kukumiiya faro zenu. Kae haya haya yewa yafitswa dza ngadzi kwa myaka na myaka, ela sasa yayavigwa wekeani tswee. 26 Dza vya matsoro ya manabii yat̯aḅiriyevyo hangu kae na kae, sasa haya haya maagu yapfenujwa ili kula mumodza aweze kuyasikia na kuyaimuka. Huyu Muungu eyenaishi maishi na maishi, kahuamuru swiswi ntumi wakwe huyawasumwiiye wantu wa vyeet̯i vyonse, ili kula muntu aweze kumuhikiza na kumut̯ii Yesu Kirist̯o. 27 Ndookomu nahumushad̯eni Muungu koro ndiye Muungu jeje heket̯u. Na ndiye amanyiye kula chicho cha sawa cha kuhenda. D̯ubva kwa dzambo ḍya hivi vya Yesu Kirist̯o ahuhendeeyevyo, hunamala kumushad̯a Muungu maishi na maishi! Amina.