Yesu kawabusa Mafarisayo dzuu ya kuuḅa maadha yao
15
1 Makisa kudza *Mafarisayo na waalimu wa *Sharia kuyawa Yerusalemi wadziyeo kumukorofat̯a Yesu. 2 D̯ubva wamuuza wamwamba, “Kut̯i awa wanafund̯iwo ntawakae na kuuḅa adha za wabibi zehu? Wakikaa kuḍyani ntawakae na kunawa kisharia dza ivyonamala!”3 Yesu kawambukuya kawamba, “Kut̯i nanywi munakaa na kuzivunza amuri za Muungu kwa dzambo ḍya kuuḅa maadha yenu? 4 Koro Muungu kamba, ‘Muhile babajo na mamajo.’ Na kawii kamba, ‘Yuḍejwonse amutsoleye ise ambu nina ni kuyagwa!’ 5 Ela nywinywi mwakuwayongweezani wantu kuwafat̯ula wavyazi wao. Koro munakwamba muntu akimwamba ise ambu nina, ‘Nina kintu cha kukupfonya nacho, ela nikiweka nikiyavye dza nt̯unu kwa Muungu,’ ḅasi nkanamala kuwahendea kiḍechonse kawii. 6 Ndookomu kwa dzambo ḍya kuuḅa maadha yenu, mukihendeza hichi chuuwo cha Muungu kitsowa maana. 7 E nywinywi mu wambiimbii t̯i! *Nabii Isaya kanena hachi dzuu ya wantu dzanywi, epfot̯aḅiri akyamba,
8 ‘Hawa wantu hawa wananihila na miyomu t̯u,
ela myojo yao yaa kuye nami.
9 Kuniyomba kwao ntaku maana yaḍeyonse,
koro wanayongweeza masharia yatungijweyo ni wanaad̯amu
dza kwamba ndiyo hi Sharia ya Muungu.’ ”
Yesu kayongweeza dzuu ya udheru wa kiruhu
10 Makisa Yesu kaihana hafufi hi t̯ut̯a ya wantu. Wepfokwenda kawamba, “Nipfindiiyani urembo na muimuke nivyokunenani. 11 Hikiḍe cha muntu echonangiza kanwani sicho chichonamuhendeza kutsaawa mudheru usoni kwa Muungu. Ela hikiḍe chichonayawa kanwani mwakwe ndicho chichonamuhendeza kutsaawa mudheru.”
12 Makisa hawa wanafund̯i wamwendea Yesu na wamuuza wamwamba, “Kumanya kwamba hiviḍe uneneyevyo kwanza viwangiza tsungu hawa Mafarisayo?” 13 Ela Yesu kawambukuya kawamba, “Kula muhi usiot̯orwa ni Baba jwangu jwa mbinguni udzakujwa na miziye. 14 Nywinywi wayatseni t̯u. Hangu d̯ura ni wayongozi ntumbu matso. Na ntumbu matso akimugija yuroi ntumbu matso mwenziwe, wonse wanagwa simoni.”
15 Kisa Pet̯ero kamwamba Yesu, “Ḅwana, hwambie maana ya hiḍi inganyo.” 16 Yesu kambukuya kamba, “Koro hat̯a nanywi ntamukuimuka kintu hat̯a? 17 Ntamunaona hat̯a kwamba, cha muntu echonaḍya kinanjia humboni makisa kinayawa kwa njia ya kwenda dhaka? 18 Ela vyuuwo vizuka vizuka vinayawa mojoni mwa muntu. Na hivi ndivyo vivyonamuhendeza muntu kutsaawa mudheru usoni kwa Muungu. 19 Koro kuzimuni mwa mojo wa muntu, ndimo kwimonayawa mat̯aro mazuka mazuka yeyonamungiza muntu kunjia uḅarini, wivini, uyajini, rangani, kunenani nsuwe na kuneneani wangine mazuka. 20 Ḅasi, haya haya mambo ndiyo yeyonamuhendeza muntu kutsaawa mudheru usoni kwa Muungu. Ela kuḍya chakuḍya pfasipfo kunawa mikono, ntakumuhendeze muntu kutsaawa mudheru usoni kwa Muungu.”
