इब्रानी
विश्वासी मेह्णु जे चिट्ठि
नोउए त पुराणे बारे हमेशा केईआं बेहेस भुन्ति अओ असी। एन्हि दुई बिचा कोउं सही त अब्बल असा, एसे पिछाण करणे केहि जेईं जे सुआ औखु कम असु। केहि बोते कि नोई चीज या बोक सही त अब्बल असी। पर होर केहि बोते कि पुराणि से सही त अब्बल थी। धिक सोचे त, पेहले पेहले पांगेई मेह्णु दुई टाई रोज जोत हंट कइ चाहम पुजतेथ। पर जपल केआं खड़ जोत बथ बणो असी, त मेह्णु बोडे खुशी जुए तस पुराणि बथ छड़ दी कइ नोई बते बइ घेण लगो असे। पर कुछ बीमारी ईलाज करण जे अभेईं बि मेह्णु पुराणे तरीके चुणते, ना कि नोउए तरीके। सोबी केआं औखु त से भुन्तु जे रीति रिवाज त चाल चलण मेह्णु सुआ सालुं केआं मानते अओ असे, तस छड़ दी कइ नोउए तरीके जुए जीण। हें मन अन्तर एसे बारे सुआ सवाल एन्ते।
पेहले सदी अन्तर यहूदी विश्वासी मेह्णु के बुछ बि कुछ इहांणि अड़चन अओ थी। से जाणतेथ कि परमेश्वरे यीशु बेलिए ईं सोबी बचाणे त अमर जीवन देणे ठीक किओ असु। होर से मसीह पुठ विश्वास करणे बेलि ईं भोई बटतु। पर तेन्के मन अन्तर ईं शक थिआ कि बचुण जे पुरखी के टेम केआं खड़ चलो रीत रिवाज छड़ दी कइ से कोई गलती त नेईं करण लगो।
इस चिट्ठि अन्तर लेखक ई हरालण त समझाण लगो असा कि परमेश्वरे बेलि मेह्णु गलती त पाप केआं बचाण जे, जे नोई चाका चलो असी, पेहलकण बाड़ी पुराणि चाका केआं बि अब्बल त पक्की असी। चले, इस चिट्ठि पढ़ कइ पता लान्ते कि से पुराणि चाका की थी त लेखक केस नोई चाकाई बारे बताण लगो असा।
विषय सूची
यीशु, परमेश्वरे यकी दुई (1:1-4)
यीशु, स्वर्गेदूती केईआं बि बोडा (1:5—2:18)
यीशु, मूसा त यहोशू केईआं बि बोडा (3:1—4:13)
यीशु, हारुने पुजारोठि केईआं बि बोडा (4:14—7:28)
सोबी जुबानी केईआं बि खरी, यीशु जुबान (8:1—9:10)
सोबी भकती केईआं बि खरी, यीशु भकत (9:11—10:39)
विश्वासे उगाही (11:1-40)
अखिरि बोके त नमस्कार (12:1—13:25)