इब्रानी
विश्वासी मेह्णु जे चिट्ठि
यीशु, परमेश्वरे यकी दुई
(1:1-4)
यीशु बेलि परमेश्वर असी जुए बोके करीण
1
1 ए ट्यारेओ, पेहले पेहले परमेश्वरे सुआ लिंग, अलग अलग तरीके जुए अपु भविष्य वक्ती के बेलि हें पुरखी जुए बोके की। 2 पर अखिर अन्तर तेन अपु कुआ यीशु बेलिए असी जुएई बोके किओ असी। तसे कुआ सोबी चीजी के हकदार असा त तसेरी बेलि परमेश्वरे सम्हाई कुछ बणाउ। 3 सेईंए कुआ परमेश्वरे गुणे त सभावे यकी दुई असा, त से तसे पूरी महिमाईं बेलि चिलकता। से अपु बोकी के ताकते बेलि पूरा भुमण सुसुर रखता। होर, जपल तेन मेह्णु के पाप माफ करणे बथ बणाई छड़ी त से घेई कइ परमेश्वरे देहणा कना, बोडे इज्जते बाड़ी तेस जगाई बिशा। 4 त जिहांणि परमेश्वरे तसे धे सोबी स्वर्गेदूती के नओं केआं खास नओं दुतो असु, तिहांणि से सोबी स्वर्गेदूती केआं सुआ बोडा बणा।यीशु, स्वर्गेदूती केईआं बि बोडा
(1:4—2:18)
यीशु स्वर्गेदूती केआं बि बोडा
5 किस कि स्वर्गेदूती बिचा, परमेश्वर कि कदी केसे जे बोलो असु ना कि
“आज अउं तें बारे ई घोषणा कता कि
तु में कुआ भो, होर अउं तें बोउ भो?”a
होर ई कि
“अउं तसे बोउ
त से में कुआ बोलिन्ता?”b
6 होर शुणे, जपल परमेश्वरे अपु इकलौता कुआ यीशु इस मतोक जे लंघा त ईं बोलु कि
“ए में सोब स्वर्गेदूतों! तुस एसे पूजा अराधना करे।”
7 बल्कि, स्वर्गेदूती के बारे परमेश्वरे ई बोलु,
“अपु सेवक स्वर्गेदूती अउं ब्यारे ईं,
त आगे टहनु ईं बणान्ता।”c
8 पर अपु कुआ यीशु बारे से ई बोता कि
“तु परमेश्वर भो, तें सिंहासन जुग जुग तकर भुन्ता;
त तें राज, न्याय त धरमे राज भुन्ता।
9 जे धरम त न्याय जुए जीन्ते, तुसी तेन्हि जुए परेम किआ,
पर जे अन्याय त बुराई कते, तेन्हि हेर नफरत की।
तोउं त, अउं तें परमेश्वर, मेईं तु होरे सोबी बिचा चुणो असा,
त तोउ मुकुट लोओ असा कि तु खुशी मनाल।”d
10 त ई बि बोता कि
“ए प्रभु, शुरुवात अन्तर तेईं धरती बणाई,
होर अपु हथे बइ तेईं स्वर्ग बणा।
11 से त मुक घेन्ते, पर तु ना मुकता;
से झिणि के ईं छीन्छ भोई घेन्ते;
12 तु तेन्हि चादुर ईं बेहड़ छता।
तु तेन्हि झिणि के ईं खोल छता।
पर तु हमेशा सेईंया असा,
होर तु जुग जुग तकर जीन्ता।”e
13 पर तेन कदी केस स्वर्गेदूत जे ना बोलु कि
“जोउं तकर अउं तें दुश्माणी तें खुर पड्डे ना छइ छउं,
तोउं तकर तु में सुमले कना बिश”।f
14 त स्वर्गेदूत कोउं भिन्थ? स्वर्गेदूत परमेश्वरे लंघो आत्मा भो। से परमेश्वरे त तेन्हि मेह्णु के सेवा कते, जेन्हि बचाण जे परमेश्वरे ठीक किओ असु।