Faro ya muke asikwaa Muyahud̯i
21 Makisa Yesu kanuka na Galilaya kenda ḍanda za midzi ya Turo na Sidoni. 22 D̯ubva Yesu kendejwa ni muke mumodza Mukanaani jwa hukuhukuḍe. Huyu muke kamuyomba Yesu kamwamba, “E Ḅwana, Yesu Mwana jwa D̯aud̯i, nakuyomba unifwiye t̯ei. Koro nina mwanamuke wangu eye na mpepfo nzuka zizokumuhangaishani muno!” 23 Ela Yesu kadzinyamaza mya. Nkakumwambukuya chuuwo hat̯a kimodza. Makisa hawa wanafund̯i wenda wamuyomba Yesu amugonzoze huyuḍe muke wakimwamba, “Ḅwana, mwambe agonzowe t̯i! Kakaiya kuhuuḅa-uḅa na nyuma na kuhubigia machara.” 24 Yesu kambukuya kamba, “Mimi nihumigwa kwa wantu wa kyeet̯i cha Waisiraeli weo dza mbuzi ziariyezo. Sikuhumigwa kwa wantu wangine.” 25 Ela huyuḍe muke kamwendea kamuvunzia nkuhi na kamuyomba kawii kamwamba, “Ḅwana, e ad̯o nigijiija!” 26 Yesu kamwamba, “Si hachi kuhwaa chakuḍya cha wana ukifat̯uliye machughe.” 27 Ela huyu muke kamwamba, “Gula ndivyo Ḅwana, ela hat̯a machughe nayo yanaḍya hu muharachao wiwonagwa kuyawa mezani kwa maḅwana zao.” 28 Ndookomu Yesu kamwamba, “E muke, hachi una faro nkuu muno! D̯ubva navikuhendekeye dza uyombeyevyo.” Na iyo saa mwanamukewe kapfowa.
Yesu kapfonya wantu wenji
29 Yesu kanuka na hukuḍe na kauja ḍanda ya ziwa ḍya Galilaya. Kenda kapfaa karimani dzuu na kakaa chihako. 30 D̯ubva kendejwa ni t̯ut̯a nkuu na nkuu ya wantu wamupfiikiyeo wantu weokuwa vihewi, ntumbu matso, wantu wahinamfiyeo, maḅuḅwi na wangine weokuwa na majwazi garagara. Wonse wenda wawaweka usoni kwa Yesu, nae kawapfonya wonse. 31 Hawa wantu wamaka muno wakidzawakiona kwamba maḅuḅwi yakunenani, wahinamfiyeo wakupfonywani, vihewi wakwenendani, na ntumbu matso wakuonani! Ndookomu wamushad̯a Muungu jwa Isiraeli.
Yesu kaisa t̯ut̯a ya wantu zaid̯i ya elefu nee
32 Makisa Yesu kawahana hawa wanafund̯iwe kawamba, “Nyakuwaoneani t̯ei muno hawa wantu hawa. Koro wesakukaa nami hapfa kwa nsiku ntahu sasa, na ntawa kiḍechonse cha kuḍya. Nami si haḍya ya kuwagonzoza na nzaa zao watsekudzavurika njiani.” 33 Hawa wanafund̯i wamwambukuya wamwamba, “Huku huku yuwandani hwendapata ku, chakuḍya cha kuit̯osa hi hii t̯ut̯a yonse ya wantu?” 34 Yesu kawauza kawamba, “Munamba anywi muna mikahe myengaa?” Nao wamwambukuya wamwamba, “Huna mikahe mifungahe na nswi kachuchu.” 35 D̯ubva Yesu kawamba hawa wantu wakae chihako, 36 makisa kaihwaa hi mikahe myofungahe nezi nswi, na kamuyaviza ḍuḍa Muungu. Akisa kavivunza-vunza viḍinku na kaviwapfa hawa wanafund̯iwe, nao wawagawiya hawa wantu.
37 Wantu wonse waḍya hat̯a wanjia kuviyowani. Hawa wanafund̯i watsowa-tsowa hivi viḍinku vya mikahe na nswi visaiyevyo. Wadzaza vikapfu vifungahe. 38 Hawaḍe waḍiyeo wewa zaid̯i ya wayume elefu nee, pfasipfo kut̯ala wake na wana. 39 Makisa Yesu kawagonzoza hawa wantu na kanjia chomboni kenda ḍanda za Magadani.