फिलेमोन
जे लिखो प्रतिनिधि पौलुसे चिट्ठि
नमस्कार
1
1-2 असी जुए मसीहे सेवा करणे बाड़ा ए में ट्यारे भाई फिलेमोन! मसीह यीशु जे कैद भुओ अउं पौलुस त विश्वास अन्तर हें भाई तिमुथियुस तोउ जे नमस्कार कते। मसीह अन्तर हें भेण अफिया, त विश्वासे लड़ाई अन्तर हें साथी भाई अरखिप्पुस जे, होर तुं गी भुणे बाड़ी सतसंगे सोबी विश्वासी भाई भेणि जे बि हें नमस्कार!3 हें परमपिता परमेश्वरे त प्रभु यीशु मसीहे कृपादृष्टि तुसी पुठ भुन्ति रिहे, होर तुसी शान्ति मेती रिहे।
आमीन
पौलुस परमेश्वरे धन्यवाद त प्रार्थना करण
4 ए में ट्यारे भाई फिलेमोन! जपल बि अउं तोउ याद कता त तें लिए परमेश्वरे धन्यवाद कता त तोउ जे हमेशा प्रार्थना कता रेहन्ता। 5 किस कि अउं प्रभु यीशु मसीह पुठ तें विश्वासे बारे त तु कीं सोब शुचे मेह्णु जुए परेम कता, तसे बारे शुणता रेहन्ता। 6 त अउं ई प्रार्थना कता कि विश्वास अन्तर तें साथोठ चलोरी लौती रिहो। होर तोउ ई बुद्धि लौती अओ कि मसीह जे अस कोउं कोउं भले कम कइ बटते। 7 किस कि ए भाई, तें परेम भावे बारे शुण कइ मोउं सुआ खुशी त हिम्मत मेओ असी, किस कि तें परेमे बेलिए शुचे मेह्णु के जान अन्तर जान एई गई।
पौलुस नशो गुलाम ऊनेसिमुस जे छने करण
8 तोउं त, बेशक मसीह अन्तर तोउ केईआं कुछ करवाणे लिए मोउं केईं पूरी हिम्मत असी, 9 तोउं बि मोउं स्याणा पौलुस परेम जुएई तें छनेअरे करण खरु लगु। एचेल अउं मसीह यीशु लिए जेहेल अन्तर असा। 10 त ए में ट्यारे! अउं उनेसिमुसेa लिए तें छनेअरे कता, जे में कोईये ईं असा। तस इस जेहेल अन्तर मसीह पुठ विश्वास कराई कइ अउं तसे बोउए ईं बण गो असा। 11 पेहले त से तें केसे कमे ना थिआ, पर अब तें त में दुहि के सुआ कमे भोई गो असा। 12 मेईं तोउ केईं से वापस लंघाई छो असा, जे में काजे खानि भो। 13 हांलाकि तेस अउं अपफ केईं रखण चहन्ताथ कि से इस घड़ी तें कनारा में सेवा करे। खास कइ अभेईं जपल अउं खुश खबरी बझई जोई जेहेल अन्तर कैद असा। 14 पर अउं तें इच्छाई बगैर कुछ बि करण ना चहन्ता, ताकि तें ए भलाई जब्बरदस्ती ना, बल्कि अपु मर्जी जुए ईं लौती भो। 15 किस कि इस बझई जोई ईं मोखयाल से केहि रोजे लिए तोउ केईआं दूर भोई गो थिआ, ताकि से हमेशा लिए तोउ जोई साते बिशियाल। 16 पर यक गुलामे ईं ना, बल्कि तेस केईआं बि बध कइ, यक विश्वासी भाई बण कइ साते बिशियाल। से में सुआ ट्यारा असा त अउं समझता कि से ना सद जिसमे हिसाब जोई, बल्कि हें प्रभु यीशु मसीह अन्तर बि तोउ तीं ट्यारा लगता।
17 तोउं त, अगर तु मोउं मसीहे सेवा अन्तर अपु हेस्सेदार समझता, त तेस बि ईं धराण दे, जीं मोउं धरान्ता। 18 अगर में ऊनेसिमुसे तोउ किछ घटी लओ असी, या तें तेस पुठ किछ ऋण असु, त तेस में नओं लिख छड़। 19 ई अउं पौलुस अपु हथे बइ लिखता कि अउं अपफ तस भर देन्ता। होर में जे ऋण तोउ पुठ असु, तसे बारे चेता दिआण मोउं जरूरी ना लगतु, किस कि तोउ पता असा कि तेईं में बेलि ईं मसीह पुठ विश्वास किआ त बच गा। 20 ए ट्यारे! मसीह प्रभु अन्तर हेस्सेदार भुणे बझई जोई अउं चहन्ता कि तें बेलिए में कुछ फायदा भोल। त छने मसीह अन्तर में मन खुश करीण दे।
अखिरि बोके त अशुश
21 मोउं पता असा कि तु में केहणा कत मानता। तोउं त, अउं ई चिट्ठि तोउ जे लिखण लगो असा। होर अउं ईं बि जाणता कि जे कुछ बि अउं बोता, तु तेस केईआं बि केहि गुणा बध कइ कता। 22 त छने, मोउं बिशुण जे जगाह जुढ़ेर रख। मोउं भाड़ असी कि तुं प्रार्थनाई बेलिए अउं जेहेल केईआं बाहर निस घेन्ता।
23 मसीह यीशु लिए मोउं जुओई साते कैद भुओ भाई इपफ्रास तुसी जे नमस्कार कता। 24 होर तिहांणि मोउं जुएई साते प्रभु सेवा करणे बाड़े मरकुसb भाई, अरिस्तर्खुस भाई, देमास भाई त लूकाc भाई बि तुसी जे नमस्कार कते।
25 हें प्रभु यीशु मसीहे कृपादृष्टि तुसी पुठ भुन्ति रिहे।
आमीन।